Ӟучсэ кылэз дышетытэк, шуггес луэ йыг-йыг вамышъяны. Нош аслэсьтыд кылдэ яратытэк, мукет кылэз уд дышы гажаны!  (Д. Яшин)

Михайлова Н. А.

Сложной предложениос, 9 класс

Пуктэм ужпумъёс. Сложной предложениос сярысь ортчемез юнматоно, соосты ог-огзылэсь висъяны быгатоно; сочинительной но под­чинительной союзъёсты тодэ ваёно, уже кутыны быгатоно.

Кутэм материал. «Семья» суред, перфокартаос, текстэн плакат, песянайлэн гожтэтэз, союзъёс сярысь выжыкыл, союзъёс, предложениослы схема, переносной доска, диск.

Уроклэн мынэмез.

Урок кутске Н.  Постниковлэн «Нэнӥелы»  кырӟанэныз   (дискысь лэзёно).

—       Туж ӝож кырӟан, нош макем сюлэме пырымонэсь кылъёс шедьтэм кылбурчи, анайлэсь сюлмаськемзэ возьматон понна. Та кырӟан юнме ӧз чузъяськы туннэ, со уроклэн пуштросэныз туж герӟаське.

Тӥ азьын, пиналъёс, «Семья» суред. Умой учке сое но вералэ, мае адӟиськоды суред вылысь?

—       Тыршыса, огкылысь уло, ог-огзылы юрттыса ужало.

—       Асьмеос но туннэ семьялы люкиськыса пуксимы. Куинь семья татын: кыкез пичиесь, куинетӥез бадӟым. Одӥг чуре пуксизы сложносочиненной предложениос, нош кыкетӥ но куинетӥ чуръёсы интыяськиз сложноподчиненной предложенилэн семьяез. Кызьы пуксиды, озьы ик ужалом. Туннэ тодамы ваёмы пӧртэм союзъёсын пӧрмем сложной предложениосты, соосты ог-огзылэсь висъяны но пӧрмемзэс валэктыны быгатэммес возьматомы.

Ортчемез тодэ ваён.

— Кызьы асьмеос тодмаськом простой предложениез? (Схемая учко. Собере доска вылысь 2 простой предложениосты эскеро).

1. Вашкала дырысен удмуртъёс нюлэсо шаерын уло.
2. Коркаоссэс соос вазен ик коръёслэсь лэсьтыны дышемын.

— Та предложениосысь шедьтэ подлежащейзэ но сказуемойзэ.

— Кыӵеесь та предложениос? Малы?

— Та предложениос сложной мед луозы шуыса, ма кароно? (Союзэн герӟано).

Предложениосты но союзэн герӟало но сложносочиненнойлы пӧрмыто (переносной доскаын но дасямын). Верало, малы сложносочиненной луэ со? Кыӵе союзъёсын пӧрме? (Союзъёсын карточкаез усьтоно).

Дышетӥсь «пичи семьяослы» вазиське.

— Тӥ, пиналъёс, ог-огдытэк улыны быгатоды-а?

— Быгатом.

— Кык простой предложениосты нимаз басьтыса валамон-а?

— Бен

Йылпумъян. Сложносочиненной шуо сыӵе предложениосты, кытын простой предложениос ог-огзэс уг валэкто, ог-огзылы уг пырисько но сочинительной союзъёсын герӟасько.

— Куинетӥ «семьямы бадӟым». Яна потӥзы кыкез нылпиосмы. Кылдӥз куинетӥ семья. Герӟасько-а та семьяос?

— Бен.

— Анай-атайзы соослы кулэ-а?

— Кулэ. Анай-атай но соослы кулэ, ог-огзылы но соос юртто.

— Главноез кыӵе семья?

— Кытын анай-атай улэ.

— Кыӵе союзъёсын пӧрме сложноподчиненной предложение? (Ве­рам беразы карточкаез усьтоно. Отысь простой предложениослэсь сложноподчиненной пӧрмыто. Со переносной доскаын но вань).

Йылпумъян. Сложноподчиненной  шуо сыӵе предложениез,  кытын одӥгез простой предложение мукетсэ валэктэ, солы пыриське но подчинительной союзэн но союзной кылэн герӟаське.

Юнматон.

