Кадрова Е. Л.
Удмурт литературая берло дыре потэм 5 класслы учебнике пыртэмын В.Михайловлэн суредъёсыз. Ми туж шумпотӥськом но данъяськиськом, художник ми дорын вордскиз но будӥз шуыса. Удмурт кыллы но литературалы дышетон программаын суредъёс бордын ужаны дыр нимысьтыз висъямын ӧвӧл, озьы ке но, дышетӥсьлэн воштонъёс пыртыны луонлыкез вань бере, учебнике пыртэм суредъёсыз бордын ужам сяна, одно ик тыршисько художниклэн Писэйгурт палъёсмес возьматӥсь суредъёсыз борды дугдылыны, соос сярысь кенешыны, угось трос гинэ суредъёсысь адӟыны луэ гуртмы котырысь тодмо интыосты, картинаосысь геройёслэн ымныр тусъёссы гинэ но гуртоосмылы тупало кадь потэ. Пиналъёс понна со туж тунсыко но паймымон. Ачиз но Вячеслав Ильич шуэ: «Тросэз суредъёсы вордӥськем Писэйгуртэным герӟаськемын».
Гиргорей Славилэн (В. Михайловлэн) суредъёсаз Писэйгурт палъёсмы, 5 класс
Уроклэн мугъёсыз: В.Михайлов суредасьлэн Писэйгурт палъёсмес возьматӥсь суредъёсыныз тодматоно, инкуазез, дорез гажан но яратон мылкыд пыӵатоно.
Кулэ луись арбериос: В. Михайловлэн творчествоезлы сӥзем книгаос, суредъёсыз, соос пӧлын школамылы кузьмам «Тулыс» картинаез, художникен герӟаськем туспуктэмъёс, Писэйгурт палъёсты возьматӥсь суредъёсын слайдъёс.
Уроклэн мынэмез:
Доска вылэ юнматэмын художниклэн инкуазез возьматӥсь кӧня ке ужъёсыз (уроклэн темаеныз герӟаськымтэосыз)
Д: Кызьы малпаськоды, пиналъёс, ма вераны луоз художник сярысь, та картинаоссэ учкыса. (Яратэ инкуазез. Инкузьлэсь пӧртэм вакытъёссэ возьматэ. Вордскем шаерзэ туж яратэ, дыр. Пиналъёс ас малпанъёссэс верало)
Зэмзэ но, Вячеслав Ильич туж яратэ, луоз, вордскем шаерзэ. Но эшшо но дуногес со понна вордскем Писэйгурт палъёсыз. Со сярысь художник ачиз но вера: «Тросэз суредъёсы вордӥськем Писэйгуртэным герӟаськемын».
Валады ини луоз, пиналъёс, ма сярысь туннэ урокамы вераськом. Вордскем гуртмес котькудмы ик гажаськом но яратӥськом. Со сярысь чебересь кылъёсын вераны быгатӥськом. Нош кызьы меда суредась буёлъёс пыр возьматыны быгатэ вордскем палъёсызлэсь чеберзэс, кин пыӵатэм солы дорзэ яратон?
Кенешон азьланьтӥське «Вячеслав Михайлов» (Ижевск, «Удмуртия» 2009) нимо альбомысь туспуктэм сярысь, татын суредасьлэн семьяез. Вячеслав Ильичлэсь нэнэзэ Марина Григорьевнаез (Маринкапай шуо вал гуртамы) ачим но тодӥсько ай бере, вакчияк со сярысь верасько:
- Маринкапай, пиналъёс, сабыр, йоно, синмаськымон нылкышно вал. Колхозын ужаз. Туж яратӥз пиналъёсыз, котырысьтыз соос ӧз бырылэ. Шуг-секытъёсты чидаса, вормыса, будэтӥз нылпиоссэ, калыке поттӥз соосты. Одӥгзэ тӥ туж умой тодӥськоды, со Михайлов Григорий Иванович, Гири агай шуиськом сое. Кема дыр ӵоже шофер луыса ужаз, али пенсиын ни. Школаямы дышетско солэн внукъёсыз но внучкаосыз. Нош Славик пиез тодмо суредась луиз, со Гиргорей Слави (псевдонимез ӵыжы-выжыосыныз герӟаськемын), Михайлов Вячеслав Ильич. Пичи дырзэ, дышетскем аръёссэ тодаз вайыса, Вячеслав Ильич шуэ: «Мар гинэ умой уж лэсьтӥ – нэнэелы тау карисько. Ваньмыз солэсь пыӵамын. Котькуд суредэлэн пуштросаз солэн но визьмыз вань».
Тодам лыктэ на, кызьы ми, пиналъёс, дэмен картошка мерттэм бере, яратӥськом вал Маринкапайёслэн кеносазы пыраны. Отын чылкыт, салкым, выж вылын куэм выжлёгетъёс, нош борддорын рад гинэ юнматылэмын рамкаосы инъям суредъёс (картинкаос шуиськом вал соосты). Со вал со вакытэ УдГУ-ын дышетскись Вячеслав Михайловлэн, вуоно суредасьлэн, ужъёсыз. Ми, пичиос, паймыса учкылӥм, кызьы Славик агай асьме палъёсты сыӵе чебер суреда шуыса. Та паймонэ али но быремын ӧвӧл. Туж синмаськисько «Вордӥськем улос» суредэзлы. Ойдолэ, пиналъёс, учком та суредэз.
