Алнаш ёросысь удмурт кылъя но литературая дышетисьёслэн сайтсы

Покчиарня, 26.11.2020, 17:33
Морфология Элькунлэн Числительной караз, 6 класс
Ти пыриды Гость нимын | Туркым "Гости"Шуиськом ӟечбуресь! Гость
Валтись бам | Мынам баме | Регистрация | Потон| Пырон | RSS




Ӟучсэ кылэз дышетытэк, шуггес луэ йыг-йыг вамышъяны. Нош аслэсьтыд кылдэ яратытэк, мукет кылэз уд дышы гажаны!  (Д. Яшин)

Алнаш ёросысь удмурт кылъя но литературая дышетӥсьёслэн сайтсы

Ӟечбуресь! Ми шумпотыса пумитаськом тӥледыз сайтамы!

Конюхова В. В.

 

Морфология Элькунлэн Числительной караз, 6 класс

 

Мугъёс: «Числительной» темая начальной классъёсын ортчемез тодэ ваён; числительнойёсты мукет вераськон люкетъёслэсь висъяны быгатон; синтаксической функцизы сярысь валатон сётон; числительнойёслэсь пӧртэм жанръёсын кутӥськемзэс возьматон.

Уроклэн мынэмез.

Дышетӥсь. Умоесь, нылпиос! Туннэ асьмелэн тулыспаллэн дас ньылетӥ нуналыз. Классын дас куать кузя дышетскисьёс.

Учке ай, нылпиос, мон кӧня ке предложение верай. Котькудаз вань числительноез. Нош трос-а меда асьмеос соос сярысь тодӥськом?

Нылпиос тодэмзэс верало:

-   Числительной - со вераськон люкет.

-   Числительнойлэн юанэз - кӧня?

-Числительноен кутскиськом котькуд нуналмес (доска вылэ гожтӥськом числоез).

Д. Нош потэ-а числительнойёс сярысь тросгес тодэмды? Тӥледлы кык сюрес пӧлысь огзэ быръёно: 1. Выльзэ тодэме уг поты. 2. Тодэме потэ. (Нылпиос 2-тӥзэ быръё.)

 - Озьыен, туннэ асьмеос Морфология Элькун­лэн Числительной караз путешествие мыномы.

Талэсь азьвыл ми вуылӥм ни Существительной но Прилагательной каръёсы, трос выльзэ но кулэзэ адӟимы отысь. Со сярысь ми ум вунэтӥське. Озьыен, вырӟим.

Ӝог гинэ Числительной каре пырыны уг луы вылэм. Азямы — контроль-пункт.

Татын пукисьёс тӥледыз тодмазы: тӥ начальной школаын дышетскыкуды, татчы ветлӥллямды ни, журналазы гожтэмзы кылем. Соос али тӥледлы дневник сётозы.

Бортовой журнал

 

Ма тодӥсько ини

Ма тодӥ 

 

 

 

 

Паллян палаз гожтыны куро, ма тодӥськоды на ветлэмды сярысь. (Дышетскисьёс гожто чис­лительной сярысь тодэмзэс.)

Нош мукет палзэ тӥ быдэстоды урок ӵоже. Ма адӟиды-тодӥды Числительной карын, пумен гожъяно луоз.

Тӥледлы сётӥське Числительной карлэн картаез но Числительной каръя ветлон маршрут.

  Озьыен, пыриськом городэ. Нырысь ик пумиськиськом числительнойёсын.

Числительнойёсын пумиськон станция. (Ужало группаосын. Удмурт Элькунлы сӥзем текстысь числительнойёсты утчало, асьсэ понна валаны тыршо: кыӵе луо числительнойёс, кызьы соос гожтӥсько.

1 -тӥ группалы уж.

Сюрс укмыс сю кызетӥ арын кылдэ Вотской авто­номной область. Сюрс укмыс сю куамынэтӥ арын — Уд­мурт автономной область. Нош сюрс укмыс сю куамын ньылетӥ арын кылдэ Удмурт автономной республика (элькун).

Котькуд ар шуркынмонэ шаерамы улӥсь калык Удмуртилэсь вордӥськем нуналзэ пусъе. Туэ тямыстон тямыс ар тырмонзэ пусйимы.

2-тӥ группалы уж.

Элькунамы пыро куать каръёс: Ижевск, Воткинск, Глазов, Сарапул, Камбарка, Можга; кызь вить ёросъёс. Сюрс укмыс сю укмыстон тямысэтӥ арын сётэм лыдпусъёсъя республикаямы одӥг миллион сю куамын куать сюрс адями улэ.

3-тӥ группалы уж.

