Алнаш ёросысь удмурт кылъя но литературая дышетисьёслэн сайтсы

Покчиарня, 26.11.2020, 19:06
"Яркыт кизили", Г. Красильниковлэн "Тонэн кылисько" повестезъя рефератысь чуръёс, Орехов А., Варзи-Ятчи школа
Ти пыриды Гость нимын | Туркым "Гости"Шуиськом ӟечбуресь! Гость
Валтись бам | Мынам баме | Регистрация | Потон| Пырон | RSS




Ӟучсэ кылэз дышетытэк, шуггес луэ йыг-йыг вамышъяны. Нош аслэсьтыд кылдэ яратытэк, мукет кылэз уд дышы гажаны!  (Д. Яшин)

Алнаш ёросысь удмурт кылъя но литературая дышетӥсьёслэн сайтсы

Ӟечбуресь! Ми шумпотыса пумитаськом тӥледыз сайтамы!

Александр Орехов, Варзи-Ятчи школа

 

Яркыт кизили

Г. Красильниковлэн "Тонэн кылисько" повестезъя рефератысь чуръёс

 

Удмурт литературалэн котькуд вакытаз вал аслаз яркыт кизилиосыз. Сыӵе кизилиос пӧлы ик пыре Геннадий Красильников. Анай кылыныз гожтэм чеберлыко произведениоссэ ачиз ӟуч кылэ берыктыса, со шӧдӥськымон паськытатӥз удмурт литературалэсь ӧрзэ, сое быдэс странаысь но кунгож сьӧрысь калыкъёслы адӟиськымон кариз. Асьме калыклэсь сюлэм дуннезэ усьтыса, советской литературалэсь турлы буёлъёсын чебермам ковёрзэ удмурт пужыосын узырмытӥз.

Литератураын котькыӵе амалэн гожтэм произведенное кулэ. Одӥгез лыдӟись, шуом, яратэ детективез, мукетызлы ярало инкуазь сярысь лири­ческой мылкыдын гожтэмъёсыз. Мыным тужгес но кельшо удмурт писательёслэн гурт улон сярысь повестьёссы но романъёссы. Тужгес ик Геннадий Красильниковлэн. Солэсь произведениоссэ лыдӟыку, шӧдӥськод, макем мур пыре со адямилэн пушдуннеяз. Басьтом, кылсярысь, "Тонэн кылисько" повестьсэ. Татын дунне возьматэмын егит пилэн Алёша Курбатовлэн синмыныз, солэн кылэмез-адӟемез, сюлмаськонъёсыз, малпаськонъёсыз пыр. Егит пи али гинэ кутскиз улонысь аслэсьтыз интызэ ӝот-ӝот утчаны. Капчи уж вылымтэ со. Сое мон ас вылам но шӧдӥсько. Трос шуг-секытъёсын пумиськылоно луэ Алёшалы. Улонын интыдэ шедьтон... Котькудӥзлэн та ласянь аслаз малпанъёсыз. Кызьы улыны кулэ? Ма понна? Та юанъёс пӧртэм ласянь ӝутӥсько повестьысь геройёс азе но. Соос ик шорсюлэм луыса огазеяло, ваче бинё произведениын возьматэм вань улон суредъёсты.

Дыр ортчемъя, Красильниковлэн книгаосаз ӝутэм куд-ог ужпумъёс вужмо, писательлэн аслаз геройёсызлы сётэм куд-ог дунъетъёсыныз но соглаш уд луиськы ни. Но книгаен люкиськем уг поты: отын адӟиське вакыт, со дыре улӥсь адямиос, соослэн сямъёссы. Соослы оскиськод. Повестез лыдӟыку малпаськод, Алёша Курбатов кадь адямиос вал шуыса. Повестьын зэмос улон возьматэмын.

60-тӥ — 80-тӥ аръёс гурт понна секытэсь вал. Романтик мылкыдо адя­миос пӧлысь тросэз ӧз быгатэ ас малпанъёссэс быдэстыны. Ваньзэ сое адӟиськом, Курбатов сярысь лыдӟыса. Захаровлэсь трос дэмланъёссэ со пеляз понэ ке но, солэн самой бадӟым дышетӥсез гурт калык луэ. Гурт калыклы матэ кариськемъяз ик со шӧдэ: татын ваньмыз ик огшоры но капчи ӧвӧл. Алёша малпаське вал колхозысь пегӟыны, лётчике дышетскыны. Татын писатель геройзэ инмысь музэ лэзе кадь. Конкурс пыр потытэк, солы гуртаз берытсконо луэ. Озьы со: шуд киосы ачиз уг лыкты. Тросэз потэ ачид бордысь. Кыӵе тон адями, кыӵе инъетэн ёзназы тонэ анай-атаед, школа?

Геннадий Красильниковлэн творчествояз бадӟым инты басьто пӧртэм психологической детальёс пыр геройёсызлэсь мылкыдзэс возьматон. Со улонысь шедьтэ сыӵе тодметеэ, кудӥз пыр яркыт суред кылдэ. Тани Алёшалэн атаез но агаез куспазы верасько: кытчы кариськоно Сергейлы, колхозэ-а яке палэнэ-а шонтоно? Пуконлэн ӟукыртэмез но асьмелы вера ни атайзылэн секыт малпанъёсыз сярысь. Та деталь пыр ик возьматэ Алёшалэсь саклыко луэмзэ но: атаезлэсь мылкыдзэ со пукон ӟукыртэмъя ик вала ни.

Г. Д. Красильников геройёссэ суредан куспаз трос мукет ужпумъёс сярысь но вера. Тани Курбатов эшеныз вокзалын пуко но адӟо, кызьы губырскем песятай гольтрес егит пиослы вазиське: "Белет надо бы. От­куда брать надо?" Нош егит пиос исало сое: "Бере кылид, папаша, поездэд кемалась кошкиз!.. Ӧвӧл, ӧвӧл, поездэд ӵуказе вуоз. Мын бертыса изь на, гур вылад шунтӥськы, пень пӧлысь кӧжы бича, ха-ха!" Татын пересез огшоры ултӥям гинэ ӧвӧл со. Мӧйы адямиез ултӥяло удмурт акцентэз понна но: озьы писатель вера, улонын мукет калыкъёсты ултӥян учыръёс но вань на шуыса. Красильников, вань произведениосаз сямен ик, таяз но ас вордскем шаердэ, гурт калыктэ, эшъёстэ яратыны дышетэ, сое ялан умойгес карон понна тыршыны ӧте. Дышетэ яратыны удмурт кылмес, со пыр ик — огъя улонмес.

 

Вход на сайт

Поиск

Календарь

«  Шуркынмон 2020  »
ВордПукВирПокУдмКӧсАрн
      1
2345678
9101112131415
16171819202122
23242526272829
30

Статистика


Онлайн всего: 1
Куноос 1
Пользователей: 0
Copyright MyCorp © 2020 | Бесплатный конструктор сайтов - uCoz