Алнаш ёросысь удмурт кылъя но литературая дышетисьёслэн сайтсы

Покчиарня, 26.11.2020, 18:32
Нянь ке вань, мылкыд но ӟеч, няньлы сӥзем ужрадлы сценарий
Ти пыриды Гость нимын | Туркым "Гости"Шуиськом ӟечбуресь! Гость
Валтись бам | Мынам баме | Регистрация | Потон| Пырон | RSS




Ӟучсэ кылэз дышетытэк, шуггес луэ йыг-йыг вамышъяны. Нош аслэсьтыд кылдэ яратытэк, мукет кылэз уд дышы гажаны!  (Д. Яшин)

Алнаш ёросысь удмурт кылъя но литературая дышетӥсьёслэн сайтсы

Ӟечбуресь! Ми шумпотыса пумитаськом тӥледыз сайтамы!

Пчельникова Т. А.

Нянь ке вань, мылкыд но ӟеч

Няньлы сӥзем ужрадлы сценарий

 

Сцена шорын ик жӧк, тӧдьы ӵушкон вылэ нянь колды интыямын. Ӝӧккышет борды гожтэмын: «Нянь ке вань, мылкыд но ӟеч».

Ужрадэз нуись ныл но пи пото.

Ныл. Нянь... Кыӵе тодмо небыт кыл! Нуналаз кӧня пол меда вераськомы та кылэз? Нянь сукыри, нянь шорем, ю-нянь... Вераськом, но ум малпаське, мар со нянь.

Пи. Одӥгез шуоз: «Нянь — со сиён, нуналлы быдэ сиён». Мукетыз вералоз: «Нянь – со байлык, узырлык. Няньлэсь котьма потэ, нянед ке вань, вӧйыд но луоз».

 

Ныл. Куиньметӥез будэтоз: «Нянь - со улон». Котькудӥз шонер. Зэмзэ но, няньтэк улон ӧвӧл.

Пи. Нянь шӧмез котькин тодэ –

Музъемлэсь басьтэм со корелзэ.

Бусыын гинэ ужась шӧдэ

Выль вуэм тысьлэсь секталазэ.

Ныл. Калык зарни шуэ нянез,

Но котькудӥз тодэ:

Зарни со – мальдытэ гинэ,

Нош нянь кужым сётэ.

Пи. Котькуд мӧйы муртлэн улоназ нянен герӟаськем учыръёсыз шедёзы: няньтэм аръёсы куректон-курадӟонъёс, бусыысь шеп бичамъёс, нянь шоремлы вожъяськонъёс но выль вуэм няньлы шумпотонъёс.

Ныл. Ялан тыршыса вылысь но ужась муртлы нуналлы быдэ огшоры ӟег нянь но ӧз сюрылы. Пызьзэс кемалыгес мед тырмоз шуыса, пӧлаз изэм писпу сул, сьӧд пот ватсаллязы. Сыӵе нянь ыль но секыт луэ вал.

 

Нянь

(сценка)

Гур котырын нылкышно берга, вӧзаз – пиез.

Мики. Анай, маар сиёнмы вань? (Ӝож мылкыдын анаез борды ӝиптӥське.)

Анай. Уг тодӥськы, пие, крахмал табань пыжо шуисько вал, но кылем крахмалмес толон кисаль шуккыса ӟузьылӥмы.

Мики. Мынам нянь сиеме потэ. Пичи-и-и гинэ коть…

Анай. Тани ӵуказе я ӵуказе улыса, выль нянь люкылозы. Аслад но кӧня ке трудоденед вань ини, няньмы ӧжыт ик уз луы, дыр. (Пиез озьы ик ӝож мылкыдын кошке). Эх, ку меда пумыз вуоз та войналэн? Сиёнэн кӧттырем интые, гучыкен-гучыкендыльдыез ньылоно. Сием потэ… (Мур лулӟе, синвузэ ӵушылэ).

Мики. (бызьыса пыре, кеське). Анай, анай, Микаль агай пызь люкыло шуиз. Туннэ ик, пе!

Анай. (тусыз воштӥське, пальпотэ). Осто, тау, Инмаре. Чылкак пайми ни вал, маин кӧтэз туннэзэ алданы. Коть одӥг-кык нуналлы ке но сиёнмы луоз (кошке).

Мики. Нянь… Кыӵе со ческыт. Мон сое пичиен гинэ сиё, кемалы мед тырмоз. Одӥг шоремзэ ик кӧня ке нуналлы тырмыто.

(Шокпотыса Витя пыре).

Витя. Мики! Пызь сётъяло! Микаль агай мешокен лыктыны косӥз!

Мики. Анай мыниз ини. Ӝоген бертоз, нянь котоз.

