Алнаш ёросысь удмурт кылъя но литературая дышетисьёслэн сайтсы

Покчиарня, 28.03.2024, 22:42
Янгыш-а Кирла?: Г. Д. Красильниковлэн "Кошкисез мед кошкоз" веросэзъя урок-суд
Ти пыриды Гость нимын | Туркым "Гости"Шуиськом ӟечбуресь! Гость
Валтись бам | Мынам баме | Регистрация | Потон| Пырон | RSS




Ӟучсэ кылэз дышетытэк, шуггес луэ йыг-йыг вамышъяны. Нош аслэсьтыд кылдэ яратытэк, мукет кылэз уд дышы гажаны!  (Д. Яшин)

Алнаш ёросысь удмурт кылъя но литературая дышетӥсьёслэн сайтсы

Ӟечбуресь! Ми шумпотыса пумитаськом тӥледыз сайтамы!

Шарыпова  Л. В.,

Г.Д.Красильниковлэн  «Кошкисез мед кошкоз» веросэзъя  11-тӥ классын урок – суд ортчытэмын вал. Туннэ нуналэ капчи ӧвӧл сое пиналъёслы сётыны. Угось, аръёс ортчемъя, произведение шоры учкон но воштӥське. Азьвыл Кабышевъёс но Кирла кадьёс шоры «собственникъёс» шуыса учкылӥзы. Сыӵе ужасьёсын, кин ачиз сярысь гинэ сюлмаське, нокыӵе социализм но коммунизм  уд лэсьты. Нош туннэ нуналэ, туала нылпиос кызьы учко меда таӵе югдур шоры? Веросэз лыдӟыку ик пиналъёслэн пӧртэм мылкыдъёссы шодӥськизы.Соин ик вуоно урокез пайдаё но тунсыко, малпаськытӥсь карон понна кутэмын вал таӵе амал. Дышетскисьёслэн мылкыд каремзыя быръемын вал янгыше уськытӥсь, утись, присяжной заседательёс но веросысь куд-ог геройёс. Судья ачиз дышетӥсь луиз. Доразы пиналъёс рольёссэс  шудыны дасяськыны кулэ вал. Присяжной заседательёс азе но азьвыл ик таӵе юанъёс пуктэмын вал:
1.    Янгыш ик-а Кирла?
2.    Кирла интыын тӥ мар карысалды?
3.    Мар карысалды Кирлаен?
4.    Мар огазея Кирлаез но «Вуж юртысь» Кабышевъёсты?
5.    Авторез туннэ вӧзамы луысал ке, кыӵе дэмлан яке юан солы сётысалды?

    Улӥын сетэмын уроклэн кызьы ортчемез. Пиналъёслэн верам кылъёссы  ӧжытак вакчиатэмын, малы ке шуоно, татын зэмос споръяськон потӥз. Присяжной заседательёслэн  но валэктонъёссы, малпанъёссы огъяса сётэмын. Дыр ӧжыт кылемен, уроклы йылпумъян но пиналъёслэн ужамзылы дунъет вуонояз урокын гинэ сётэмын вал.


    Янгыш – а  Кирла?: Г.Д.Красильниковлэн «Кошкисез мед кошкоз» веросэзъя урок – суд.


