Мугъёсыз: А. Абрамовлэн суредъёсыныз тодматоно; пӧртэм предложениосы прилагательнойёсты пыртылыса, текст кылдытыны дышетоно; гожъяськон но вераськон кылзэс радъян бордын ужано.
Оборудование: А. Абрамовлэн суредъёсыныз стенд; предложениосын карточкаос; «Художникъёс» книгаосын выставка.
Эпиграф:
Вашкалазэ но толлозэ тодытэк, туннэзэ уд вала.
Котькуд калык выжыеныз кужмо.
Визькылъёс
Удмуртъёс инкуазен валче улыны быгатӥллям.
А. Абрамов
Уроклэн мынэмез.
Дышетӥсь. Туннэ асьмеос, пиналъёс, кыл волятон но радъян бордын ужалом. А. Абрамов художниклэн «Мадькыл Ӟачча» картинаеныз тодматском. «Текст» темаез тодамы ваём.
Нош али крезьгур чузъяськемъя Ӟачча кылдэм сярысь мадькылэз кылзом.
Дышетӥсь лыдӟе, кулэ ннтыяз дугдэ (уже кутӥське дугдылыса лыдӟон амал).
Варзи-Ятчи палъёсысь Ляли гурт одӥгез тужгес вашкалаез луэ, соин ик пересьёс черкогуртлэсь пӧрмемзэ Лялиен герӟало. Тани ма соос верало:
— Азьло Ляли гурт туала Кырындылэн интыяз сылэ вылэм. Нош Казанез вормыса басьтэм бере отчы бигеръёс интыяськизы, соин ик лялиос ас интыосысьтызы кошконо луизы.
Ляли нюлэсъёсын нылкышноос но пиналъёс, узы-боры но губи бичакузы, ӵемысь кыӵе ке тодмотэм адямиез адӟо вылэм. Со, пе, шӧдтэк шорысь потэ, собере ыше. Огпол пиосмуртъёс сое кутыны малпаллям. Кутӥллям, керттылӥллям но тӧрозы доры нуиллям.
Тӧро шуэм: «Кин тон луиськод но ма кариськод ми палъёсын? Малы пегаськод милесьтым?»
«Мон ачим Грак вӧзысь Вуж Ятчиысь луисько. Монэ эксэйлы служить карыны басьтӥзы вал, но мон отысь пегӟи но татчыозь пегаса ветлӥ»,— шуэм пегӟем мурт.
«Пегӟид шуиськод, умойтэм ук со! Тае вератэк уз луы, дыр, мон малпасько. Нош ма шуоз ляли калык?» — юам тӧро.
Ляли калык жаляз тодмотэм пиез, гуртаз улыны лэзиз. Озьы Вуж Ятчиысь вуэм адями лялиос пӧлын улыны кутскиз. Улӥз но ужаз бай крестьян дорын. Синмаськиз та пияш кузёезлэн Варзи нимо нылызлы. Юн яратӥзы соос ог-огзэс. Варзилэн атаезлэсь кышкало ке но вал егитъёс, ваньмызлэсь ватӥськыса кузпалъяськизы. Но ӝоген кузпалъяськемзы сярысь быдэс гуртын тодмо луиз. Туж йыркуръяськиз Варзилэн атаез: «Мон тӥледыз пыраклы уллясько ас коркасьтым. Нош али мыном шур дуре но тӥ адӟоды, кыӵе зол луэ атайлэн йыркурез!» Шур дуре вуыса, со шуиз: «Учкелэ кыкнады ик! Кызьы ке та ваез шур кыдёке нуэ, палэнтэ асьмелэсь, озьы ик ми палэнтӥськом тӥледыз. Кошкелэ шурлэн сопал ярдураз но улэ отын!»
- Жаля милемыз, атай! — бӧрдӥз Варзи.
- Кызьы мон верай, озьы ик луоз, — шуиз атаез.