Удмурт Элькунлэн быдӟалаез ньыльдон ньыль сюрс квадратной километр. Уйпаласен лымшорпалозь кыстӥське кык сю укмыстон сизьым километр, нош шунды ӝужан паласен шундыпуксёнозь — кык сю километр.

Выводзэс дневниказы гожто.

Собере таӵе вывод лэсьто: числительнойёс луо количественной но порядковой, простой но со­ставной.

 

ЧИСЛИТЕЛЬНОЙ

(вераськон люкет, юанъёсыз: кӧня ? кӧняетӥ?

Количественной

1. Кӧня ? Кӧняез ? (вить, дас одӥг)

2. Ёросэз: ог дасо, ньыльдоно

3. Собирательной: витьнамы, витьнады. витьназы

4. Дробной: 2,5 — кык быдэс но вить дасмос, одӥг куиньмос

Порядковой

1.        Кӧняетӥ?

2.        20-тӥ аръёсы (кызетӥ аръёсы). 1919-тӥ арын
(сюрс укмыс сю дас укмысэтӥ арын)

Луо: простой        но составной

дас, вить, сю,  кызь вить, кызь ньыль,

кызь, сизьым   сюрс сю сизьымдон укмыс

—        Нош табере асьмеос Синтаксической стан­цие выжиськомы. Тодомы, предложенилэн кыӵе членъёсыз луыны быгато числительнойёс.

1-тӥ группалы уж.

—Дас кыклы люкиське.

—Нырысетӥез ар секыт ортчиз.

—Мон кыкетӥзэ татчы вуылӥ.

—Вить пол вить — кызь вить.

2-тӥ группалы уж.

—Кык пол кык - ньыль.

—Дасэз кыклы люкыны луэ.

—Зарезь дуре куиньметӥзэ вуи.

—Ульчаямы витетӥез корка самой чеберез.

3-тӥ группалы уж.

—Ньылез ньыльлы люкыны луэ.

—Дас пол дас — сю.

—Губияны кыкетӥзэ ветлӥм ни.

—Кыкетӥ парта сьӧрын пукыны яратӥсько.

Ужамзы бере вывод лэсьто: числительнойёс предложенилэн котькыӵе членэз луыны быгато.             

Дышетӥсь. Нош али ӧжытак шутэтском. (Возьматӥсько карточка, отын 1000000 (миллион) гожтэмын.) Тодэмды потэ-а, кызьы кылдэм миллион числительной?

XIII даурын Итали кунысь Марко Поло Китае вуылэм. Со чылкак паймем та кунлы, солэн узырлыкезлы, уно калыкезлы. Паймемзэ вераны нокыӵе кыл шедьтымтэ ни но, Италияз бертыса, миллион кыл кылдытэм. Озьыен, миллион числительной итали кылысь ӟуч кылэ пырем, нош ӟучысь удмуртэ вуэм. Тодэммес дневнике гожтӥськом.

—        Путешествимес азьланьтӥськом. Али выжиськом Кытын пумиськиськом? станцие. Татын тодомы, кытын меда числительнойёс пумисько, собере вераськомы соослэн кулэлыксы сярысь.

Мадиськонъёс.

1-тӥ группалы уж.

—Кык гур, одӥг пис. (Синъёс но ныр.)

—Буртчин бугор бордын сизьым пась. (Йыр.)

—Одӥг зарезе ньыль шуръёс бызё. (Скал кыскон.)

2-тӥ группалы уж.

—Йырыз одӥг, кышетэз сюрс полэс. (Кубиста.)

—Одӥг муртлэн чиньыез куинь гинэ. (Саник.)

—Одӥг кудыын дас куать чипыос. (Классын дас куать кузя нылпиос.)

3-тӥ группалы уж.

—Кык кӧтыз — ньыль сюрыз. (Миндэр.)

—Одӥг палыз кыр, одӥг палыз нюлэс. (Пӧзьы, колоша.)

—Ӵукна ньыль пыдын, нуназе кык пыдын, ӝытазе куинь пыдын. (Адями.)

Визькылъёс.

1-тӥ группалы уж.

—Одӥг ньӧр чиге, нош дасэз чида.

—Дас эшед луытозь, одӥг зэмос эшед мед луоз.

2-тӥ группалы уж.

—Одӥг йырез кык киос сюдо.

—Одӥг муш сю чибиньлэсь но дуно.

3-тӥ группалы уж.

—Сизьым пол мерта, одӥг пол ванды.

—Одӥг интыяз лӥял гинэ пуке.

Фразелогизмъёс.

1-тӥ группалы уж.

—Сизьым шур йылэ вуылыны.

—Сизьым пуныен но утчаса уд шедьты.

2-тӥ группалы уж.

—Кык син куспысь нырдэ ишкалтоз.

—Одӥг кырӟан кырӟаны.

