Ӟучсэ кылэз дышетытэк, шуггес луэ йыг-йыг вамышъяны. Нош аслэсьтыд кылдэ яратытэк, мукет кылэз уд дышы гажаны!  (Д. Яшин)

Шарыпова Л. В.

Творческой мастерской, 5 класс

Сӥльвирдэ кыдатод – висёнлэсь палэнскод

Пуктэм ужпумъёс:

 - пиналъёслэсь творческой быгатонлыкъёссэс азинтон;

 - ас малпанъёссэс шара вераны дышетон;

 - тазалыкез кыдатон, юнматон сярысь кенешон;

Уроклэн мынэмез:

 - Ӟечбуресь, пиналъёс. Кыӵе мылкыдды? Уд-а висиське? Туннэ асьмеос вераськомы тазалык сярысь. Ужаломы мастерскойын, группаослы люкиськыса. Тӥ азьын листок но фломастеръёс. Листоктылэн шораз гожтэ ТАЗАЛЫК кыл но малпаське, кыӵе буёлэз кутоды.

 - Кыӵе буёлэз кутӥды но малы?

 - Табере та кыллы быръе кылъёс-ассоциациос. Ма син азяды пуксе тазалык шуиськомы ке? Кутыны луоз прилагательнойёсты но.

Самоконструкция (асьсэ понна ужало)

Социоконструкция (кылъёссэс ог-огзылы лыдӟо)

Социализация (котькуд группаысь одӥг мурт вераське)

 - Озьыен, тазалык – со куке ваньмыз умой, мылкыд капчи, яркыт шунды пиштэ. Али мон группаослы сёто пичи ӵуж круг но тылсиос, нош тӥ кылдытоды шундыпиос. Тылсиосаз гожтоно, кылъёсты пӧлысь бырйыса, тӥ сямен, самой кулэзэ, дунозэ гинэ.

 - Нош али интыеныды воштӥське но учке эшъёстылэсь шундыоссэс. Чебер-а? Табере шедьтэлэ ТАЗАЛЫК кыллы антоним – ВИСЁН.

 - Нош али син азяды пуктэ таӵе суредэз. Шӧдтэк шорысь тӥ висьыны кутскиды. Киостэс-пыдъёстэс выретэмды но уг луы, сюды куасьме, ньылонды висе – вераськемды но уг луы. Мугорды ӟырдамын. Шудыны но школае мынэмды уг луы. Туж секыт тӥледлы.

 - Учке шундыды шоры но малпаське, воштӥськоз-а со, висён ке тӥледыз погыртӥз? Кыӵе луоз со? Кылёз на-а тылсиосаз гожтэм кылъёсты? Я, возьматэ ай шундыдэс.

 - Нош али выльысь ас интыосады пуксе но учкелэ асьтэлэсь шундыдэс. Кыӵе яркыт пиштэ вал, нош али? Пиналъёс, ойдолэ табере малпаськом. Нош мар меда кароно, тӥ ноку медад висе шуыса? Гожтэ листокады кыл сочетаниос.

Самоконструкция (асьсэ понна ужало)

Социоконструкция (кылъёссэс ог-огзылы лыдӟо)

Социализация (котькуд группаысь одӥг мурт вераське)

 - Озьыен, туннэ мастерскоймес нималом: «Сӥльвирдэ кыдатод – висёнлэсь палэнскод». Ӧвӧл-а тодмотэм кылъёсыз? Ваньмыз-а валамон? Вералэ, кызьы нимаськомы калык кылослэсь таӵе вакчи веранъёссэ, визьноданъёссэ?  (визькылъёс)

 - Тодады вае тазалык сярысь визькылъёсты.

 - Нош али мон тӥледлы сёто кылъёс. Тӥ соосын кылдытоды тазалык сярысь выль визькылъёс. Кудӥз группа ӝоггес шедьтоз но доска вылэ ошоз со визькылэз. Тодады возе, одӥг кыл мултэс луыны кулэ. (асьмелэн, киосамы, асьмелэн, висёнлэсь, тазалыкмы)

(чылкыт, таза, улод, луод, шыкысэ)

(зарниен, уд ватскы, уд вошты, тазалыкез)

 - Молодцы! Учкелэ али кылем кылъёсты шоры. Оло, соослэсь но маке пӧрмоз. (Висёнлэсь шыкысэ уд ватскы)

 - Табере текстъёсъя ужалом. Тӥ азьын текст. Лыдӟе но йыръян сётэ. Кыӵе темаез но валтӥсь малпанэз? Пуштросэзъя малпанъёстэс вералэ. Кин татын шонер?

