Марина Чернова, Чем-Куюк школа, 6 класс
Глаголлэн куназ
Кытчы мон вуи? Котыр чиля, пиштэ. Валатски, вож пушйись садэ вуиськем. Йыр йылам лыз инбам, пыд улам ворпоё музъем. Сяськаос пальпотыса шорам учко, пумитам йырзэс мыкыръяло. Писпуос но куаръёсынызы шильырто: "Ӟечбур, нылаш!" Пыд улысьтым синъёсме ӝутӥ но воксё абдраӥ: азям ик Зарни дворец султэм. Таӵезэ выжыкылысь сяна ӧй адӟылы вал на. Кема малпаськыса ӧй улы — бызьыса пушказ пыри. Кӧня татын комнатаос! Котькытын сяськаос, сяськаос...
Вамыштӥ азьлань, кызьы но озьы вуи тронной залэ. "О, асьме доры куно лыктэм!" — кылӥ паймем куараез. "Умоесь, мон Марина!" — шуисько. "Нош мон Глаголия кунлэн эксэез — Глагол",— вера кузё. Мон воксё пайми. Тодам лыктӥз: ми но али "Глагол " темаез ортчиськом ук. Пумен ачим шумпотӥ.
Глагол монэ куно кариз зарезь сьӧр сиён-юонэн. Гуртамы сыӵеоссэ оскалтэм, веръям ӧй вал на. Собере музыкантъёс эктон гур шудӥзы. Азям ик эктӥзы Глаголлэн Неопределённой формаез но Спряжениез, поръязы куинь эшъёс — Наклонениос. Нош Глагол эксэй монэным артэ сылэ но вера, вера, вера...
Мынам тодам лыктӥз бертоно шуыса, нош кызьы — уг ни тодӥськы. Сюлэмшугме верай Глаголлы. "Эн кошкы, кыль монэн",— куриз выль тодмое. Эксэйлэсь куректэмзэ адӟи но шуи: "Мыным бертыса тонэ дышетыны кулэ". Глаголлэн ымнырыз пальпотонэн пиштӥз. Со монэ китӥм кутӥз но садэ поттӥз. Возьматӥз огназ будӥсь горд сяськаез:
— Тани тае ишкалты но шу: "Тон, сяська, горд сяська, лэзь монэ дорам ". Мон ишкалтӥ сяськаез, нош эксэй шуэ: "Эн дырты... монэ эн вунэты... мон доры куное ветлы... " Мон верай, кызьы кулэ. Сяська жингыртыны кутскиз...
... Сайкай. Будильник жингыртэ. Анае пудо сюдэ ини. Сузэре вӧзам ческыт уммен изе. Тодам лыктӥз чебер уйвӧтэ. Оло уйвӧт но ӧй вал.