Витя. (йӧн-йӧн кариськыса). Мики, ойдо кылмес сётом. Войнаын солдатъёс номылэсь но уг кышкало, котьмае чидало. Асьмеос но чиданы тыршом. Нянь пыжизы ке, сое ту-у-уж пичиен сиёмы.

Мики. Мон но озьы ик малпасько. (Анаез пыре.)

Анай. Тани, пие, нянь котомы. Уйин ке но пыжыны вуоз, дыр.

Витя. Мон но берто ни, кӧня басьтэмзэс учко (кошке).

Анай (нянь котэ). Эх, корка ик югыт луиз кадь та нянь зынлэсь (зынъя).

Мики (зынъя). Ой, кыӵе ческыт зын! Ву юо, нянь зынэз зынъяло но кӧты тыроз. (Вузэ ӟузе, котэм нянез зынъя.) Мон туннэ шудыны но уг поты ни, вазьгес изьыны выдо, нош султӥ ке, нянь пыжемын луоз.

Анай. Изь, пие, изь. Изьыку дыр чаляк ортче.

(Пиез кошке, кырӟа.)

Кайгуэз ваньмыз уг тоды,

Кинлы ке шудбур гинэ.

Куректон лябез вала ке,

Уг ни кельты нокинэ.

 

Нянь ачиз гурын уг пыжы,

Со бордын вырем кулэ.

Кинлэн кӧтыз тыр, уз тоды,

Макем ӝож сием потэм.

(Няньзэ гурысь поттэ, вешаса кадь чабкылэ но тӧдьы ӵушкон вылэ понэ.)

Мики.. Анай, нянь пыжиз ни-а? Изьыку но ческыт зын маза уг сёты.

Анай. Тани, пие, си (векчи шорыса сётэ).

Мики (няньзэ пичи гинэ тӥялтыса). Мон туннэ табыдӟа гинэ сиё (сие). Валаса но ӧй вутты кадь. Ӵок ини, туннэ быдэс шоремзэ сиё, нош ӵуказе со понна чик уг ни, кӧня ке улыса гинэ сиё на. (Няненыз потыса кошке.)

Анай (пиез бӧрсьы учкыса мур лулӟе). Эх, пие, пие. Тыроз на шат сютэм улэм кӧт пичи гинэ юдэсэн. Тани, атаед бертӥз ке, ваньмыз умой луоз. Соку кӧня сиеммы потэ, сомында ик нянь сиёмы.

(Няньзэ ӵушконэныз бинялтэ, пичи гинэ тӥялтыса, ачиз но веръя. Кошке.)

 

Пото ужрадэз нуисьёс.

Ныл. Тӥни сыӵе со нянь. Кин но ку нырысетӥзэ нянь пыжыны дышем, вераны нокин уз тоды ни, туж кемалась вал со. Куать сюрс ар талэсь азьло, шуо.

Пи. Туннэ тодмо ни, пыжем нянез дуннелы Египетын улӥсьёс, пе, кузьмаллям. Нырысь юмал нянь гинэ пыжылӥллям, бӧрысь чырсатыса пыжыны дышиллям. Вашкала адямиос ваньмызлы дышетскизы ас уженызы, визьмынызы, улонэнызы.

Ныл. Археологъёслэн ужъёссыя тодмо, асьме палъёсын музъем ужез ог куинь сюрс ар ӵоже валало ни шуыса.

Пи. Нянез, туж сӥлы карыса, шундыен оградэ пуктылӥллям. Соин но, лэся, верамзэс оскымон карон понна «шунды понна», «нянь понна» яке «шунды, нянь понна» шуылӥзы.

Ныл. Нянез сӥлы каремзы та бордысь но адӟиське: сукыриез ӝӧк вылэ каллен пононо, котырес палыныз уллань тырыны уг яра. Нянь су­кыриез, паллян киынызы гадь бордазы ӝиптыса, бур киын шорылӥзы.

Пи. Нош мар сярысь вера меда таиз шудон? («Нянь колды» шудонэз пичи классъёсын дышетскисьёс возьмато.)

Ныл. Та шудонэз удмуртъёс но, ӟучъёс но тодо.

Пи. Малы нянез зарни шуылӥзы? Зарни — дуно маке, нянь но адями понна туж дуно. Учконо ке, зарнилэсь трослы дуногес.

Ныл.

Мар зарни?! Ичи солэн кужмыз –

Ӝӧк вылэ уд пукты зарниез.

Со инты утча пеймыт муын —

Вожъяськись, урод, кас сюлэмын.

Бусыын ӝутске зэмос зарни,

Шундыен, толэн со кыдамын,

Адями киын мусоямын,

Пӧсь сюлэменыз зарниямын.

Пи. Нянь ӝӧк вылэ вуытозь, кидыс дасяно, гыроно-кизёно, уроно, арано, куасьтоно, кутсано, тӧлоно, изыса пызь кароно. Быгатӥсь мурт
пызьлэсь мар мылыз потэ, со ик пӧралоз. Вералэ
али пызьлэсь дасям удмурт сиёнъёсты.

