Алнаш ёросысь удмурт кылъя но литературая дышетисьёслэн сайтсы

Покчиарня, 26.11.2020, 18:18
Анай-атайёстэ зарни-азвесьёсын уд вошты
Ти пыриды Гость нимын | Туркым "Гости"Шуиськом ӟечбуресь! Гость
Валтись бам | Мынам баме | Регистрация | Потон| Пырон | RSS




Ӟучсэ кылэз дышетытэк, шуггес луэ йыг-йыг вамышъяны. Нош аслэсьтыд кылдэ яратытэк, мукет кылэз уд дышы гажаны!  (Д. Яшин)

Алнаш ёросысь удмурт кылъя но литературая дышетӥсьёслэн сайтсы

Ӟечбуресь! Ми шумпотыса пумитаськом тӥледыз сайтамы!

Гаранькина Н. А.

 

Анай-атайёстэ зарни-азвесьёсын уд вошты

 В. Сергеевлэсь "Кенер сьӧрысен", "Атайлэн кык киосыз" но К. Паустовскийлэсь "Зарубки на сердце" веросъёссэс эскеронъя внеклассной лыдӟонъя урок

 

Нылпи вордыса,

Семьятэк кылиськод ке,

Солэсь но секыт, дыр, ук бен.

И. Постников.

Пуктэм ужпумъёс. Веросъёсты сэрттыны-пертчыны дышетон; литера­турной теориез тодэ ваён но уже кутон; лыдӟиськон мылкыдэз ӝутон; анай-атайёсты, мӧйыосты гажан мылкыд пыӵатон.

Урокын кутэм материал. Портретъёс, книгаос, диске гожъямъёс.

Уроклэн мынэмез.

Чузъяське Н. Постниковлэн кырӟанэз (со ик эпиграфлы но басьтэмын).

Дышетӥсьлэн юанэз: малы та кырӟанэн урокмес кутскимы? (Та юанлы дышетскисьёс берло валэктозы).

Дышетӥсь вера сётэм ужпум сярысь:

—         Тӥ лыдӟиды В. Сергеевлэсь но К. Паустовскийлэсь веросъёссэс. Тодамы ваёмы "Кенер сьӧрысен" верослэсь пуштроссэ. (1 мурт вакчияк вера пуштроссэ).

 Веранэз эскерон понна тодоно литературной терминъёсты.

—         Тодады вае сюжетэз, композициез, темаез, идеяез, кульминациез. (Нылпиос верало). Озьыен, сюжетэныз тодматским ни, нош верос 5 люкетлы люкемын, эскеромы котькудзэ нимысьтыз. Ужаломы группаосын, тодматском композициеныз.

Группаослы ужъёс.

1 группа ужа 1, 2 люкетъёсызъя.

а)          Малы та пичиесь люкетъёс нимаз висъямын?

б)         Кыӵе валтӥсь малпанэз?

в)          Ма тодӥм Арки сярысь?

г) Малы автор гожтэм: "шорт векчи но кузь"?

(Та люкетъёс тодмато Аркиен. Улон сярысь малпаськон. Лыдӟисез дася азьланьын ортчоно ужъёслы. "Кытӥ векчи, отӥ ик чиге" калык веранэз тодэ уськытэ).

 2-тӥ группалы 3 люкетэзъя уж.

а)          Малы та люкет висъямын?

б)         Кыӵе татын валтӥсь малпанэз?

в)          Ма малпа Арки бертӥсь солдат сярысь?
(Ужало текстэн, лыдӟо).

3-тӥ группа ужа 4 люкетъя.

а)          Ма малпа Арки дораз вуэм бераз?

б)         Синйылтэ-а со анай-атайёсызлэсь тусбуйзэс, воштӥськемзэс? Малы?
    4-тӥ группа ужа 5 люкетъя.

а)          Малы пыртэмын та люкетэ Офимьялэн но Кирлолэн образзы?

б)         Кызьы соос шоры учке Арки?