3-тӥ группалы уж.

—Одӥг кыл но ӧз потты.

—Одӥг йыры, кык пыды.

Произведениосысь чуръёс.

1-тӥ группалы уж.

Кыдёкын, оло, матын.

Туж пичи удмурт гуртын

Улӥллям кык пересьёс.

Улӥллям куанер соос.

К. Герд. Гондыръёс

2-тӥ группалы уж.

Та ньыльдон вить аресме

Одӥг пол дас вить арес карысал на.

Та пурысьтам йырсиосме

Одӥг пол сьӧд чилясь карысал на.

Калык кырӟан

3-тӥ группалы уж.

Ньыль ар ӵоже мон ожмаськи,

Ӧй жаля кужымме.

Мон вормонлы гинэ оски,

Вити со нуналме.

Ф. Васильев

 

Произведениослэн нимъёссы.

1-тӥ группалы уж.

Вячеслав Сергеев. Куатетӥез сӥзьыл.

Флор Васильев. Одӥг коркась вить пиос.

Александр Блок. Двенадцать.

2- тӥ группалы уж.

—Александр Миронов. Дас тямыс.

—Куамынэтӥ аръёс (К. Гердлы сӥзем сборник).

—Александр Пушкин. Сказка о мёртвой царев­не и о семи богатырях.

3-тӥ группалы уж.

—Ашальчи Оки. Кык гожтэт.

—Куинь кызьпуос улын (веросъёсын сбор­ник).

—Александр Дюма. Три мушкетёра.

Дышетӥсь. Умой ужады, нылпиос. Тани ась­меос вуимы путешествимылэн пумаз. Но озьы гинэ потыны татысь уг луы, асьмеды выльысь возьма контроль-пункт.

—Числительной карын улӥсьёс асьсэлэсь городзэс умой возьматыны тыршизы.

—Нош али котькуд группа вералоз, ма выльзэ со басьтэм. Числительной каретӥ ветлыса. (Лыдӟо.) Со вакытэ мукет группаос асьсэлэсь дневникъёссэс эскеро, ӵошато.

—Озьыен. трос выльзэ басьтӥллямды, ныл­пиос. Дневниктылэн бур палаз гожъямды трослы бадӟымгес. Зэм но, та каре ветлэмды огшоры луымтэ. Нош кыӵе кельшиллямды тӥ та карын улӥсьёслы. Соос тӥледлы гожтэт гожтӥллям на, сое школаяды лыдӟыны куриллям.

Мусо нылпиос!

Макем тӥ визьмоесь, тыршисесь, ужаны быгатӥсесь. Малпаськомы, числительнойёс сярысь трос выльзэ тодӥды шуыса.

Зэмзэ но, асьме улонмы юн герӟаськемын лыдпусъёсын. Соосты адӟиськом газетъёсысь, журналъёсысь, кылӥськом радио пыр. Лыдпусъёс огшоры знакъёс ӧвӧл. Соос трос выльзэ но кулэзэ иворто асьмелы. Цифраос тодо, кӧня продукция сётэ нуналскын котькудӥз ужась, кӧня выль библиотекаос, театръёс, дворецъёс нылпиослы усьтэмын. Цифра «тодэ», кӧня нылпиос арлы быдэ вордӥсько но мыно школае.

Лыдпусъёс сярысь мургес но пыр-почгес тодэмды потӥз ке, ми доры эшшо лыктэ. Витиськом тӥледыз.

Дышетӥсь. Кема возьмано уз луы. Туннэ асьмеос тодматским числительнойёсын. Тодон-валанмес муромытон понна кӧня ке пол вуылоно луоз на со каре. Нош туннэ таин ужмес йылпумъялом.

Литература

1.        Васильев Ф. Ньыль ар ӵоже мон ожмаськи. Улытозям мон улонэз кырӟай. — Ижевск: Удмуртия, 1984.

2. Владыкина Т. Г. Ингур: Удмурт фольклоръя лыдӟет: Шор ёзо школаослы. - Ижевск: Удмуртия, 2004. - 352 с.

3. Никольская Г. Н., Тараканов И. В. Удмурт кыл. 6—7 классъёслы. 3 изд. — Ижевск: Удмуртия, 2005. — 264 с.

4. Шайхутдинова О. Л. Имя числительное как часть речи // Новое образование. 2006, № 3.

 

 

Вход на сайт

Поиск

Календарь

«  Шуркынмон 2020  »
ВордПукВирПокУдмКӧсАрн
      1
2345678
9101112131415
16171819202122
23242526272829
30

Статистика


Онлайн всего: 1
Куноос 1
Пользователей: 0
Copyright MyCorp © 2020 | Бесплатный конструктор сайтов - uCoz