Ужпумъёс: азьвыл басьтэм тодон-валанзэс муромытоно, глаголъёслэсь улонамы кутӥськемзэс эскероно, вераськон кылзэс волятон бордын ужано.
Кутэм тӥрлык: компьютер, «Глагол» темая карточкаос, проектъёс, кроссворд, эскероно темая презентация.
Уроклэн мынэмез.
Ӧтён (Вызов).
Дышетӥсь. Пиналъёс, туннэ урокмес мынам кутскеме потэ та кылбурысен:
Ерпечка ке, ерпечка ни,
Ма гинэ уг кары со:
Я пуксе, султэ, лэйка,
Мукетсэ но лэйкатэ.
Черекъя, учке, адӟе,
Бызьылэ, тэтча, усе,
Нискылтэ, ваське, шона,
Дырекъя, кынме, шуна,
Лаптӥське, вера, адӟе,
Малпаське, жаде, изе,
Я тубе со, я ваське,
Пайме, юрттэ, вераське,
Миськылэ, котме, вае,
Люкылэ, ватса, вые,
Чабе, тышка, кышкатэ,
Я бӧрдэ, я серектэ...
Морфологи Элькунысь,
Пӧртэм кыло шаерысь
Та пичи ерпечкамы.
Со юа: «Кызьы нимы ?»
- Кин бен со сыӵе? (Глагол.)
- Зэмзэ но, туннэ асьме доры куное лыктӥз Глагол. Озьыен, урокмы ӵоже тодамы ваёмы та вераськон люкет сярысь, учкомы проекттэс, ужаломы кылмес волятон бордын. Али группаосады лэсьтэлэ кластер, кытын возьматоды ваньзэ, мар тодӥськоды глагол сярысь.
(Лэсьтэм беразы котькуд группа вера, мар гожъязы, дышетӥсь доска вылэ кластер лэсьтэ.)
Ужез радъян.
Дорады тӥ «Глаголлэн улонамы кутӥськемез» проект бордын ужады. Ойдолэ эскером, маар пӧрмем.
Проектсэс лэсьтон понна пиналъёс эскеризы:
- 6-тӥ но 7-тӥ классъёслы удмурт литературая учебникысь произведение нимъёсын глаголлэсь кутӥськемзэ;
- урокъёсын кутӥськись глаголъёсты;
- сиён-юон но мукет вуз нимъёсын кутӥськись глаголъёсты (ӟуч кылысь берыктыса);
- телевизор пыр рекламаосын ӵемгес чузъяськись глаголъёсты.
Котькуд группа эскерон ужъёссыя йылпумъян лэсьтэ.
6-тӥ но 7-тӥ классъёслы литературая учебникъёсысь произведение нимъёсын глаголъёс:
- «Улэм потэ» — П. Блинов:
- «Бектыш нюлэс буйга» — П. Чернов;
- «Оскы, Родина!» — Ф. Кедров;
- «Бусъёсын шобырскизы» — А. Лужанин;
- «Шакырес луэ сюрес» — Г. Верещагин;
- «Ӟильыр-ӟильыр шур бызе» — Кузебай Герд;
- «Меми, малы-о киосыд сюрмылэмын?» — Ф. Васильев.
Вывод. Произведение нимъёсын глаголъёс ӵем кутӥсько. Сыӵе нимъёс произведенилэсь пуштроссэ яркытгес усьто.
Рекламаосын кутӥськись глаголъёс:
утчалэ, воштоз, егитомытоз, паймод, буяй, юрттэ, си, басьты, капчиятоз, яратод, валалод, луэ, малпаськытэ, чилялоз, утча, пукты, ю, быдтэ, чылкытатэ, дасяй, небӟытоз, ворекъялоз, будэтоз но мукет.
Вывод. Реклама — кыӵе ке вузэз дэмлан-ушъян. Рекламаосын кутӥськись глаголъёсты, нимаз группае люкыса, «ушъяськон» яке «пӧяськон» глаголъёс шуыны луоз.
Урокъёсын кутӥськись глаголъёс:
пукселэ, гожтэлэ, учком, вералэ, ӝутэ, пуксьы, гожъя, пусъе, вера, лыдӟы, юан пукты, эскериськом, таӵе малпанэ вуим, гожтӥ, чаклай.
Вывод. Урокын, огласянь, косъяськонэз возьматӥсь глаголъёс кутӥсько. Соосты дышетӥсь вера. Ивортӥсь глаголъёсын ӵемгес дышетскисьёс верасько.
Вузъёслэн нимъёссы.
Гуртамы куинь вузкарон инты. Котькудаз ик пӧртэм пумо сиён-юон вузало. Утчаса шедьтыны быгатӥмы глаголэн нимам таӵе сиёнъёсты: «Поздравляю!» («Ӟечкыласько!») шоколад но «Выбери меня» («Бырйы монэ») рулет.
