Ӟучсэ кылэз дышетытэк, шуггес луэ йыг-йыг вамышъяны. Нош аслэсьтыд кылдэ яратытэк, мукет кылэз уд дышы гажаны!  (Д. Яшин)

Рябина О. В.

Юрттӥсь вераськон люкетъёсъя огъясь урок, 7-тӥ класс

Мугъёсыз. Послелогъёслэсь, частицаослэсь, союзъёслэсь кулэлыксэс валанэз юнматон; вераськонын но гожъяськонын шонер кутыны дышетон; удмурт калыклэн улоназ ӵушконлэн пӧртэм учыръёсы кутӥськылэменыз тодматон.

Ужан котыръёс. Р. Валишинлэн "Тӧл гурезь" книгаез; класс чеберъямын ӵушконъёсын, чалмаосын; "Кизили" журналъёс, Л.Христолюбовалэн "Удмурт калык сямъёс" книгаез.

Уроклэн мынэмез.

Чузъяське Р. Шкляевалэн но В. Романовлэн кырзанӟы. Нылъёс кырӟало нырысетӥ куплетсэ.

Кузь сюрес вылэ басьто мон

Пужъятэм удмурт ӵушкон.

Мӧзмыкум киям куто но

Ӵушконме учко, учко.

Дышетӥсь (кияз нянь колдыен ӵушкон возьыса). — Ӟечбуресь, пиналъёс! Ӟеч мылкыд но шудо улон тӥледлы! Пукселэ!

Кӧня пӧртэм ӵушконъёс, чалмаос чебер каро тӥлесьтыд класстэс. Асьмелэсь тодматсконмес но юнме тазьы ӧм кутске. Урокмес, озьыен, сӥзём ӵушконлы. Таӵе арбери, пиналъёс удмуртлэн улоназ вашкала дырысен трос пӧртэм учыръёсы кутӥськылӥз.

Нош урок куспын тӥ малпаськыны кулэ, малы мон ӵушконэн нянь кузьмай?

Асьмеос озьы ик тодамы вайыны кулэ юрттись вераськон люкетъёсты.

Ортчемез тодэ ваён.

Класслы юан.

1.Кыче кыл ёзэтъёс пыро юрттӥсь вераськон люкетьёс пӧлы? (части­ца, послелог, союз).

2.Малы соос "юрттӥсь" нимасько?

Кыкез дышетскисьёс ужало доска дорын. Одӥгез дышетскись предложенилы синтаксической разбор лэсьтэ.

Тӧдьы-тӧдьы дэра борды чебер пумъёс итэмын.

2-тӥ дышетскисьлы предложениысь частицаоссэ шедьтоно но верано, мае соос возьмато.

Тани таӵе арбери удмуртлэн улоназ вашкала дырысен пӧртэм учыръё­сы кутӥськылӥз. Малы кутӥськылэмезъя ик солы ним но сётэмын.

4 кузя дышетскисьёс ужало парта сьӧразы.

Уж. Точкаос интые тупась союзъёс пыртылыса гожъяло. Мае герӟало союзъёс? (Однородной членъёсты яке сложной предложенилэсь люкетъёссэ).

1-тӥ карточка.

Сое ӵушкон, бамӵушкон, бамкышет ... ӵушкон кышет шуо. Ӧтем куно возьмало..., ӵушконьёсты укноосы, синучкон вылэ, укноос вискысь ӵогъёсы ошылыса.

2-тӥ карточка.

Таоссэ куд-огъёсыз ӵушкон чалма, ӵоге ошон нималлязы, ... Кез палъёс кузькышет шуо. Соослэн кузькышетсы кык-куинь укпо йылтӥ сузьылӥз, ... алнаш палъёс котькуд укно йылэ нимаз-нимаз ошылӥзы.

Озьыен, ма карыны юрттэ союз? (Герӟаны).

Быдэс класслы уж. Гожъяно частицаосын предложениосты гинэ. Скобкаысь частицаосты шонер гожтыса поттылоно.

