Алнаш ёросысь удмурт кылъя но литературая дышетисьёслэн сайтсы

Покчиарня, 26.11.2020, 18:54
П. Черновлэн "Дор" повестезъя 11-тӥ классын урок-конференция
Ти пыриды Гость нимын | Туркым "Гости"Шуиськом ӟечбуресь! Гость
Валтись бам | Мынам баме | Регистрация | Потон| Пырон | RSS




Ӟучсэ кылэз дышетытэк, шуггес луэ йыг-йыг вамышъяны. Нош аслэсьтыд кылдэ яратытэк, мукет кылэз уд дышы гажаны!  (Д. Яшин)

Алнаш ёросысь удмурт кылъя но литературая дышетӥсьёслэн сайтсы

Ӟечбуресь! Ми шумпотыса пумитаськом тӥледыз сайтамы!

Кириллова С. Л.

П. Черновлэн "Дор" повестезъя 11-тӥ классын урок-конференция

 Пуктэм ужпумъёс. Повестьлы рос-прос анализ лэсьтыны дышетон (дасям юанъёсъя); "Дор" кыллэн пуштросэз. Кызьы со возьматэмын повестьын? "Дор" повестьлэсь кулэлыксэ валэктыны быгатон; авторлэн но мынам (дышетскисьлэн) пӧртэм ужпумъёс шоры учконэ.

Ужан котыръёс. Доска вылэ ошемын П. Черновлэн портретэз.

Уроклы эпиграф:

Гуртэ, мынам гуртэ, —

Бадӟым ик со ӧвӧл...

Али но та гуртын

Улэ пинал дыры.

Али но со отын

Ветлэ гольык пыдын.

(Г. Корепанов-Камский).

Озьы ик доска вылэ ошемын бумагае гожтэм уроклы юанъёс:

Малы повесть "Дор" шуыса нимамын?

Малы та тема тужгес но сюлэмшугъяськытэ П. Черновез?

Кыӵе ужпумъёсты ӝутэ автор повестяз?

Map бордын повестьлэн аспӧртэмлыкез?

Кытын, тӥ сямен, произведенилэн лэчыт интыез? Малы?

Кыӵе дунъет сётысалды "Дор" повестьлы?

Произведениын ӝутэм лэчыт ужпумъёс тупало на-а туннэ нуналлы, туала вакытлы?

Озьы ик уже кутэмын П. Черновлэн вераменыз кассета, кытын со маде повестьлэн кылдэмез, историез но геройёсыз сярысь.

Уроке ӧтьыны луоз музыкая дышетӥсез. Быдэстыны луоз гуртлы, дор палъёслы сӥзем кырӟанэз.

Уроклэн мынэмез.

   1. Дышетӥсьлэн мытон кылыз:

Ӵем дыръя тӥ, школаын дышетскондэс йылпумъясьёс, кылӥськоды таӵе кылъёсты-индылонъёсты:

Шедьты улонысь астэ ачид,

Шедьты аслэсьтыд интыдэ!

Палэнэ кошконо луид ке, эн вунэты вордскем юрттэ, эн вунэты дорад бертылыны, эн вунэты анай-атайдэ.

Но улонэз адямилэн пӧртэм ӧръёстӥ кошке, кудӥз кыле аныкай музъем вылаз, чебергес но узыргес карыны тырше аслэсьтыз улон интызэ, дор палъёссэ, сюлмысьтыз ик герӟаське музъем ужен.

Нош куд-огезлы кошконо луэ палэнэ, мукет шаеръёсы.

Улон — со улон. Нош котькытчы тон мед кошкод, котькыӵе чебер но шулдыр мед луозы со интыос, озьы ке но, аслад вордскем юртэд, эшъёсын ӵош шудэм но бызьылэм интыосыд, пӧсь гужемъёсы колхоз бусыосын ужамед, юзмыт ошмес вулэн шӧмыз ноку но сюлмысьтыд уз кошке, ялан соос тонэ ас бордазы кыскозы.

Нош тужгес но вӧсь луэ адямилэн сюлмыз, куке со адӟе, кызьы куашкало гуртъёс, нош гуртьёсын ӵош, малпаське ай, солэн быре азьлань улонэзлы осконэз. Гурт калык вордскем интыысьтыз амалтэк кошконо луэ ке, кыӵе бадӟым яра кыле солэн сюлэмаз.

Нош кин та понна янгыш? Гурт калык? Колхоз кивалтӥсьёс? Ёрос ки-валтӥсьёс?

(Нылпиос, пӧртэм малпанъёссэс вераса, одӥг йылпумъянэ вуо).

Со — мыдлань политикалэн бервылыз. Со али но адӟиське, уно сюрс адямиослэсь пушсэс бугыртэ. Бен, куашкам-бырем гуртъёсты улӟытыны шуг. Отысь куке но кошкем, уллям адямиослэсь сюлэмъёссэс бурмытыны уката секыт.

Нош улӟозы на-а куашкам гуртъёс?

(Пиналъёс нош ик асьсэ малпанъёссэс тупен-тупен сэртто-пертчо).

2. Тани таӵе ик мур юан пуктэ аслаз повестяз П.Чернов но.

Малы меда та тема тужгес но сюлэмшугъяськытэ авторез?

(Нырысь урокъёсын вераськемын вал писательлэн улон сюресэз но творчествоез сярысь, сое лыдэ басьтыса, пиналъёс валэкто, писательлэн гуртэз куашкан калэ вуэмын вылэм ини шуыса).