Уроклэн мугез:
 Г.Д.Красильниковлэсь «Кошкисез мед кошкоз» вероссэ эскероно но солы дунъет сётоно;
Пиналъёсты улон сярысь мур малпаськыны дышетоно;
Котькыӵе ужез гажан мылкыд пыӵатоно.
Классэз уроклы дасян: Классэз судебной залын кадь дасяно, ӝӧкъёс вылэ табличкаос тыроно: янгыше уськытӥсь, утись, присяжной заседательёс но веросысь геройёс.
Уроклэн мынэмез:
Урок кутске дежурнойлэн (секретарьлэн) рапортэныз:
- Султэ! Суд мынэ! Судья эш, 11-тӥ классын дышетскись пиналъёс Геннадий Красильниковлэсь «Кошкисез мед кошкоз» вероссэ эскерыны дасесь.
Судья:
- Ваньдэс пуксьыны курисько. Туннэ асьмеос азьланьтом Геннадий Красильниковлэн творчествоеныз тодматсконмес но  кылзомы  «Кошкисез мед кошкоз» веросысь главной героезлэсь Васильев Кирилл Ивановичлэсь ужзэ. Залэ люкаськемын та веросысь куд-ог геройёс: ачиз Кирилл Иванович Васильев, солэн Катя кузпалыз, колхозысь парторг  Муканов Сергей, озьы ик янгыше уськытӥсь,  дурбасьтӥсь но присяжной заседательёс.
Нырысь ик кыл сётомы янгыше уськытӥсьлы. Мар понна тӥ Васильев эшез янгыш кариськоды?
Янгыше уськытӥсь:
- Кирилл Иванович, калыкын Кирла, колхозын одӥгез азьмынӥсь механизатор вал. Но ассэ гинэ тодэменыз, яратэменыз со бадӟым янгыш лэсьтӥз: Капитонов Мартынлэн капка азяз пуксёно вулы колонкаез аслаз укно улаз пуктӥз. Та учырен сэрен, Кирлалэн вань улонэз сураськиз- пожаськиз. Семьязэ кельтыса, райцентре ужаны интыяськиз, отысен Одотен кушлаське, ӵемысь юылыны но кутске, семьяяз но ассэ умойтэм возе. Ваньмыз понна со ачиз янгыш.
Утись:
- Нош мон шуисько, Кирла янгыш ӧвӧл. Мон  та малпанме вераны тыршо.
Судъя:
-Ма, бен, ойдолэ соку нырысь ассэ героез кылзом. Кирилл Иванович, султэлэ. Вералэ нырысь асьтэ сярысь.
Кирла:
- А мар мон вералом? Армиысь  мон водитель-механик луыса бертӥ, городэ ӧй кошкы - гуртэ,  колхозэ кыли. Мыным, дышетскем муртлы, выль трактор сетӥзы. Ужлэсь ноку ӧй палэнскы, колхоз понна тырши. Кузпалъяськи, Петька пимы будэ.
Судъя:
- Кирилл Иванович, тани туннэ тӥледыз ас тодэмдыя, нокинлэсь юатэк-вератэк колонка пуктӥды но улӥе лэзиськиды шуыса янгыше уськыто. Асьтэос асьтэдыз янгышен лыдъяськоды-а?
Кирла:
- Нырысь уг вал. Нош али воксё сураськи. Ваньмыз мынэсьтым палэнтӥсько. Юри тупатэм кадь, ваньмыз «кошкисез мед кошкоз» шуо. Нош кытчы мон кошком? Малы?
Эх, чёртлы-а кулэ вал со колонкаез укно улэ кыскыны? Катяез жаляса озьы лэсьтӥ.
Янгыше уськытӥсь:
- Нош пересь Мартын кышноез кин жалялоз? Катяед пинал на, чырткем, нош Котныр кенак губыр-губыр вулы ветлэ.
Кирла:
- Гурт калык мыным тау мед кароз, гужембыт траншеяос гудӥ, уйме кӧлатэк,  фара пиштэмъя но ужай - ваньмызлы ӟеч карыны тырши.
Янгыше уськытӥсь:
-Нош малы, гожтэм договорез тӥяса, аслад юртэд дорозь траншея гудӥд? Колхоз тракторез но аслад кожад-а?
Кирла:
- Мон талэсь трос  номыр уг ни вера.
Судья:
- Тӥляд вань сыӵе праводы, пукселэ. Судэ лыктэмын адӟисьёс, мукет геройёс.
Янгыше уськытӥсь:
-Курисько  колхозысь парторгез Муканов Сергеез ӧтьыны.
Парторг:
- Кирилл Иванович ассэ ачиз укыр яратэ. Индивидуалист со – вот кин! Солы гинэ мед луоз. Нокинэн кенешытэк, ваньзэ ачиз сяменыз лэсьтӥз. Кин солы сыӵе право сётӥз? Соин ик, ӧжыт мед визьмаськоз шуыса, правлениын ми кенешим но  солы штраф сётӥм, ӝыны арлы тракторезлэсь люким. Нош со вылтӥяськыса, куатаськыса, аслэсьтыз вогзэ вормытэк, колхозысь ик кошкиз. Кошкиз бере  кутыса ӧм возе – кошкисез мед кошкоз, ужась сюроз.
