Ӟучсэ кылэз дышетытэк, шуггес луэ йыг-йыг вамышъяны. Нош аслэсьтыд кылдэ яратытэк, мукет кылэз уд дышы гажаны!  (Д. Яшин)

Смирнова Е. Г.

Адямилэсь вылтуссэ суредан

кыл волятон урок

Азькыл.

Ойдолэ ай учкоме ог-огмы шоры... Мае адӟомы асьмеос? Бугрес улонмылэн вужерез погыльске кадь ымнырмы вылтӥ но. Котькудӥз аслаз малпанъёсыныз, аслаз сюлмаськонъёсыныз гинэ улэ. Ум адӟиське бускельмылэсь куректонэн вотсаськем синъёссэ, ум шумпотӥське эшмылэн пачылмись мылкыдызлы, ум синйылтӥське дышетӥсьлэсь кӧсэктэм ымнырзэ...

Соин ик таяз урокамы вераськомы адямилэсь вылтуссэ суредан- возьматон амалъёс сярысь. Озьы асьмеос саклыкмес волятом но юнматом. Адямилэн ымнырыз, вылтусыз шоры учкыса, солэсь сямъёссэ, мылкыдзэ тодыны но валаны дышомы. Чеберлыко литератураын со портрет шуиське. Соин асьмеос тодматскимы ни. Али выльысь тодамы ваёмы.

Map со литературной портрет?

Малы со кутӥське чеберлыко литератураын?

(Татын эскерыны луоно улӥын сётэм чеберлыко произведениысь люкетъёсты. Вераськоно, кызьы, кыӵе амалъёсын суредало писательёс геройёссэс).

Kaйгy пыӵам сьӧд синъёсаз солэн паймон кылдӥз. Педор йырзэ ошиз но кыл но ӧз вера. Пыд азь музъем шоры синъёссэ вошъятэк учкыса, юбо сямен сылэ вырӟылытэк. (И. Дядюков, «Пашка Педор»).

Самой пичиез пиез — Туганай. Таиз агайёсыз кадь ӧвӧл. Со улонэз яратӥсь. Батыр кадь кужмо. Чебер, ӵуж йырсиё. Лыз ин кадь чагыр синмо. Уг яраты со егит пи кышкасьёсты, асьсэ понна гинэ сюлмаськисьёсты. Мылкыд солэн шукы кадь капчи — ялан кырӟа но вера. (В. Садовников, «Туганай но Зара»).

Чигнась горд частьёс шоры мӧзмыт учкыса, кенос вӧзысь кор вылын пичи пи пуке. Тӧдьы йырсиез тӧлъя каллен гинэ тӧла. Чебересь сьӧд сутэр синъёсыныз огинтые жальма со. Кузь лулӟылыса, кияз дукес пумзэ посэ. Малы ке но со зар-зар кӧсэктэмын. Со—Вася. (М. Коновалов, «Партизан»).

Тани али но пияш быдэс гуртэтӥ ортчиз. Ӟустари выллем ыштырен, пӧсьтэмкутэн кутчам пыдъёсыз кынмизы ни. Урдэг пӧзьёсыз но сокем ик уг шунто. Корка пырем бераз, со, янгыше усеем мурт сямен, бубиз шоры учкыны дӥсьтытэк ӧс доры дугдӥз. (М. Петров, «Гришалэн шудэз»)

Тӥни со адями… жугиз-а тонэ, ӧз-а, пегӟыкуд ыбылӥз-а, ӧз-а? Азинлэн лэчытэсь чагыр синъёсыз пыртӥ потымон учко. Ныр улаз пичи чуп кельтэм сьӧд мыйыкез выремысь дугдӥз. (Т. Архипов, «Ортчеменыз пумиськон»).

Пугачёв веранъяз задорме. Солэн бугыръяськись сюлэмыз ӟырдам тылын ӝуа. Чебересь синъёсыз лек луизы. Тусызъя ноку кышкамтэ, берлань чигнасьтэм муртлы укша. (М. Коновалов, «Гаян»).

Нош Р. Валишин «Тӧл гурезь» повестяз тазьы суреда Паволэз.

Павол нош ик ньыльпыдъяськыса ӝутскыны выре. Катьтэммем киосыз но пыдъёсыз сое возьыны уг ни быгато. Тани со йырзэ ӝутэ... йырсиез тугаськемын, ым пумтӥз вир кошке, нош синъёсыз бен кыӵе жальмыт учко, жальмыт но, со дыре ик кышкыт но. Бырись адямилэн кулонлэсь кышканэз гинэ ӧвӧл отын — сантэмасьёсты, эриктэмасьёсты адӟемпотостэм карон но. (Р. Валишин, «Тӧл гурезь»).