Шурлэн мукет палаз ӝутскиз выль гурт. Шурез ныллэн нимыныз Варзи шуыса нимазы, нош гуртэз - Варзи-Ятчи, Ятчи — пилэн вордскем гуртэзлэн нимыз. Тӥни озьы, пересьёслэн верамзыя, кылдэм Варзи-Ятчи, яке кызьы асьмеос шуиськом —Ӟачча гурт.
Дышетӥсь. Ойлолэ эскером Александр Абрамовлэсь «Мадькыл Ӟачча» картиназэ. Тупа-а суред мадькыллэн пуштросэзлы? (Пиналъёс верало.) Табере кылзом А. Абрамов суредась сярысь веранэз.
Дышетскись. А. Н. Абрамов вордскиз 1954-тӥ арын Варзи-Ятчи черкогуртын. 1969—1973-тӥ аръёсы Дэбес педучилищелэн художественно-графической ёзаз дышетскиз. 1975-тӥ арын УдГУ-ысь художественно-графической факультетэз йылпумъяз. 1980-тӥ арын дышетсконзэ Уфаысь искусствоосъя кун институтын азинтӥз. 1982-тӥ арысен Удмурт йӧскалык кун театрын художник-постановщик луыса ужаз. Пӧртэм спектакльёслы декорациос дасяз.
Дышетӥсь. Туннэ «Мадькыл Ӟачча» картиная сочинение гожтыны дасяськом, нош сочинение — со текст. Кыӵе типъем текстьёсты тодӥськоды?
Доска вылэ одӥг дышетскись кластер лэсьтэ, вакчияк валэктэ:
- Мае шуо текст? Озьыен, тӥляд ужды кыӵе типъем текст луоз?
Ужалом группаосын: 1-тӥ группа егит ныл но пи сярысь гожъя, кыӵеесь соос, таӵе кылтэчетъёсты уже кутэ: ӝужыт мугоро, таза сӥльвиро, чебер ымныро, сайкыт синмо, кышкасьтэм пи.
2-тӥ группа инкуазь сярысь гожъя: вож бадьпу, ӵуж-зарни италмас, ӟарыт-вож турын, тӧло куазь, бадӟым, пересь бадьпу.
Дышетӥсь. Сочиненимес шонер радъян понна ӵош план гожтом:
- Кыӵе вакыт возьматэмын cypeдын?
- Кин нырысь ик син шоры йӧтэ?
- Кыӵе тусбуё возьматэмын егит пи но ныл?
- Кызьы соос дӥсяськемын?
- Малы меда куазь сокем тӧло?
- Картинаын кыӵе инты басьтэ пересь бадьпу? Малы одно ик сое художник возьматэм?
- Кыӵе буёлъёс уже кутэмын?
- Кыӵе мылкыд кельтэ картина?
- Ма вераны тыршем та суредэныз художник? Сётэм планъя чебересь предложениос гожтэ, уже кутыны тырше прилагательнойёсты, пӧртэм
однородной членъёсты.
Схемаос люкылэмын нылпиослы:
-О, О, О. -[1], нош[2].
-О но О. - [1 ] но, [2].
1-тӥ группа описание элементъёсын сочинение-повествование гожтэ, сое гуртлэн туннэ нуналэныз герӟа.
- Тани кыӵе кужмо адямиосыз возьматэм художник. Али таӵе батыр, ужен дано адямиосмы вань на меда гуртамы? (Нылпиос верало нянь будэтӥсьёс, пуло вордӥсьёс, дышетӥсьёс сярысь.)
2-тӥ группа тросгес саклык висъя описанилы, картиналэн чеберезлы.
Дорысь уж. Сочинениез быдэстоно. Люкылӥсько дунъян карточкаос (соосты доразы быдэстозы).
Дунъян карточка:
+ Выльзэ тодӥ | - Мукет сямен малпасько | V Тодӥсько вал ини | ? Юанэ вань |
| | | |
Йылпумъян. Котькуд калык выжыеныз кужмо. Асьмеос адӟим, кыӵе чебер но кужмо адямиос гуртмес кылдытӥллям. Паймымон гуртмылэн историез, паймымон туннэ нуналэз. Со данэз асьмелы котьку вылэтӥ нуоно.