Нош повестьлэн героезлы, Василий Николаевич Пислеговлы, кыӵе ду­нъет сётысалды?

Автор пырак уг вера, дорзэ яратон сярысь чебересь кылъёс, озьы ик куддыр сураськыны кутсконо, со ачиз-а Чернов, яке Пислегов?

Критик А. Ермолаев вера: "Та повесть чаляк гинэ лыдӟыса быдтон вылысь гожтэмын овол. Мур малпаськыса вылысь гожтэмын... Быдӟалаезъя пичи ке но, но татысь асьмеос тодыны быгатомы сомында, кудмында верамын уг луы куд-ог бадӟым романъёсын..."

Кытын луэ повестьлэн лэчыт интыез? Шорсюлмыз?

(Куке герой Василий Николаевич вуэ аслаз юрт бервылаз. Со сярысь одӥгез дышетскись доска доры потыса вера яке лыдӟе повестьысь люкетсэ).

—  Малы юрт бервыл сярысь люкет повестьын тужгес но лэчыт луэ?

Та интыын вордскем, будэм адямилэн мылкыдыз бугырске, соин ик котькыӵе тӥрлык солы дуно но тодаз вайытэ ачиз но героен герӟаськем учыръёс сярысь. Кема аръёс ӵоже малпаськон, сюлэм висён, астэ янгыше уськытон — ваньмыз со нош ик геройлэсь кемалась дырысен висись яразэ азытӥз. (Жингыртэ гурт сярысь кырӟан).

—  Табере вералэ, кӧня ужпумъёсты сэрттэ-пертче автор произведенияз?

а)   ас шаердэ, гурттэ яратон но жалян;

б)  чылкыт улон понна нюръяськон;

в)   пичи гуртъёсты быдтонлы пумит нюръяськон — самой бадӟымез ужпум;

г)   юонлы пумит султон;

д)  аслэсьтыд анайдэ гажан, соос сярысь мур сюлмаськон, жалян;

е)   удмурт кылдэ яратон, гажан.

—  Нош мар бордын луэ повестьлэн аспӧртэмлыкез?

1. Валтӥсь герой — арлыдо воргорон, озьы ик — пичи пияш;

2. Тодэ ваён пыр возьматэмын дорлэн матын луэмез;

3. Пӧртэмлыко кутэмын диалогъёс;

4. Ӟуч кылъёсты кутыса вераськыны турттон;

5. Повесть ке но, геройёсыз ӧжыт — 5-6 мурт;

6. Произведение кушаса сётэмын ӧвӧл, со — туж малпаськытӥсь;

7.Повестьлэн йылпумъянэз но юн малпаськытэ. Малы кошке Васи­лий Николаевич?

(Шакта ӵужмуртэз сое уг вала. Сое вала ачиз гинэ Василий Николае­вич. Асьмеос но валэктыны ум быгатэ солэсь кошкемзэ).

—  Малы кошке? Нош ик юан пуктэме потэ? Пиналъёс верало.

а)   солэн сюлэмыз вӧсь луиз гуртсэ куашкамен адӟыса;

б)  "юрт быдтӥсь" — тӥни мар сюлэмзэ сюпсе Василий Николаевичлэсь. Солы ваньмыз понна калык азьын возьыт;

в)   солэн семьяез палэнын, гуртаз ӵыжы-выжыез кылемын ӧвӧл ни;

г)   тодэ ваёнъёс сюлэмзэ бугырто, эшшо но вӧсь луэ бурмисьтэм яра.
Соин ик со ӧз чида, кошкиз.

Трос мукет малпанъёс но луозы на. Со лыдӟись понна ик юри озьы кельтэмын.

—  Кызьы дунъясалды "Дор" повестез?

"Дор" повесть выллем произведениос трос умоезлы дышето, малпаськыто, улон шоры лэчыт синмын учкыны юртто.

—  Зэм но, повесть пичи гинэ кадь, нош кӧня малпаськытэ, дышетэ егитъёсты, асьсэлы сюрес бырйисьёсты, янгышъёслэсь утиськыны трос визь-кенеш сётэ.

3. Уроклы йылпумъян.

Урокез йылпумъяса, Г. Романовалэсь кылбур чуръёссэ вераськом.

Туннэ уг чалмо сюан гуръёс...

Ӝутско вылесь чебер юргтъёс.

Кема улэм вуж юрт дорысь

Выль сюрессэс мыто соос.

Бен, Сизьгурт, кытын вордскиз но быдэ вуиз П. К. Чернов, улӟе, чеберске, ӝутско выль юртъеръёс.

Солэн но юрт бервылаз ӝутскиз выль корка, отын кылӥсько пичиослэн но егитъёслэн куараоссы, озьыен, улон азинске, озьыен, вань оскон егитъёслы.

4. Гуртэ уж. "Дор" повестья "Дор... Map со мон понна?" темая сочине­ние гожтоно.

Быгатэмзыя кроссвордъёс лэсьтоно.

Вход на сайт

Поиск

Календарь

«  Шуркынмон 2020  »
ВордПукВирПокУдмКӧсАрн
      1
2345678
9101112131415
16171819202122
23242526272829
30

Статистика


Онлайн всего: 1
Куноос 1
Пользователей: 0
Copyright MyCorp © 2020 | Бесплатный конструктор сайтов - uCoz