Ӟучсэ кылэз дышетытэк, шуггес луэ йыг-йыг вамышъяны. Нош аслэсьтыд кылдэ яратытэк, мукет кылэз уд дышы гажаны!  (Д. Яшин)

Конюхова В. В.

Фразеологической кыл сочетаниос,  7 класс.

Уроклэн мугез: фразеологической кыл сочетаниос сярысь валан басьтон; соослэсь кулэлыксэс возьматон;  нылпиослэсь вераськон кылзэс узырмытон.

Уроклэн мынэмез:

   Асьмелэн удмурт кылмы туж узыр. Кылсярысь, одüг маке  сярысь ик асьмеос тазьы вераны быгатüськом:

1.Ма вераны тодытэк, туж возьдаськи.
2.Ма вераны тодытэк, му пыр вияны дась вал.

    Кыказ ик предложениын одüг  состояние сярысь вераське. Одüгезлэсь пуштроссэ валаны капчи, малы ке шуоно,  огшоры кылъёсын гожтэмын.    Нош мукетаз мудрон выражениез вань. Самой со мудрон веран ( му пыр вияны)  фразеологической кыл сочетание луэ.  Сыче кыл сочетаниос огшоры  вераськонамы  трос. Соослы ик сизёмы асьмеос туннэ урокмес.

 - Та валатонэз адӟыса, кыӵе юанъёсты кылдüзы, нылпиос?

Нылпиос ӵемысь таӵе юанъёс сёто:

1. «Фразеологизм» кыллэн пöрмемез.
2. Ма со фразеологизм?
3. Кычеесь соос луо?
4. Малы соос кулэ?
  -Та юанъёсты бордын туннэ ужаломы.

«Фразеологизм» кыл  удмурт кылэ ӟуч кыл пыр грек кылысь вуэмын.

Фразеология - фразис (phrasis)-выражение + логос (logos) - учение.

    Учебникысь фразеологизм сярысь правилоез лыдӟиськомы.

-Фразеологической кыл сочетаниос туж уно. Соосын мургес тодматскыны быгатоды «Средства образного выражения в удмуртском языке» книгаын. (Дышетӥсь книгаез возьматэ.)

     Нош али  фразеологизмъёсын  матынгес тодматском. Доска вылын гожтэмын таӵе  фразеологической кыл сочетаниос:

 Кобызэ кока –
Пыдзэ но уг лёга-
Кеньырез уг пöзьы
Лы но ку-
Куко миндэр-
Пöсь табань сюдыны-

     Нылпиослы  та верамъёслэсь  пуштроссэс валэктоно.

 Нырысь соос нокыӵе юрттэттэк тыршо. Шугъясько ке, дышетüсь доскалэсь мукет палзэ усьтэ (отын вань та фразеологизмъёслэн валэктонъёссы, соос сураса-пожаса сётэмын). Кылсярысь, начар, ужез уг мыны, уг ветлы (уг вуылы), таза адями, ымныре (баме) чабкыны, вераськыса уг дугды.

 Бöрысь кылдэ таӵе суред:
Кобызэ кока- вераськыса уг дугды;
Пыдзэ но уг лёга - уг ветлы(уг вуылы);
Кеньырез уг пöзьы -  йырыз уг ужа;
Лы но ку- начар, восьтэт;
Куко миндэр - таза адями.

   Таӵе уж быдэстüськом.

Тодмано, кудаз предложениын фразеологизмез вань, солэсь пуштроссэ валэктоно.

Предложениос:

1. Анае туннэ чукна  монэ пöсь табанен сюдüз.
2. Анайме öй кылзӥськы но, со монэ пöсь табанен сюдüз.
3.Пичи Коли пыдзэ уг лёгы ай.
4. Городэ кошкизы но пыдзэс но уг лёго ни.  
(2,4 предложениос:  Анайме öй кылзӥськы но, со монэ  бамам чабкиз. Городэ кошкизы но уг ни бертало.)

   Куд-ог фразеологизмъёс юн герӟаськемын калыклэн вашкала улонэныз.

Со сярысь  лыдӟиськомы учебникысь 373 ужез. (Пу гырлы, тыл дуре кадь гинэ ветлыны фразеологизмъёслэсь пöрмемзэс тодüськомы.)

     376 ужез лыдӟыса гинэ быдэстüськомы, котькуд фразеологической кыл сочетанилэн пуштросэныз тодматскиськом.

