Смирнова Е. Г.
Игнатий Гаврилов - Удмурт театрлэн «атаез», 6 класс
Уроклэн мугъёсыз:
1. И. Гаврилов - Удмурт театрлэн «атаез» - та валанэз нылпиос доры вуттоно.
2. Асьсэлэсь малпанзэс вераны быгатон.
3. Кылтӥрлыксэс узырмытон.
4. Ӟеч сямъёслы дышетон.
Ужан котыръёс:
1. И. Гавриловлы сӥзем стенд.
2. И. Гавриловлэн ккигаосыз.
3. Удмуртилэн картаез.
Уроклэн мынэмез.
I. Уроклы дасяськон:
- Асьмеос чебересь-а? Чебересь! Кужмоесь-а?
- Кужмоесь! Визьмоесь-а? Визьмоесь! Зэм, асьмеос котьмае тодӥськомы! Нош Алнаш ёросысь потэм кыӵе писательёсты тодӥськомы али? (Верало: Г. Красильников, Н. Байтеряков, Г. Ходырев...)
- Шонер! Нош асьме пал удмуртъёслэн таӵе веранзы вань (Доска вылэ юнматӥсько гожтэмез: «Аслэсьтыд но ӟеч бускелед мед луоз!» Тетрадязы гожтӥсъком!)
Дышетӥсь:
- Ортчоно темамы (доска вылэ гожтэмын): Игнатий Гаврилов - ...?
Кин со И. Гаврилов, урок пумын асьтэос вералоды, нош ма вера меда тӥледлы со ним? Ойдолэ ай кластер лэсьтоме, 5-тӥ классын ортчем материал вылэ пыкиськыса.
- Нош кин со драматург? Ма со драматургия?
Дышетӥсъ:
- Туннэ вераськонмы луоз Игнатий Гаврилович Гаврилов драматург сярысь. Кызьы со драматург луэм?
Кин солы юрттэм? Кыӵе адями со вылэм?
Драматург, кылбурчи, писатель луон понна, мае меда умой тодоно? (анай кылэз, лексикаез)
Выль тема:
Дышетӥсь:
- Озьыен, И. Г. Гаврилов вордӥськиз 1912-тӥ арын бускель Можга ёросысь Сибы гуртын. Семьязы бадӟым вал. Анаез-атаез - огшоры крестьянъёс. Котькуд быдэ вуэм адями маин ке но ласянь пичи дырзэ тодаз вае.
Тани И. Гавриловлэн Вася нимо выныз, Удмурт АССР-лэн заслуженной артистэз, шунытэн тодаз вайылӥз агаез сярысь. Шаплы, ерпечка кадь со вылэм. Со сярысь асьмелы вералоз Вася Иванов... (Приложение №1 В. Гаврилов, - «Чечы» (тодэ ваёнъёс) Васялэн верамезъя кыӵе вывод лэсьтыны луоз?
Гожтӥськомы:
Муртлэнэн кӧтыд уз тыр.
Дышетӥсь:
- Арлыдыз вуыса, Йыгын но школае мынӥз. Дышетӥсез - ӟуч, Вера Васильевна Толстая, Лев Толстой писательлэн ӵыжы-выжыез. Егит дышетӥсь, Сибые лыктыса, одӥг но удмурт кыл уг тоды вал, нош пинальёс уг валало ӟуч сямен. Ужаны туж секыт вал. Анай-атайёс дышетсконэз кулэен ӧз лыдъяллялэ.
Тани одӥг пол таӵе учыр луиз. Со сярысь вералоз Стас. (Стае вера базарын луэм учыр сярысь. Гожтэт тодӥсътэм кышномуртэ капчиен алдаллям. Приложение №2 В. Гаврилов. Тодэ ваёнъёс.)
- Кыӵе йылпумъян лэсьтӥськомы?
- Гожтэ:
Дышетскем нянь уг куры.
Дышетӥсь:
- Сибы калык мур гажаз дышетӥсез. Быдэс гурт калыклы со быгатӥз пыӵатыны дышетсконлэн кулэез сярысь валан. Соинтэк-а берло та школаез пыр потэмъёс пӧлын туж трос дано адямиос:
Гаврилов вынъёс сяна, И. Шишкин, А. Шутов - тодмо тодосчиос, М. Покчи-Петров, А. Петров - кылбурчиос, А. Григорьев - драматург но мукет (туспуктэмъёсты возьматоно).
Шулдыр ортчизы И. Гавриловлэн Сибыын дышетскон аръёсыз. Пинальёс туж яратӥзы литератураез, фольклор бичазы. Игн. Гавриловлы со сюрес усьтӥз Можга педтехникуме но театральной техникуме.
Вераны кулэ, Ижевске Гаврилов тодмо луыса вуиз ини. Со кылбуръёс гожья вал.