(Учкисьёс верало удмурт пӧрамъёсты.)

Ныл. Туннэ асьмеос пӧртэм ческыт сиёнъёс басьтыны быгатӥськомы, нош азьло дыръя пичиослэн самой яратоно сиёнзы шекера вал. Нош кин уг тоды, ма со шекера, вералозы милям туала рэп кырӟасьёсмы.

Шекера рэп

Ми туала шекера сиисьёс.

Марлы кулэ со «Марсъёс», «Сникерсъёс»?

Юнме шуо шат, сыӵе сиёнын

Трос тодмотэм ватсэтъёс тыремын-

 

Кин та вакыт но уг тод вералом,

Ваньдэс туннэ пӧрамы дышетом:

Пызь кык-куинь сузь, нӧкы вӧй, курегпуз,

Ныркы но юд ыльняньдэ кампет тус.

 

Весь чай уд ю — самовар вужмемын.

Ву со пушкысь вияса быремын.

Тон шекера ӝӧк вылад пукты сэзь —

Со кужымзэ басьтэмын пӧсь гурлэсь.

 

Та сиёнэз тодозы дуннеын,

Мар со «Макдональдс»? Ини вужмемын.

Ми «Шекера» ресторан усьтомы,

Удмурт пӧрамез вылӥе ӝутомы!

Т. Пчельникова

 

Пи. Ас быгатонъёссэ калык нянь будэто­нын но сое пыжонын возьматылӥз. Удалтэм нянь — умой мылкыд, соин ик кышномурт котьку сюлмаськылӥз, нянез пӧрмоз-а шуыса. Нянез гурысь поттыны но эсэпсэ валано. Часъёс ӧвӧл дыръя, сое ӵемысь укно нюламъя чаклаллязы: гурез пытсам бере нюлам укно пиялаосысь вуэз ӧръяськыса васькыны кутске ке, нянь пыжемын.

Ныл. Мукет амал но вылэм. Нянез гуре тырем бере пичи ыльнянь комокез кружкаен вуэ поно но муръё пельпуме лыкто. Ыльнянь нырысь вые. Ӝутскиз ке, нянед пыжемын, пе.  

Пи. Нянь сярысь котькуд калыклэн трос визькылъёс вань. Удмуртъёслэн но соос трос гинэ.

Нянь шуба ӧвӧл ке но, шунтэ.

Кулэ дыръяз нянь пырыен но кӧт тыре.

Нянь бордысь ваньбур потэ.

Нянь улон кадь ик дуно.

Мултэс няньлы инты сюроз.

Ныл. Нянез вылӥ дунъяменызы ик, пӧртэм сям-йылоъёс ортчытонын но сое кутылӥзы. Лушкаськись муртлы но ӧй лушка шуыкуз, пурт йылын нянь сётылӥзы, «ӧй лушка» шуыса пӧяз ке, солэн киосыз куасьмозы но лушкаськемез одно куке но шараяськоз шуыса.

Пи. Калыклэн кылан-буранэз, пӧртэм мылкыдыз, сям-йылолъёсыз уноез нянен, сое дунъянэн герӟаськемын. Ӵем дыръя нянь - ӟечезлэн, умоезлэн тодметэз. Умой адямиез но ӟег нянь кадь шуо. Ваньмыз улонамы умой луоз, ӝӧк вылын луиз ке нянь. (Кырӟан. КылъёсызТ. Пчельниковалэн, крезьгурез В. Адаковлэн.)

Нянь

Мед удалтоз юмы,

Бусьтыр луоз няньмы.

Озьы бере, тыро

Улом, шудо-буро.

 

Припев:

Няньтэк улон кулэс,

Ӝӧкмы но кадь бушгес.

Инмысь шунды тусо,

Со ваньмылы мусо.

 

Зорен со миськемын,

Музэн эркиямын.

Шунды сиос шуныт

Дыраз кисьто тырмыт.

 

Кузё кадь ӝӧк сьӧрын

Тӧдьы ӵушкон вылын.

Ческыт зыныз вӧлме

Вуж коркае выльме.

Ныл. Ужрадмес йылпумъяса, ваньдылы сӥзиськомы ӟег нянь кадь ӟеч сямо луыны, кеносады котьку мед луоз пызьды, ӝӧк вылады — нянь сукыриды. Ноку медаз усьы няньлэн данэз.

 

Вход на сайт

Поиск

Календарь

«  Шуркынмон 2020  »
ВордПукВирПокУдмКӧсАрн
      1
2345678
9101112131415
16171819202122
23242526272829
30

Статистика


Онлайн всего: 1
Куноос 1
Пользователей: 0
Copyright MyCorp © 2020 | Бесплатный конструктор сайтов - uCoz