Утись:
- Вералэ вал, нош колхоз понна Кирла мар ке  умойзэ лэсьтӥз-а?
Парторг:
- Бен, лэсьтӥз. Кирла – колхозын усто механизатор вал, котьку азьпалан ветлӥз. Соин но, дыр, йырзэ вылэ урдӥз. Нокинлы вератэк райцентре кошкиз. Йыбырттэммес, тэльмыреммес возьмаз, лэся.  Берланьяськись адямиос милемлы кулэ ӧвӧл.
Судья:
 - Юанъёсты вань на-а? Соку залэ ӧтём мукет адӟисез, Васильева Екатеринаез. Тӥ мар вераны быгатоды та ужъя?
Катя:
- Мон Кирла сярысь номыр уродзэ ӧй верасал. Ялан колхоз понна тыршиз, гыриз, кизиз, нянь будэтӥз. Кӧня премиос, грамотаос басьяз! Семья куспамы но ваньмыз умой вал: усто юрт пуктӥз, укно уламы писпуос мерттӥз, пимы будэ.
Утись:
-Кирла азьвыл юылэ-а вал? Может пидэс, асьтэдыз  ултӥя  вал?
Катя:
- Азьвыл ӧз шӧдӥськылы. Вуэн луэм учыр бере гинэ  ке шат: пимылы, кин тӥледыз сюдэ-вордэ шуыса, допрос лэсьтӥз, яратоно кучапизэ ӵыжыса лэзиз. Азьло со сыӵе ӧй вал , монэн но лякытгес вал.
Судья:
- Юанъёсты ӧвӧл ке, кыл сётом янгыше уськытӥсьлы.
Янгыше уськытӥсь:
- Васильев Кирилл Иванович, со ик Кирла, янгыш луэ аслаз малпаськытэк лэсьтэм вамышеныз но урод сюрес вылэ кожеменыз. Котькин но ассэ гинэ тодыса, монъяськыса, куатаськыса, йыбыртъямез возьмаса  улӥз ке – кытчы соку вуомы? Сыӵе адямиослэн весь кузязы ветлыса улӥмы ке, соос уката но йырзэс урдозы, огпол договорез тӥялозы, собере колхоз ваньбурен кузёяськыны, лушкаськыны кутскозы…
Утись:  
- Мон сямен Кирла чик но янгыш ӧвӧл. Сое таӵе сюрес вылэ вуттӥзы вылӥын пукисьёс, кивалтсьёс. Сокем ӟеч кузпал, сюлмаськись атай, азьмынӥсь механизатор, музъемлэн зэмос кузёез  син азьын куашканы кутскиз. Я вералэ ай, кинлы урод лэсьтӥз Кирла, вуэз ас палаз кыскыса? Мартын кышнолы ке шат? Нош со уг ӝожтӥськы ук, наоборот, мукет кышноос сямен ик шумпотэ: вулы табере нюк улэ васькано, ведра карнанъёсын гурезьтӥ тубоно  уз луы ни. Аслэсьтыз кышнозэ жалям, солэсь ужзэ капчиятэм урод шат? Ву кыскыны мултэс трубаос понна со ас кисыысьтыз уксё тыриз ук. Нокинлэсь номырзэ ӧз куры, ваньзэ ачиз утчаз, шедьтӥз, лэсьтӥз, мастерез но сектаз на.
Янгыше уськытӥсь:
- Туннэ нуналэ  со «взятка» шуиське. Со понна но Васильевлэсь кылзэ юано.
Утись:
- Нош мон сямен, колхоз возиськыны кулэ самой таӵе Кирла кадь адямиос вылын: тыршись, ужась, сюлмаськись. Кирла - юртсэ, гуртсэ, семьязэ юн яратӥсь адями. Со мур куректэ, малпаське, янгышсэ но вала. Кызьы трос пол пусйимы ни, Кирла колхозысь устоез механизатор вал. Котькуд адямилэн улоназ янгышъёсыз луо. Адямилы дыраз юрттыны, валэктыны кулэ. Гылыт сюрес вылэ султыны  капчи, нош вӧзад тонэ валась муртэд ке ӧз ке луы, усед, вӧсь луод. Ас вакытаз ужась адями шоры озьы учкемен но, дыр, туннэ нуналэ колхозъёсын ужась киос уг тырмо, егитъёс гуртэ уг кылё.   «Кошкисез мед кошкоз, кутыса ум возе» шуэменызы, Кирлалэсь осконзэ чигизы, адямиез, музъемлэсь кузёзэ быдтӥзы.
Судья:
- Кинлэн кыӵе веранэз, ватсанэз луоз на?
Кыл сётомы присяжной заседательёслы. Туннэ тӥ азьын вить юан:
(Котькуд юанлы пиналъёс асьсэлэсь малпанъёссэс верало. Татын но пӧртэм мылкыдъёс, малпанъёс шӧдӥськизы. Тани соос пӧлысь куд-огез:)
1.    Янгыш ик-а Кирла?
- Мон соглаш луисько янгыше уськытӥсен. Зэмзэ но, ас тодэммыя, мылкыдмыя ваньмы улыны кутскимы ке, янгышмес валаса вылысь куатаськыса, вормытъяськыса улӥм ке – мар соку луоз, кин  колхозын ужалоз, ю нянь будэтоз? Кирла янгыш луэ ассэ укыр вылэ пуктэменыз но соин валче улӥе лэзиськеменыз.
- Ӧвӧл, Кирла янгыш ӧвӧл. Янгыш бюрократической аппарат, вылӥысен ик кутскыса. Сюрсъёсын уллямын вал Кирла кадьёс, соосын ӵош быризы быдэс гуртъёс.  Нош музъем, сӥль, йӧл, нянь возиськылӥз но туннэ но возиське на Кирла кадь сюлмо тыршись адямиос вылын.
2. Маар тӥ карысалды Кирлаен?
 - Мон сямен, колхоз правленилы сокем чурыт кариськоно ӧй вал, Кирлалэсь  кылзэ гинэ но юаса тырмысал, яке кыкетӥяз собраниын тупатскыны, выльысь колхозэ берытскыны луонлык сётоно вал.
- Мон сыӵе ужась муртэ, азьмынӥсь механизаторез нокызьы но тракторезлэсь ӧй люкысал. Нош азьланяз визь мед луоз шуыса, одно ик штраф яке выговор сётысал.
3. Мар карысалды Кирла интыын?
- Кирла интыын мон нокытчы ӧй кошкысал. Трактор сяна, мукет уж но сюрысал ук. Воксё сьӧлыктэм ке луысал, соку ини мукет ужпум.
-  Кирлаез сокем обидизы бере, мон со интыын семьяме ик кутыса райцентре кошкысал. Сыӵе тыршись, котькыӵе ужлы кибашлы адямиос нокытын но уз быре, улон но ужан инты но шедьтозы.
4. Мар огазея Кирлаез но «Вуж юртысь» Кабышевъёсты?
- Кабышевъёс сямен ик, Кирла Васильев аслэсьтыз улонзэ ачиз лэсьтыны тырше. Мон сямен,  музъемлэн зэмос кузёез сыӵе ик луыны кулэ.
5 Авторез туннэ вӧзамы луысал ке, кыӵе юан яке дэмлан солы сётысалды?
- Кин палан луысал автор туннэ нуналэ? Кыӵе вал мылкыдыз, вероссэ гожтыкуз?
- Малы автор пырак уг вера: кошке ик-а Кирла яке выльысь колхозэ берытске?
- Мон авторлы таӵе дэмлан сётысал: Кирлаез ляб шуыса ӧвӧл возьматоно. Мукет ужын со ассэ уката но умойгес мед возьматысал, уж но ӟечсэгес мед шедьтысал.
- Ваньмыз туж зол гожтэмын, возьматэмын. Одӥг кылзэ но ӧвӧл воштоно. Сотэк та верос такем тунсыко, малпаськытӥсь ӧй луысал. Урокмы но мӧзмыт ортчысал.
Судья:
-Озьыен, вань веранъёсты кылзыса, присяжной заседательёслэсь валэктонъёссэс лыдэ басьтыса, суд таӵе малпанэ вуиз:
1.  Г. Д. Красильниковлэн «Кошкисез мед кошкоз» веросысьтыз Васильев Кирилл Ивановичлэсь ужзэ быдэстымтэен лыдъяно но сое эскерыны сётоно вуоно лыдӟисьёлы, соос  мед малпаськозы но дунъет мед сётозы лыдӟем произведенилы, кылдэм юанъёссылы валэктон мед шедьтозы.
2. Г. Д. Красильников  удмурт писательёс пӧлысь одӥгез устоез писатель-психолог луэ, кудӥз понна нырысетӥ интыын сылэ адями, солэн малпанъёсыз, ужъёсыз, пуш дуннеез. Солэн произведениосыз адямиез мур малпаськыто, ортчемзэ туалаеныз ӵошатыны юртто. Дыр ортчемъя, улон азинскемъя, произведение шоры пӧртэм сямен учкыны луэ. Озьыен, зэмос искусство ноку уг вужмы.
- Курисько ваньдэс султыны. Таин  урок-судмы йылпумъяськиз. Ваньдылы тау.

Вход на сайт

Поиск

Календарь

«  Южтолэзь 2024  »
ВордПукВирПокУдмКӧсАрн
    123
45678910
11121314151617
18192021222324
25262728293031

Статистика


Онлайн всего: 1
Куноос 1
Пользователей: 0
Copyright MyCorp © 2024 | Бесплатный конструктор сайтов - uCoz