Вывод: Вузъёсты ниманы ӵемгес кутӥсько существительнойёс но прилагательнойёс. Глаголэн нимам вузъёс туж ӧжыт.
Йылпумъян. Глаголъёслэсь улонамы кутӥськемзэс эскерыса, ми валамы. макем бадӟым инты басьтэ та вераськон люкет. Соос пӧртэм муген, пӧртэм сямен ке но кутӥсько, котьку ик вераммес валамон карыны юртто. Син азе шуг пуктыны адямиез, кудӥз глаголъёстэк вераське. Та вераськон люкеттэк со серемес но котырысь адямиослы валантэм луоз.
Ми сюбег удысэз гинэ эскерыса но валамы: глагол юрттэ ог-огдэ валаны, мылкыдэз шараяны, вераськон кылмес узырмытыны. Озьыен, глагол — валтӥсь вераськон люкет. Со мугорлы йыр кадь, семьялы анай-атай кадь, юртлы йыг-йыг инъет кадь.
Группаосын карточкаосъя ужан. Предложениосысь грамматической инъетсэ шедьто но верало, предложенилэн кыӵе членэз луэ глагол.
1-тӥ карточка
Мур лымыен шобырскем нюлэс куш дурысь канава уг адскы. Отын, сӥзьыл усем куаръёс улын, бакаос толъё. Доразы ик, сисьмем лӥял улын, самой кышкыт тушмонзы — ӵушъял кӧлэ. Ог-огзэс соос уг адӟо, уг шӧдо. Озьы ик изё кенӟалиос.
2-тӥ карточка
Ми туннэ дышетским. Пиналъёс доразы бер гинэ бертӥзы. Соос етӥн бусыын ужазы. Пӧлазы бускель гуртысь Санька но вал. Милям со огназ гуртэ дышетскыны ветлэ. Кылем арын соин ӵош Педот Ванька но ветлӥз, нош туэ кытчы ке мукет интые улыны кошкизы соос.
3-тӥ карточка
Быдэс возь турлы сяськаосын ворекъя. Пӧлазы уката ик пишто ӵуж купанчаос. Соос веттасько тӧл шорын. Тани куарез вылэ пуксиз муш. Со утчаське, чечы зынэз шӧдэ, лэся. Мон учкисько солэсь выремзэ. Муше шӧдӥз, мукет сяська вылэ пуксиз.
— Мар вераны быгатоды та глаголъёс сярысь ветлӥ, ужад, усиз, адӟимы, валады, шудӥзы.
(Пиналъёс вераны кулэ, глагол 1-тӥ, 2-тӥ. 3-тӥ лицоын, одӥг но трос лыдын луэ шуыса.)
— Тӥ азьын кроссворд. Котькуд группалы сётэмын предложениосын карточкаос. Кельтэм глаголъёссэ тодоно но кроссвордэ интыяно:
Гурт пумысь кызьпу вылын
Пересь куака (ма кариз ?) каргетӥз.
Со кызьпу ултӥ ӵукна
Пичи пиос (ма каризы?) ветлӥзы.
Куддырья куака доры
Куное но (ма кариллям ?) кожаллям.
Но ӧз валалля эшсы,
Вадьсазы йӧ (ма кариз ?) пыргытӥз.
Со малпаз, вылды, тазьы:
Уд но вала, (ма карозы ?) кутозы.
Со сярысь ик, дыр, инмын
Туриос но (ма каризы?) гурлазы.
к | а | р | г | е | т | ӥ | з |
в | е | т | л | ӥ | з | ы | |
к | о | ж | а | л | л | я | м |
п | ы | р | г | ы | т | ӥ | з |
к | у | т | о | з | ы | | |
г | у | р | л | а | з | ы |
- Глаголмылэн «коркаез» вужмем. Тани таӵе куронэн со вазиське асьмелы:
Гажано пиналъёс!
Мон пичи ке но, трос аръёс улӥсько ни дунне вылын. Берло дыре удмурт кьлын гожъяськон правилоос воштӥськизы, выль кылъёс пыризы, соин ик коркае кырыжаз. Суредалэ вал мыным чебер корка, но огшоры гинэ ӧвӧл, вань тодметъёсме лыдэ басьтыса. Кельшем суредъя мон аслым выль юрт ӝутысал.
Саламен, тодмо эшты — Глагол.
—Малпасько, та куронзэ быдэстыны быгатом, дыр. Глагол сярысь вань тодэмдэс люкаса, суредалэ юрт. Асьтэ малпамъя ик, коркалэсь котькуд люкетсэ нималэ. (Группаосазы суредало, бӧрысь ужзэс доска доры потыса валэкто.)
—Нош табере, глаголъёсты кутыса, кылбуралом. Кин текстаз тросгес глаголъёсты пыртыны быгатоз меда? (Группаосын ужало.)
Рефлексия.
«Глагол» темая группаосады синквейн гожтэ
Дорысь уж. Дорады таӵе юанлы валэктон гожтэ: «Кызьы существительноез глагол кароно?