— Выль семья кылдйз бере, анай-атай сюлмаське улон инты ся­рысь но. Выль корка пукто. Нош выль корка лэсьтонэз кызьы йылпумъяло? Корка пыронэн. Гуртоос, куноос саламен лыкто но верало: «Выль коркады шудо-буро мед луоз». Нош кызьы ортче корка пырон? Кыӵе сямъёсты соку чаклало? (Текстэз лыдӟо, соя ужало).

— Корка пырон — со корка ӝутонлы йылпумъян. Отчы ваньмыз кузьымен лыктэ: тусьты, тэркы, тусь...

Ӝӧк сьӧры нырысь ик матысь муртсэс кузпалэныз ӵош тӧре пукто, нош соослэсь азьло мумыкор сьӧры нокин уг мыны. Тӧроын пукись жӧк сьӧры пуксе ке, солы кускерттонэн «эгесам» бекче, пе, сётылӥзы. Сое пертчыса, аслыз керттыны, мусуреныз калыкез утялтыны, пе, кулэ вал. Ӝӧк вылэ ӟазеген ӝук вайыку, куноос нянь сукыри вылэ уксё тырылӥзы, выль корка шудо-буро мед луоз шуыса.

Кудӥз мумыкоре, кудӥз ӝӧк борды ыргон уксё шуккылӥзы, нош кудӥз уксёзэ кузё кышнолы сётылӥз. Собере кутске шулдыръяськон.

— Текстлэн кыче типез? (Описание). Малы со сётэмын? (Действиен глаголъёс трос пумисько).

Уж. «Семьяос» текстъя ужало, асьсэ группалы тупась предложе­ниосты гожто. Суредало схемаос, главной членъёссэ пусъё. Одӥг мурт доска дорын семья кыллы фонетической разбор лэсьтэ.

Ужзэс   йылпумъям   бере,   семьяосысь   «анайёс»   соосты   эскеро.

Дышетӥсь гожтэт лыдӟе. Песянайзы корка пыронэ лыктыны быгатымтэ, гожтэт лэзем.

«Муспотон нылъёсы но пиосы!

Выль коркады сӥё-дано, узыр-бай мед луоз, зарниен-азвесен пальккаськыса улоно-вылоно мед луоды. Мынам эшшо дэмланэ вань на, туала арын вунэто ни сое. Коркады пересьмытозяды ӟеч мед улоды шуыса, корка кузёлы сьӧд такаез курбон сётыны кулэ. Гулбечын така сӥль но ӝук сиёно, собере созэ но, тазэ но сиёндэс лыосын ӵош музъеме согыны кулэ. Та куронме быдэстӥды ке, мынам сюлмы туж каньыл луоз.

Тӥляд песянайды».

Уж: Семьяос устно шедьто асьсэлы тупась предложениосты.  Перфокартаосын ужало.

Ваньмыз 10 предложение:

1.        Корка шудо-буро мед луоз шуыса, куноос салам вайылӥзы.

2.        Ми палан та сямез «корка туй» шуо, нош тросэз «корка пырон»
нимало.

1.  Пу мумыкоре ыргон уксё шукко, корказы коръёслэсь ке ӝутэмыы.
2.  Гуртъёсын али кирпичлэсь но, пеноблоклэсь но коркаос ӝуто ни.
3.  Корка пуктыку, нырысь бугро ӵупо, собере веме ортчыто.
4.  Выль корка вуэ но, кузёос корка пыронлы дасяськыны кутско.
5.  Корка пуктон трос сюлмаськон вае бере, вакчи дыр куспын сое вуттыны нокин уг дырты.
6.  Тросэзлэн выль юрт пуктэмез потэ ке но, та секыт уж борды вань­мыз басьтӥськыны уг дӥсьто.
7.  Корка пуктыку, пересьёслэсь вашкала сямъёссэс чаклало но со­осты одно быдэстыны тыршо.

10.      Пу корка шуныт луэ, нош кирпич коркаез даурлы пукто.
Уроклы йылпумъян.

- Малы сложносочиненной предложениосты кык семьяен ӵошатыны луэ, нош сложноподчиненнойзэ — яна потэм семьяен?

Сочинительной но подчинительной союзъёсты медаз суралэ шуыса, «Союзъёс» нимо выжыкылэн тодматоно.

Урокын ужамзылы дунъет сётон.

Гуртэ уж. Туала корка пырон. Кызьы со ортче? Асьсэ чурзылы тупась быдэн 2 предложение гожтоно.