Суред слайд вылын возьматӥське.
Кӧня ке юанъёс сётӥсько:
-Тодмо ӧвӧл-а тӥледлы татын возьматэм интыос? (Пиналъёс соку ик тодмало лягез. Гуртмылэн шор вадесазгес, тымет сьӧрын, пичи гинэ нюлэсо инты вань, сое «ляг» шуиськом. Пиналъёслэн яратоно шудон интызы. Вуоно художник но та лягез туж яратӥз, луоз, уго улон коркаезлэн бакча бераз гинэ со.
Соку ик возьмато лягысь «кожан» шуиськись интызэ. Суредысь адӟиське ляг шортӥгес васькись буш, писпуостэм инты, пиналъёслэн куасэн нискылан интызы).
- Кинэ адӟиськоды суредысь? Мар ужа со? (Малпанъёссэс верало)
- Туж шуныт мылкыд кельтэ пичи гинэ ыж уллё. Вань-а тӥляд тазьы ыж возьмамды? Вань ке, кельшиз-а та уж тиледлы? (пиналъёс тодазы ваё али гинэ ӝужам вож турын вылэ ыжъёсты поттэмзэс, инкуазьлэн чеберезлы паймемзэс, гужем вуэмлы шумпотэмзэс).
- Кыӵе буёлъёсты тросгес уже кутэ суредась? (вож буёллэсь пӧртэмлыкъёссэ, со тулыс нуналэз возьматэ; ӵуж буёл суредлы шунытлык пыӵатэ)
- Кыӵе мылкыд кельтэ суред? (Туж шуныт мылкыд. Эшшо одӥг пол паймиськом на гурт котырысьтымы ӵыдыны луонтэм интыослы)
Д: Та суредысь адӟим чебер тулыс куазез, нош табере ойдолэ вуылом тол куазе. Вордскем палъёсмы толалтэ но туж шулдыресь луо.
Возьматӥське «Выль ар азьын» суредэн слайд. Пиналъёс соку ик тодмало Писэйгуртэз. Ваньмыз озьы ик, кызьы вань: ляге тубон сюрес, гуртлэн шор вадесысьтыз йоэн шобырскем тымет, Козырев Миша агайёслэн бакча вӧзысьтызы кызьпу, кыдёкынгес сылӥсь фермаос, соос сьӧрын адӟиськись Кольыёшур нюлэс.
Суредъя юанъёс:
- Кыӵе пуштросэз та суредлэн? Малы сое «Выль ар азьын» шуыса нимам художник? (лымыё кезьыт тол куазь возьматэмын, ӵын выллань тубе, Выль ар кыз вайись воргоронэз адӟиськом, ляге тубам; гуртын шыпыт, котькин Выль арез пумитаны дасяське, дыр).
- Сак учке ай, пиналъёс, суред шоры. Ваньмыз тодмо кадь, но со вакытэ ик маке но тӥледлы тодмотэмез но вань. (Пиналъёс юало тымет огпалась адӟиськись корка сярысь. Со али ӧвӧл ни. Тодэ ваёнъёсме верасько)
Д: 70-тӥ аръёсы та коркан маслозавод (маслопром шуиськом вал) вал, татын йӧл пастеризовать каризы, йӧллэсь наплыксэ, чылкытсэ эскеризы, пӧртэм анализъёс лэсьтӥзы. Нош ми, гужем тыметысь потасьтэм пиналъёс, отчы шунтӥськыны пыраллям.
Пиналъёс понна та туж тунсыко ивор. Тросгес юаны курисько маслопром сярысь анай-атайёссылэсь.
Д: Таиз но суред шуныт мылкыд кельтэ. Монэ но та суред пичи дырам вуттылӥз. Со эшшо но эшшо гуртмес гажан мылкыд пыӵатиз асьмелы.
Та суредъёс вӧзысь чик ӧм пумиталэ Писэйгурт кылэз. Художниклэн вань на, пиналъёс, суредэз, кытын пырак верамын, отын Писэйгурт возьматэмын шуыса. Ойдолэ тодматском соин. Нимаське со «Матэктэ тулыс. Писэйгурт». (Та суред бордын ужаны кутӥсько И. Ф. Тимирзяновалэсь «Кыллэн но буёллэн дуннеязы» дышетӥсьёслы дасям юрттосысьтыз материалзэ, 23-25 бамъёс).
Уроклы йылпумъянъёс лэсьтӥськом, темамы борды берытскыса. Учкиськом на мукет слайдъёсты, кытысь тодманы луэ Писэйгуртмес: «Август», «Лымшор тол», «Сельские будни», «Март». Вераськом, кыӵе яратэ вордскем палъёссэ суредась. Асьмелы но учкисьёслы со пыр дорез яратон но гажан мылкыд пыӵа. Пӧртэм ужъёсамы асьмеос но мед данъяломы вордскем палъёсмес.
Гуртсэ яратэменыз ик, дыр, Вячеслав Ильич татчы юрт басьтӥз. Куддыръя, тодӥськоды, со студентъёссэ но гуртамы вайылэ. Асьмелы луонлык кылдӥз тодмо суредасен матысьгес тодматскыны.
Доре уж: кельшем суредъя 5-6 чебер предложение яке пичи верос гожтоно.