Удмурт театр арлы быдэ И. Гавриловлэсь 2-3 спектакльзэ шудэ вал. 30-лэсь уно пьеса гожтӥз со Удмурт театр понна.
«Вань улонэ герӟамын вал Удмурт театрен» - шуылӥз драматург.
Дышетӥсь:
- Кызьы малпаськоды, «И. Гаврилов» кыллы кыӵе синоним малпаны луысал? Тӥледыз дорады кин те-вордэ, сюдэ, дӥся?
- Озьыен, И. Гаврилов - ...? (Доска вылэ гожтэмез азинтӥськомы)
- Удмурт театрлэн «атаез». Луоз-а озьы шуыны?
- Нош мар меда вера аслаз гуртоез сярысь Лебедева Раиса Николаевна? Рая апаймы - пенсионер, ужысь ветеран, быдэс улонзэ сӥзиз Кузьымгурт калыкез эмъянлы. Вордӥськем но будэм со ӵапак Игнатий Гавриловичлэн гуртаз. Нош Рая апайды доры ветлӥз Лебедева Оля. Со ик вералоз. (Приложение №3)
Дышетӥсь:
-Син азе пуксе чебер удмурт нылкышно, кудӥз ведра-карнанэн ошмес доры вулы мынэ. Нош ошмес ке шуиськомы, мар вераны луэ со сярысь? Ошмесэн герӟаськем кыӵе кылъёс вераны быгатоды?
Пиналъёс:
- Ческыт вуо.
- Кезьыт.
- Шаплы.
- Дырдыетӥ бызе.
- Бадӟым ошмес.
- Луд ошмес.
- Ӟуч ошмес.
- Чербай.
Дышетӥсь:
- Шонер, пинальёс, туж умой. Нош Игнатий Гаврилов одӥгзэ пьесазэ «Кезьыт ошмес» шуыса нимам. Туннэ та пьеса бордын ум ужалэ на, но мон тӥледлы кырӟало кырӟан. Нош тӥ тодэлэ, мар сярысь вераське меда пьесаын. {Дышетӥсь кырӟа «Кезьыт ошмес» драмаысъ Беглой сярысь «Бадӟым тэль шорын» кырӟанэз)
Бадӟым тэль шорын,
Кезьыт ошмес дурын
Пинал Беглой сылэ,
Кырӟа, вера, бӧрдэ:
«Узыр нылпи понна
Солдатэ басьтӥзы,
Кыдёке, туж кыдёке,
Мурт шаере келязы.
Пеймыт казармаын
Сюлэм ик чигиське.
Сьӧд начальникмы
Ултӥя, жуге.
Ӧй чида мон отын,
Пегӟыса кошки.
Гуртлы матысь тэльын
Улыны кариськи.
Яратонэ мынам
Возьма, малпа, дыр.
Малмыж становой
Монэ утча, дыр».
1932
Дышетӥсь:
- Ma сярысь яке кин сярысь вераське меда пьесаын? (Беглой, пегасъ сярысь)
Дышетӥсь:
- Шонер. Со сярысь вераськомы бергес. Нош али вераськеммы сярысь кыӵе йылпумъян лэсьтыны луоз?
Гожтӥськомы:
Ӟеч адями кулэ, ужез кыле.
Дышетӥсь:
- Туэ сӥзьыл ӧсъёссэ усьтӥз выльдэм Удмурт театр яке Йӧскалык театр. Нош выль сезонэз артистъёс кутскизы ӵапак И. Гавриловлэн «Кезьыт ошмес» спектакленыз. (Туспуктэмъёс учкон) И. Гавриловен кылдытэм театр ужа, шумпоттэ аслаз ужъёсыныз аслэсьтыз учкисьёссэ. Нош выль дышетскон арлы егит артисъёсты дышетыны ялэмын вылез конкурс. Оскисько: асьме палась но мылкыд карисьёс сюрозы.
Дышетӥсь:
- Табере, пинальёс, тетрадьысьтыды лыдӟоме йылпумьян лэсьтӥсь визь кылъёсмес. Озьыен, И. Гавриловлы но театрлэн «атаез» луыны юрттӥз анай кылзэ умой тодэмез но яратэмез.
Шонер-а?
1. Игнатий Гаврилов вордӥськиз Алнаш ёросысь Сибы гуртын.
2. Сибыослэн яратоно дышетӥсьсы Вера Васильевна Тонкая.
3. Дышетскиз Можга педтехникумын.
4. Студент дыръяз ик гожьяз романъёс.
5. Режиссере дышетскыны дэмлаз М. Покчи-Петров.
6. Гожтӥз 30-лэсь ятыр пьесаос.
ЛИТЕРАТУРА:
1. И. Гаврилов. Люкам сочинениос. 3 томен, 1986
2. И. Гаврилов. Тодам вайисько. Ижевск, 1975
Самоанализ