     Тросэзлэсь  удмурт фразеологизмъёслэсь ӟуч парзэс шедьтыны луэ, кылсярысь:  кукыз чигымон кошкыны – бежать сломя голову; кылдэ бералтод- язык сломаешь но мукет.

    Дышетüсь таӵе  уж сётэ (нылпиос группаен ужало):

Шедьтоно удмурт фразеологизмъёслы ӟуч паръёс, соосын предложениос гожтоно (карточкаосын ӟуч паръёссы гожтэмын öвöл).

1группа.

Йырез ошыны-                                       Повесить голову

Киыз лыдэ-                                             Руки чешутся

Кабезъя кутэз-                                        По Сеньке шапка

2 группа.

Бакча сульдэр кадь-                                    Как пугало огородное

Дунеез саптаны-                                         Небо коптить

Лачмыт мурт лек куртче-                          В тихом омуте черти водятся

3 группа.

Зöк кисы-                                                     Толстосум

Кисьмам уднянь-                                         Недотёпа

Ки улаз уж берга-                                        В руках работа спорится

   Ужзэс эскериськом, быдэстымтэ ужъёсты пумозяз вуттüськом.

    Верано на эшшо, фразеологизмъёслы синоним но антоним шедьтыны луэ шуыса,  кылсярысь: 

Коть му пыр вия - возьдаськыны, керпотыны;

Миськем сяртчы кадь - чебер, чылкыт;

Толалтэ но лымызэ жаля - кöттырмостэм .

    Фразеологизмъёслы луэ на шедьтыны антоним, кылсярысь:

Пиньёс ваче уг вуо - шоканэ пытсаськиз ни (кезьыт - пöсен шоканы уг луы);

Пожаре кадь дыртыны- кукызлэсь кукыз уг вырӟы (ӝог лыктыны- каллен лыктыны),

Пуась коньы - выжы лэзьыны ( улон яке ужан интызэ ӵем вошъясь  адями - одüг улон, ужан интые ӝот-ӝот интыяськыны). 

            Уроклы йылпумъян:  

            Тани кöня тодüмы асьмеос фразеологизмъёс сярысь. Нош али ваньзэ тодамы вайыса, тыршомы фразеологизмъёсын текст гожтыны. (Та уж капчи öвöл, соин ик ваньмыз сое быдэстыны уг быгато.)

Быдэстэм ужъёсты класс азьын лыдӟиськомы.

     Кылсярысь:        Мынам туннэ нуналэ мыдланяк ортчиз. Чукна ик паллян пыд  вылам лёгиськиськем, лэся. Дорысь потэм бере ик, бускеле  азьын канжаськыса уси, соин  му пыр вияны дась вал. Со мар ай! Школае  мукет книгаосме вайиськем. Доска доры öтизы но, кутски ук уяны…  Урокме вераны öй быгаты. «Кык» басьтü. Доре бертü но, анае пöсь табань сюдüз.

    Озьыен, таин ужмес йылпумъяськом. Урокъя вывод лэсьтüськом.

«Фразеологизм» кыл грек кылысь луэ. Фразеологизмъёс - со переносной значениен кутüськись лэчыт (образной) верамъёс. Фразеологической кыл сочетаниос значенизыя тупало огшоры верам кылъёслы. Озьы пöрмыло синонимъёс. Соослы луэ на антонимъёс но шедьтыны.  Трос фразеологической кыл сочетаниослы ӟуч парзэс  шедьтыны луэ. Фразеологизмъёс  улонамы туж ӵем кутüсько, соос вераськонмес лэчытгес, чебергес, яркытгес каро.

   Гуртэ уж.

Ас мылкыд каремзыя бырйыса, ӵектэм ужъёс пöлысь одüгзэ быдэстоно:

1. Кöня ке фразеологизмъёс бырйыса, соослы тупась суред лэсьтоно.
2. Нимысьтыз фразеологизмлэсь пöрмемзэс  валэктоно.
3. Фразеологизмъёс кутыса, текст  гожтоно.

Уже кутэм литература:

1. Средства образного выражения в удмуртском языке / Сост. К.Н.Дзюина.- Ижевск, 1996.
2. Удмурт кыл. 6-7-тü классъёслы. 3-тü изд./ Сост. Г. Н. Никольская,   И. В. Тараканов. - Ижевск, 2005.