в)          Кема-а Арки гуртын улоз?

г) Малы верос тазьы нимамын?

(Та люкетъя инсценировка но лэсьтыны луоз, собере сое эскерыны).

Вань люкетъёсты эскерем бере, йылпумъянъёс лэсьтӥськом: автор юри чакласа кутэм таӵе композиция, кудӥз юрттэ Аркиез котькуд ласянь возьматыны. Темаез: ассэ ачиз гинэ яратӥсь адями возьматэмын. Идеяез: анай-атайзэ гажасьтэм адями ачиз но гажамон адями уг луы. Одно ик вераськонэз герӟано туннэ нуналэн, асьме улонэн.

Дышетӥсь. Асьмеос трос вераським ни верос сярысь, нош писатель сярысь кылпум ӧм на поттылэ. Ойдолэ кылзом. (Одӥгез дышетскись вакчияк вера В. Сергеевлэн улэмез но ужамез сярысь).

Кызьы верамы ни, В. Сергеев туннэ нуналэ туж кулэ ужпумъёсты ӝутэ: адямилык, шунытлык, ог-огдэ гажан, анайдэ-атайдэ яратон, соос сярысь сюлмаськон. Тӥледлы кельшиз, луоз, "Атайлэн кык киосыз" веросэз но.

Одӥг мурт пуштроссэ вера, быдэс класс сётэм юанъёсъя ужа.

а)          Кыӵе мылкыд кельтэ верос?

б)         Мае возьматыны тырше автор?

в)          Малы бертӥллям Миктаен Онда?

г) Малы Марья кенак ӝожомемын?

д)         Кыӵе муген пыртамын чипылэн кесяськемез?

е) Малы анай шуэ: лябӟизы киосыд, Микворе?
    ё) Малы верос тазьы нимаське?

(Пумозяз кылзо Н. Постниковлэсь кырӟанзэ, валэктон сёто нырысь пук­тэм юанлы).

Дышетӥсь. Анай, меми, мама, мутти, мооми, ненько — пӧртэм кылын верай анай кылэз: удмурт, ӟуч, немец, англи, украин. Шӧдӥды, луоз, котькыӵе кылын со ненег но мусо кылӥське. Котькуд калыклэн котькыӵе вакытаз нылпи но анай-атай кусыпъёс сюлэмшугъяськытӥзы адямиосты. Тани ӟуч писатель К. Паустовский вазенгес гожъяз вылӥын верам ужпумъёс сярысь, туэ тӥ та писателен тодматскоды ӟуч литературая урокъёсын. (Биографизэ вератэк учко портретсэ, книгаоссэ).

Пиналъёс, тӥ лыдӟиды солэсь "Зарубки на сердце" вероссэ. Малпаськиды, дыр, нимыз сярысь но. Удмурт сямен "Сюлэм вылэ ӵогем пусъёс" шуыса берыктыны луоз.

 

(Пуштросэныз тодматозы переводчикъёс. Кык кузя удмурт кылын мадё).

Татын Паустовский вера кадь ачиз сярысь, кызьы со тодматскиз пересь Екатерина Ивановнаен, тодӥз солэн Ленинградын улӥсь Настя нылыз сярысь. Со туж шер берта анаез доры. Коньдон но кык толэзьлы огпол гинэ ыстылэ. Паустовскийлэн гожъямаз кузёяське сӥзьыл куазь. Коркаез но пересьлэн вуж, шал-шал. Берло дыре Екатерина Ивановна туж лябӟиз, нылзэ ватӥз (нош со ньыль ар бертамтэ ни). Огпол со ассэ садэ поттыны куре но отын синкылиосызлэсь возьдаськытэк бӧрдэ ( та интызэ лыдӟо). Собере пересь кема уг улы ни. Нылыз ватыны уг вуы.

