Ӟучсэ кылэз дышетытэк, шуггес луэ йыг-йыг вамышъяны. Нош аслэсьтыд кылдэ яратытэк, мукет кылэз уд дышы гажаны!  (Д. Яшин)

Владимир Китов, Варзи-Ятчи школа, 11 класс

Выль пушъетъёс

Кедра Митрейлэн "Секыт зӥбет" романэзъя

"Секыт зӥбет" роман, пуштросэныз гинэ ӧвӧл, удмурт кылын нырысетӥ роман луэменыз но асьме литературае пусйымон пытьы кельтӥз. Кедра Митрей одӥг удмурт гуртлэн улэмез пыр возьматэ XIX даурлэн кутсконаз быдэс Россиысь югдурез.

Романын валтӥсь герой луэ Дангыр. Пичи дырысеныз атайтэк кылемын. Со вакытэ тросэз егитъёс сыӵе сюресэз ортчизы. Атайёссы я рекрутэ басьтэмын, я тюрьмае пытсамын, я улонысь вазь кошкемын. Асьсэлэн пельпумъёссы вылын вӧжо пиослы секыт пиосмурт ужъёсты быдэсъяно луиз.

Тусын Дангыр чик но синмаськымон ӧвӧл. Кукъёсыз — зэмос сӥес, йырыз — мушко быдӟа. Йырысьтыз лёгъёсыз — "Бетколэн мыжыкъёсыз быдӟаесь". Нош сямын но визьмын солэсь умой адямиез уд шедьты. Гондыр кадь кужмо, кышкасьтэм, ас малпанъёсызлэсь уз куштӥськы. Семьяязы соос атайзылэсь рекрутысь ыстэм гожтэтсэ синчеберез кадь утё. Дангыр дышетскымтэ адями, лыдӟиськыны уг быгаты. Но со улэ одӥг малпанэн: лыдӟиськыны дышетскыса, гожтэтэз ачиз лыдӟоз. Со понна ик инмарлы оскисьтэм, вӧсяськисьтэм егит пи дышетскыны лыктэ церковно­приходской школае. Но со понна чукиндыриськоно луэ. Дышетӥсьёсыз — дьякон но Илларион поп, пиосты ужатыны но соос шоры мыжыкъёсынызы урдскылыны сяна, номыр рос-прос ӧз быгатылэ ке но, Дангыр дышетсконзэ пырпотӥз, лыдӟиськыны дышиз.

Чебершур гуртын Дангыр нырысьсэ ачиз ӝутэ ӟучъёслэн кадь гур, пуктэ паськытэсь укноосын выль корка, гуртын нырысьсэ картофка мерттыны кутске. Озьы Кедра Митрей валтӥсь героез пыр возьматэ могын сылӥсь удмурт гуртын выль пушъетъёсты.

Дангырез, окружной чиновник вылэ урдскылэмез понна, пытсэтэ келяло. Эксэен тупатэм указлы пумит огназ ӝутскем егит пи, авторлэн малпамезъя, отӥяз революционерозь будыны кулэ вал. Но та рукописьлы лыдӟисьёс кие вуыны ӧз кылды. 1939 арын огыр-бугыр вакытэ Кедра Мит­рей репрессия улэ сюре. Озьы рукопись но чиптэм-чаптэм луэ.

Романын одӥгез сайкыт суред луэ кык яратӥсь сюлэмъёслэн, Дангырлэн но Дыдыклэн кусыпъёссы. Дыдыкен пересь Эбга кыкназы улыны кылизы Дангырлэн корказ. Со пытсэтэ ке но сюриз, яратоно Дыдыкез уг тышкаськы, уг курла. Егит ныл оске: гажанэзлы берытскыны ӧз ке но кыл­ды, кылёз соослэн нунызы. Бубиз кадь ик кужмо но кышкасьтэм луоз. Кин сое атайтэк кельтӥз — солы одно ик пунэмзэ берыктоз.