Адямилэсь вылтуссэ возьматыны-суреданы юртто калыклэн визьмо веранъёсыз, лэчыт кылъёсыз но. Кылсярысь:

Синзэ но уг кыньыръя.

Синме вераны.

Син куспаз ныро мурт (эскериськись)

Синмыз чиля, шудэ.

Синмыз ӝуа.

Синмыз уг вормы (кӧттырмостэм)

Синмыныз сие.

Син ултӥ учкыны.

Син чагыртыны (паймыны)

Синъёсыз тыл кисьто

Ымаз вӧй ӟузем

Ымаз ву кынме

Ымдуръёсыз ваче уг вуо (шумпотэ)

Ымзэ кутэмез уг луы (кыл вӧлдӥсь, супыльтӥсь).

Ымзэ сиктанэн но уд берыкты.

Ымыз пель дораз вуэмын.

Ымыз уг ворсаськылы.

Пельыз пась (ваньзэ кылэ).

Пась ым.

Паськыт син.

Паськыт ым.

Нырзэ ошиз.

Кылыз — пурт.

Кылыз пумем.

Кылыз сьӧлтаське.

Кылыз лыдэ.

Кылыз лэчыт.

Кыл тэчы.

Кыл пуйы.

Кыллы бырем.

Кылзэ шере.

Кый сюлэм.

Эгыр ӝуш.

Курыт губи кадь.

Курег йыр.

Серем турын куртчем.

Пыӵ кадь тэтча.

Адямилэсь мылкыдзэ возьматыны, ымныр туссэ яркытгес суреданы тужгес но юртто синъёс. Юнме шат калыкын веран но вань: «Синъёс — сюлэмлэн синучконэз» (глаза — зеркало души). Но асьмемыз синлэн буёлэз гинэ бордаз уг кыскы. Синъёс пыр тодыны луэ, мар малпало соос, маин тырмытэмын: шумпотонэн я куректон-кайгуэн.

Татын выльысь тодэ ваёно Р. Валишинлэсь вылӥын сётэм «Тӧл гурезь» повестьысьтыз люкетсэ.

Та люкетэз лыдӟыса, Паволлэн улонэз сярысь номыр тодытэк но, асьмеос валаськомы, макем секыт та воргоронлэн улонэз.

(Адямилэсь вылтуссэ возьматонын пиналъёслы юрттозы суредъёс бордын ужан но. Кылсярысь, классэн эскерыны луоно Перовлэсь «Тройка», Холмогоровлэсь «Бабушка Дарья Курбатова», «Матери» картинаоссэс но мукет).

Кылэз волятон бордын ужан.

Дышетӥсь лыдӟе синъёс сярысь определениосты, пиналъёс соосты 2 столбике гожъяло — нырысяз положительнойёссэ, мукетаз — отрицательнойёссэ.

Визьмо, буш, чылкыт, визьтэм, кескич, чебер, лек, сак, малпаськись, пиштӥсь, зэмлыко, паймись, задор, кайгуо, пыртӥ потымон, ӝуась...

Шедьтоно наречиосты:

кескич, чебер, лек, задор, каллен, меӵак...

Вераськоно эштылэн синъёсыз сярысь. Кыӵеесь соос, ма возьмато, ма вераны туртто?

Адямилэн синмаз учкыса верано. Соин ик удмуртъёс шуиллям:синме вераны. Верано адямизы сярысь аслаз бераз верано ӧвӧл, ас азяз ик верано.

Map тодӥськоды на синъёс сярысь?

Удмуртъёс шуо на: Синме учкыны курда.

Кин ке урод уж лэсьтӥз, яке дасяське гинэ ай, со син шоры учкыны уг дӥсьты.

Тетраде гожтоно: «Урод уж лэсьтэм адями синме уг учкы».

Адямилэсь ымнырзэ суредан (описать карон) —туж секыт ужпум.

Пиналъёс асьсэды асьсэос описать каро, но син туссэс, йырсизэс, нырзэс сяна, вераны уг тодо ни, соин ик нимысьтыз висъяськисьсэ номыр вераны уг быгато. Быдэс классэн эскерыны луоно кыӵе ке портретысь адямилэсь тусбуйзэ.

Умой луоз гуртазы анайзы я атайзы, сузэрзы я вынзы сярысь кылдытӥсь верос гожтыны уж сётыса.