Ужаськом юанъёсъя. Малы верос тазьы нимаське? Кыӵе интыосыз тужгес но сюлмамы кылё? Малы автор трос инты висъя сӥзьыл куазез суреданы? Малы Настялэн бертымтэез сярысь пересь нокинлы уг ӝожтӥськы? Ма малпаськоды Настя сярысь? Map вераны тыршс веросэныз Паустов­ский? Луоз-а В. Сергеевлэсь но К. Паустовскийлэсь веросъёссэс ог-огзылы матынэсь шуыны?

Йылпумъянъёс. Нылпиос анай-атайзэс гажаны кулэ, соос кыл куто мӧйыос азьын, соосты будэтэмзы, вордэмзы, ужлы дышетэмзы понна. Тӥ но, пиналъёс, быдэ вуоды, палэнэ кошкоды, эн вунэтэ анай-атайдэс, эн ыштэ кусыпъёстэс.

Та сярысь вань Ю. Кузьминалэн "Тон эн мӧзмы, анай" кырӟанэз. (Быдэс классэн кылзо сое. Урокез ортчытъяку та темаез герӟаны луоз живопи­сен но).

Дышетӥсь. Туж шонер верамын кырӟанын. Ӧвӧл, дыр, дунне вылын одӥг кылбурчи но, крезьгурчи но, кудӥз ӧз сӥзьы анайлы кылбурзэ, кырӟанзэ. Анай-атайдэ, мӧйыосты гажанэз возьматон сюлэмшугъяськытэ художникъёсты но.

а)          Кӧня пӧртэм но кыӵе быгатыса суредамын асьме ёросын калык ху-
дожниклэн С. Н. Виноградовлэн анайёс сярысь картинаосыз: "Нэнэ киос",
"Куно пумитан", "Арня нунал" (Суредъёсты учко. Возьматыны кулэ
А. Холмогоровлэсь "Анайёс" картиназэ но). Нош учке ай А. П. Холомого-
ровлэсь "Анайёс" картиназэ. Кыӵе паймымон суред! Макем мусоесь анайёс
но пинал! (Дышетскисьёс суредлэсь пуштроссэ усьто).

б)         Тодэ вайыны луоз анайлы-атайлы сӥзем визькылъёсты.

Бен, вашкала дырысен удмурт калык макем вылӥе пуктэ анаез. Зэмзэ но, литератураын но, музыкаын но, живописьын но (ваньмыз соос искусстволэн ёзъёсыз луо) анайлэн образэз валтӥсь инты басьтэ. Угось котькин понна анайлэсь бадӟымез дунне вылын нокин ӧвӧл. Эн вунэтэ сое. Доскалэн мышказ гожтэмын:

литературовед 

живопись          словарной уж                        

переводчик     

Юанъёслы валэктон:

литература  

музыка        искусстволэн ёзъёсыз 

живопись

Гуртэ уж. Тодоно веросъёслэсь пуштроссэс. Гожтэт гожтоно Аркилы яке Настялы. (Таӵе гожтэт гожтӥз Надя Жданова).

 

Ӟечбур, Настенька!

Ӝож мылкыдын гожтӥсько тыныд гожтэт. Настенька, тон туж янгыш анаед азьын. Малы тон анаед доры ӧд берта, толэзьлы быдэ коньдон ӧд лэзья? Кыӵе тонэ со бӧрдыса возьмаз! Тыныд коть сое ватыны бертоно вал, нош тон куинь нунал ортчыса вуид ук. Малы тон городэ кошкид, луысал анаеныд ӵош ик улэмед! Анай муртлэн вордскем интыяз ик улэмез потэ, дыр, ук! Таин мон гожтонме йылпумъясько, малпасько, тыныд визь луоз.

Ӟеч лу.

Надя. 21.10.96.

 

Вход на сайт

Поиск

Календарь

«  Шуркынмон 2020  »
ВордПукВирПокУдмКӧсАрн
      1
2345678
9101112131415
16171819202122
23242526272829
30

Статистика


Онлайн всего: 1
Куноос 1
Пользователей: 0
Copyright MyCorp © 2020 | Бесплатный конструктор сайтов - uCoz