Ӟучсэ кылэз дышетытэк, шуггес луэ йыг-йыг вамышъяны. Нош аслэсьтыд кылдэ яратытэк, мукет кылэз уд дышы гажаны!  (Д. Яшин)

 Кадрова Е. Л.

Шудпуйы

Та шудон пыр дышетскись пиналъёс азьын пӧртэм ужпумъёсты ӝутыны луэ. Шудон мыныку ик, нылпиослэсь удмурт кылъя но литературая тодон-валанъёссэс ӟечгес эскероно; удмурт культураез но искусствоез тодэмзэс чаклано; вордскем шаерзэс, улосэз тодыны турттон мылкыдзэс ӝутоно.

Шудон кутскемлэсь азьло ик классын чузъясько удмурт крезьгуръёс. Ӝӧкъёс кулэезъя пуктылэмын. Шудэ кык команда — быдэн вить адямиен, мукетъёсыз — "висисьёс". Вань жюри (отчы пыро лыктэм куноос пӧлысь 2—3 мурт).

Командаослы доразы уж сётэмын вал ним малпаны но данзэс утён сярысь малпаськыны.

Нырысь ик командаос ог-огзэс ӟечкылало, азинсконъёс сӥзё но шудонэз мыто. Со сизьым люкетлэсь луоз.

1         люкет

Карточка вылын 6 юанъёс гожтэмын, котькудӥзлэн аслаз номерез. Командаос быдэн куинь номер верало, соосъя шудонэз нуись юанъёсты лыдӟе. Пиналъёс валэктон сётыны кулэ.

2         люкет

Огез команда мукетызлы доразы дасям быдэн кык юанъёссэ сётъя.

3         люкет

Капитанъёслэн конкурссы:

1)        капитанъёс басьто кык карточка: огаз гожтэмын "табань", мукетаз—"перепеч". Верано, кызьы пӧрано та сиёнъёсты.

2)1 капитанлы юан: верано "Сюмъё но Падыш" баснялэсь авторзэ?

3)2 капитанлы юан: "Эктытӥсь пастух" пьеса-выжыкыллэн авторез?

4)тодоно мадиськонъёсты.                

5)капитан: бусыосыз — пияла, межаосыз — пу.

6)капитан: тӧдьы скал сьӧры сьӧдэз лыктэ.

4 люкет

Кулэ карандашъёс, ручкаос, бумага.

"Кинлэн тросгес но шонергес?" шудон. 2-3 минутскын командаос гожтыны кулэ сётэм карточкаосысь юанъёслы валэктонъёс.

Огдыре ик, командаос асьсэ понна ужаку ортче "висисьёсын" шудон.

Доска вылэ лякылэм "р", "г", "у", "и", "к", "б", "д", "о", "ы", "ш" букваослэсь кин кузыес кыл малпаны быгатоз?

(Вормисьлы — ческыт салам).

Нош карточкаосын ужасьёс, со куспын ужзэс йылпумъяса, жюрилы эскерыны сёто.

Шудон азьланьтӥське.

Тодоно "ы" букваен дугдӥсь турын-куаръёсты

1         команда: Шур дурын, нюр вылъёсын

Будӥсько мон люкъёсын.

Чакласькы: куаре лэчыт,

Вӧсь луоз, ява, киыд.

2         команда: Киостэ но, пыдъёстэ но

Бышкало вӧсь луымон.

Кышкаськод ке, палэнскы.

Монэным эн эшъяськы.

Кыкезлы ик командаослы юан: кин тросгес вераны быгатоз удмурт кырӟанъёсын пумиськылӥсь сяська нимъёсты?

5 люкет

Тодоно, кыӵе выжыкылъёсысь та чуръёс?

1         команда.

а)        "Петыр чоз-чоз кариськем но вамыштэм.  Эксэй шумпотыса, киоссэ посэ, пе: я, табере тон Алангасар ки улысь луло уд поты ни!"

б)        "Гырисез азвесь кадь чильк-вальк кисьтаськись луэм, лавкаысез сыномем, шуш луэм".

2         команда.

а)        "Юаса-юаса, йӧнзэ ӧз шедьтэ, пе. Крестьян тодэ вылэм, суд поп пала луоз шуыса. Соин ик со судлы кык пӧртэм гинэ верам: "Ма бен! Шедьтэм ук..."

б)        "Шуэрскиз гондыр, малпа: мон котырам но вуиз уга. Музъем вылэ тэтчиз но ну пегӟе ук..."

6         люкет

Котькуд командалы ӝог веранъёс лыдӟоно.

1 команда. Ыж ӵӧжен ӵош шорт сэртттэм.

2 команда. Кузё кышно кыӵе куӵо кышет керттэм.

7         люкет

"Ӝог шудон" (блиц-турнир).

1         командаослы юанъёс:

1.        Кыӵе произведениын "кулон баржа" сярысь вераське? Кин авторез?

2. Кин луиз Удмуртиысь дуннеын самой устоез куасэн бызьылӥсь?

3. Вералэ Удмуртиысь художникъёсты?

4. Удмуртиысь бадӟымесь шуръёс?

5.Мадиськонъёсты тодоно:

Кор бордын така син.

Курень улошо вылэ пуксьыны уд дӥсьты.

Пеймыт коркан сипуж кертто.

Усто урысэз кутыны уд дӥсьты.

2       командаослы юанъёс:

1. Кыӵе турын-куарез 99 висёнлэсь шуо?
2. Удмуртиысь городъёс.
3. Верано гужем вакытэз возьматӥсь толэзьёслэсь удмурт нимъёссэс.
4. К. Герд, М. Коновалов, К. Митрей, А. Оки — кин та писательёс
   пӧлысь вал "Сурсву" верослэн авторез?
5. Мадиськонъёс:  

Вышкыысь вуэз омыръяло, омыръяло но уг быдто.

 Одӥгез лоба, мукетыз юэ, куинетӥез сиське.

Кыкнамылэн ниммы одӥг: огзэ нулло, мукетыз лоба

Мамык валес пуйытэм.

Шудонмылэн пумаз жюри очкоослэсь лыдзэс ивортэ.  Трос очко лю­кам команда вормисе потэ. Со — шудпуйы. Вормисьёслы – пичи гинэ кузьымъёс.

Собере шудӥсьёс но, "висисьёс" но, куноос но пиналъёслэн сьӧразы ваем ческыт пӧрамъёсынызы чай юо.