«Улонлэн режимез луыны кулэ. Одӥг вакытэ кӧлыны выдоно, одӥг вакытэ султоно, дырыз дыръя сиськоно, дырыз дыръя урокъёсты дасяно», - ялан пыкылэ анае.

«Ӵукнаосы зарядка лэсьтоно, спортэн эшъяськоно, тренировкаосы ветлоно», - весь дышетэ физкультураен дышетӥсьмы.

«Толалтэ куасэн, салазкиен нискылано, чылкыт омырен шокано», - индылэ классэн кивалтӥсьмы.

«Ваньзы весь косъясько, дышетэм каро. Акыльтӥз ини. Мон ачим тодӥсько мар мыным кароно но ку кӧлыны выдоно», - йыркуръяське Денис.

Самоконструкция (асьсэ понна ужало)

Социоконструкция (кылъёссэс ог-огзылы лыдӟо)

Социализация (котькуд группаысь одӥг мурт вераське)

 - Табере кыкетӥ текстъя ужалом. Лыдӟе но сётэ йыръян. Кыӵе темаез но валтӥсь малпанэз? Типезъя кыӵе луоз та текст?

Тазалыкез асьмеос котьку но нырысь интые пуктӥськомы. Таза нылпи, таза дышетӥсь гинэ дышетон удысын ӟеч емыш сётозы. Соин ик школа азьын одӥгез валтӥсь ужпум луэ: будӥсь нылпилэсьтазалыксэ утён но сое юнматон. Та понна школаямы ӟеч луонлыкъёс кылдытэмын. Кылсярысь, котькуд ӵукна, урокъёсы мынэмлэсь азьло, пиналъёс шулдыр крезьгуръя лэсьто зарядка. Урокъёсын но ӟеч радяъмын физкультминуткаос. Пиналъёс медаз жаде шуыса, школаямы радъясько оздоровительно-творческой арняос. Нимысьтыз тазалыклы сӥзем нуналъёс но луо.

Тужгес но висъям потэ на нылпиослэсь спортэ кыстӥськемзэс. Школаын 60% пиналъёс мылысь-кыдысь ветло спортивной секциосы, пырисько пӧртэм ӵошатсконъёсы. Ёросамы гинэ ӧвӧл, элькун ӵошатсконъёсын но вормисьёс радын ветло. Тӥни озьы пиналъёс кыдато но юнмато тазалыксэс.

Самоконструкция (асьсэ понна ужало)

Социоконструкция (кылъёссэс ог-огзылы лыдӟо)

Социализация (котькуд группаысь одӥг мурт вераське)

 - Текстын асьме школамы сярысь вераське. Ойдолэ ӟеч сямъёсмес ум вунэтэ но, партаосмы сьӧрысь потыса, физкультминутка лэсьтом.

Ӵукна вазь мон султӥсько

Но зарядка лэсьтӥсько.

Интыям лёгаськисько,

Киосыным шудӥсько,

Чик уг жаляськы кусме

Выретӥсько чыртыме,

Лудкечпи кадь тэтчасько

Пельпумъёсме ӝуткасько.

Сӥльвирме кыдатӥсько

Висёнлэсь палэнскисько.

 - Шонер. Текст типезъя рассуждение луэ. Нош кызьы валады? Ойдолэ ӝогак гинэ тодамы ваёмы, кыӵе люкетъёслэсь кылдэ рассуждение. (верамзыя доска вылэ схемазэ возьматоно)

 - Табере мастерскоймылэсь темазэ йыръян карыса, гожтыны дасяськомы сочинение-рассуждение. Кутыны быгатоды доска вылысь визькылъёсты но, текстъёсысь асьтэлы кельшем куд-ог чуръёсты но. Нош сочиненидэс гожтоды дорады.

 - Таин мастерскоймы йылпумъяськиз. Суредалэ табере листокады юн тазалыко, капчи мылкыдо адямиез но ошелэ суреддэс ваньзылы адӟиськымон интые.