Ӟучсэ кылэз дышетытэк, шуггес луэ йыг-йыг вамышъяны. Нош аслэсьтыд кылдэ яратытэк, мукет кылэз уд дышы гажаны!  (Д. Яшин)

Мурина Т. С.

Прямой речез косвенное берыктон, 9 класс

 Пуктэм ужпумъёс. Валэктоно, мар со косвенной но прямой речь, дышетоно прямой речез косвенное берыктыны; калык сямъёсты тодэмзэс эскероно но муромытоно; шонср гожъяськыны дышетоно.

Ужан котыръёс. Сусыпу, ньылпу, пужым, кыз, лыстэм пужым вайёс; "Калык сямъёсты чакласа" книга но дидактической материал.

Урок тупа Быдӟым нунал (Пасха) азьын четверге ортчытыны.

I.         Темаез усьтон но урокын пуктэм ужпум

Туннэ асьмеос тодомы, ма со сыӵе косвенной речь, дышетском прямой речез косвенное берыктыны. Со сяна, муромытом калык сямъёсты тодэммес.

II.        Ортчемзэ тодэ ваён но юнматон.

1.        Лыдӟем кылъёсты гожтоно, удмурт кылэ берыктыса.
Лиственница, сосна, пихта, ель, можжевельник. (Лыстэм пужым, пужым, ньылпу, кыз, сусыпу).

Валэктоно гожтӥськемзэс, сложнойёссэ ултӥз гожен тодмостоно.

Ваньзы ик та писпуос лысо луо, лыстэм пужым гинэ, со толалтэлы "дӥсьсэ" куштэ. Нош сусыпу луэ куак. Ваньзы сямен ик соос мыно эмъяськыны.

Гожтэм писпу, куак нимъёс пӧлысь, кудӥз кутӥське калык йылолъёсын?

Валэктоно, ку но малы?

Пиналъёс верало, сусыпу вайёсты кулэм потон уе тыро ӧсъёс йылэ, укноосы, ыбесъёсы шуыса. Нош малызэ ваньзы валэктыны уг быгато.

2.        Вашкалаослэн малпамзыя, сусыпулэн, палэзьпулэн, пипулэн урод, алама кужымъёслэсь утись кужымзы, пе, вань.

Сусыпу сярысь веранэз эшшо будэтоно на. Со туж кема улӥсь будос: 300—400 арозь. Сусыпу — омырез чылкытатӥсь будос.

1 гектарез сутка ӵоже 30 кг фитонцидъёсты поттэ омыре, со тырмоз бадӟым городэз бактериослэсь чылкытатыны.

Емышез но, лысэз но, выжыез но мыно эмъюмлы, пӧртэм висёнъёслэсь йӧнатӥськыны (малярия, чесотка, лишай, ревматизм...)

Туннэ покчи арня, акашка дырозь куинь нунал кылемын на. Верано, маин герӟаськемын та нунал.

Графической диктант (предложениоссэ гожтытэк, пуктылоно знакъёссэ гинэ).

1)        Удмурт гуртъёсын солэн пӧртэм нимъёсыз пумиськыло: Кизнер но Вавож палъёсын — поркушуй, Балтаси ёросын — ведӥн ӝыт, Алнаш палъёсын — кулэм потон уй, уй пал ёросъёсын — великочетверик.

1):-,-,-,-.

2)        Мӧйыослэн верамзыя, та уе кулэмъёслэн лулъёссы, ведӥнъёс,
убиръёс, черъёс, пе, юмшаны пото, адямиослы но, пудолы но маке но урод
карон утчало.

2) :,,,,,,, ,

Валэктоно знакъёссэ, малы пуктэмын.

III. Выль тема бордын ужан.

1.        Урод кужымъёслэсь утиськон понна, мар-о меда кароно?

Мар верало со сярысь пересьёс, лыдӟоно доска вылысь. Доска вылэ дасямын предложение, знакъёсыз пуктылэмын ӧвӧл.

Ӵужае та уй сярысь вера Укноосы ӧсъёс йылэ йӧгу вылэ тырылӥськом вал сусыпуос. Гур пытсэт вылын сусыпуэз сутыса коркаез ӵынатӥськом, асьмеос но шокаськом.

Знакъёссэ валэктоно. Мар со сыӵе прямой речь? Прямой речьысь шедьтоно сказуемойёссэ, ивортоно, кӧняетӥ лицоысь глаголэн верамын.

Нош табере со сказуемойёсты ик пуктоно 3 лицое. Эсксроно, кызьы воштӥське предложение.

Ӵужае та уй сярысь вера, соос укноосы, ӧсъёс йылэ, куйы но йӧгу вылъёсы сусыпу тырыло вылэм шуыса.

¾  Малы та предложение косвенной речь луиз? Муртлэсь кылъёссэ воштыса верамы.

¾  Мае тодыны кулэ, прямой речез косвенноен воштон понна? Сказуемой прямой речен верам предложениын воштӥське 3 лицоысь глаголэн, озьы ик мукет луэ местоимениез но.

2.        — Со сяна, ма каро на вылэм кулэмъёс потон уе?

Котькуд дышетскисьлы сётоно прямой речен карточка, пиналъёс сое нырысь шара лыдӟо, пуштросэз бордын ужало, валэкто.

Собере, правилоез лыдӟыса, асьсэ понна берыкто косвенной рече.

1.    карточка. Анае, гидэ потыса, скалэз маялляса вера: "Ӟечоке, апае, сёт трос йӧлдэ».
2.       карточка. Атае мадьылоз вал: " Та ӝытэ ӵемысь пыӵал ыбылэм куараосты кылӥськом вал". 
3.    карточка. Песяй индылэ кензэ: "Та уез кема эн изьы, быдэс аред изьыса ортчоз, ужъёсыд уз пӧрме." 
4. карточка. Юрт кузё косэ анайзылы: " Уйлы ӝӧк вылэ пукты нянь сукыри, сылал но пӧзьтэм вина". 
5.  карточка. Пересь анае ӝыт бакчаяз потыса кесяське:" Кыше-кыше! Эн ӵабъялэ бакчаме".

Вылӥысь предложениосты пиналъёс косвенное берыктыса гожто. Кин ке уг быгаты, солы мукетъёсыз юртто.

Мар выльзэ тодӥды нылпиос, правилоосты лыдӟыса?

Обращениос, междометиос усё прямой речен предложениосысь, со вопросительной местоимениос союзной кылъёс луо.

Косвенной речен предложениос таӵеесь луо.

1.    карточка. Анае, гидэ потыса, скалэз маялляса вера, скалэз трос йӧлзэ мед сётоз шуыса.
2.   карточка. Атае мадьылоз вал, та ӝытэ соос ӵемысь пыӵал ыбылэм куараосты кылыло вылэм шуыса.
3.   карточка. Песяй индылэ кензэ, та уез со кема медаз изьы, быдэс арез изьыса ортчоз, ужъёсыз уз пӧрме шуыса.
4.  карточка. Юрт кузё косэ анайзылы, со уйлы ӝӧк вылэ нянь сукыри, сылал но пӧзьтэм вина мед пуктоз шуыса.
5.  карточка. Пересь анае ӝыт бакчаяз потыса кесяське, курегъёс мед кошкозы, убозэ медаз ӵабъялэ шуыса.

IV.      Выль темаез юнматон.

1.        231 уж (письменно): дидактической материалысь косвенной рече берыктоно, ужало асьсэ понна.

2.        348 уж (устно): прямой речез косвенное берыктоно.

V.       Доре уж: 347; 56.

VI.      Урокъя огъя йылпумъян лэсьтон.