Сюанэ, бӧрысе мынӥсьёс букооссэс чалмаосын чеберъяллязы. Ку (ке) выль кенэз картэз доры ваё, солэн йыраз чалма понылӥзы. Бызьымтэ нылъёс чалма ӧз нуллэ. Чалмаез ваньмыз (-а) удмуртьёс нуллӥзы? Со лымшор палъёслэн гинэ сямзы. Сюанчиос пӧлысь одӥг мурт кияз позыртэм ӵушкон нуллэ, сюанчиослэсь кырӟамзэс эскере. Кин (ке) уг кырӟа — позыртэм ӵушконэн шлач! шукке. (Уже кутоно "Сюанчиос" туспуктэмез яке мукет суредэз).

Озьыен, малы кутӥське частица? (Кылъёслэсь но предложениослэсь кулэзэс пӧртэмгес каре яке выль кыл пӧрмытэ).

Нош али ужаломы Р. Валишинлэн "Тӧл гурезь" книгаезъя. Книгаосты ваньдылэн вань.

Люкиськиськом радъёслы.

1 рад усьтэ 47 бамез, 2-тӥ абзац; 2-тӥ но 3 радъёс — 63 бамез, вылӥысен 2 абзац.

Уж. Та люкетъёсысь мар тодыны луэ ӵушкон сярысь? Кыӵе учыръёсы со кутӥське на? Гожтоно быдэн 2 предложениос: послелоген но союзэн, 1-тӥ рад послелогъёсын, нош 2,3-тӥ радъёс — частицаосын но союзъёсын.

Нош кыкез дышетскисьёс со вискын ужало карточкаосын.

Уж. Точкаос интые кулэ послелогъёс ватсаса гожъяло. Малы кулэ послелог?

1    карточка.

Армие кошкись пилы, гуртэз син азяз мед пуксёз шуыса, ӵушкон кузьмало.

Акашка... Валэн ворттылӥсьёслы выль кенлэсь чалмазэ кузьмаллязы.

2    карточка.

Вӧсяськонъёс... вӧсясьёс тусьтызэс ӵушконэн кутылӥзы. Кузьмам ӵушкон — со кусыпъёсты герӟан ... синпель.

Сое ик малпаса, В. Романов но гожтӥз, луоз, ӵушконлы сӥзьыса кылбур.

Ӵушконэ, сузэр сямен ик,

Чыртыям но ошиськоз.

Вордӥськем анай сямен ик,

Бамъёсме но маялтоз.

Нош пужыоссэ учки ке,

Син азям гуртэ пуксёз:

Сяськаясь чагыр етӥн но

Вож нюлэс тодэ лыктоз.

Ужаськомы ас кожамы, вариантъёсъя.

Шедьтоно юрттӥсь вераськон люкетъёссэ:

1 рад — I куплет

2 рад — II куплет

Нош али кылзом нылъёслэсь кырӟамзэс.

Йылпумъян. Тӥни озьы, пиналъёс, адямилэн быдэс улонэз ӵушконэн юн герӟаськемын.

Адямиез берпум сюресаз келякузы но ӵушконэн нуо. Ӵушкон кулэм муртлы, пе, выж луэ.

Юанъёс:

1.   Малы куноосты пумитало ӵушкон вылэ нянь сукыри поныса? (Ӵушкон — адямиослэсь кусыпъёссэс герӟа, эшъяськытэ).

2.  Кыӵе учыръёсы кутӥськылэ ӵушкон но малы?

а)   коркаез шулдыртон-чеберман понна;

б)  сюан-йылолъёсты чакланы;

в)   пиез армие "келякузы;

г)   вордӥськем шаерзэ, анай-атайзэ тодаз мед возёз шуыса;

д)  вӧсяськон дыръя;

у) кузьым интые но мукет дыръя.

Гуртэ уж. "Ӵушкон — ӵыжы-выжыосты герӟась синпель" темая улонысь зэмос учыр сярысь верос гожтоно.