Ӟучсэ кылэз дышетытэк, шуггес луэ йыг-йыг вамышъяны. Нош аслэсьтыд кылдэ яратытэк, мукет кылэз уд дышы гажаны!  (Д. Яшин)

Гаранькина Н. А.

Ижевск - Удмуртилэн шоркарез

Уроклэн мугез: приложениосты кутыса, чебер текст гожтыны дышетоно; шонер пусъёс пуктылоно; шаерез гажан но тодон мылкыд пыӵатоно.

Урокын кутэм материал: альбомъёс, чебер суредъёс, карта, доска вылэ гожтэмын кулэ луись нимтулъёс, лыдпусъёс, кылбур чуръёс.

Журналистлы нимысьтыз уж сётэмын: со юанъёс дася историклы, искусствоведлы. Соос класс азьын пуко. Ӝӧк вылын табличкаос, нош дышетӥсь словарной ужез валэктэ. Вераськон мыныку, мукет классысь пиналъёс асьсэлы кулэ луись иворез тетрадязы гожъяса мыно.

Журналист — историклы. Маде вал вакчияк вашкала Ижевск сярысь.

Историк. Рабочий посёлок лэсьтыны кутскизы 18 даурлэн шор вадесаз. 1760-64 аръёсы, А. С. Москвин инженерлэн кивалтэмез улсын, Иж прудэз лэсьтыны кутскизы. Сокугес ик ужаны кутско ыргон, корт, чугун кисьтон заводъёс.

Искусствовед. Ижевск ӝог будӥз. Вуоно городлэн валтӥсь архитекторез Семен Емельянович Дудин (1779-1825) вал. Солэн проектэзъя завод корпусъёс, арсенал юрт (али отын Кузебай Герд нимо йӧскалык музей), Александро-Невской собор ӝутӥзы. (Веракуз ик альбомысь суредъёсты возьматэ.)

Историк. Нош 1807 арысен Ижевскын ож тӥрлык поттон заводэз лэсьтыны кутскизы. Та ужъёсын кивалтӥз дано инженер Андрей Федорович Дерябин (1770-1820), солы Ижевскын памятник но вань.

Нош али Ижевскын пӧртэм пыӵал-тӥрлыкъёс потто, троссэ кунгож сьӧры но келяло. Тодӥськоды, дыр, М. Т. Калашниковез, та удысысь тужгес но дано луэм конструктормес.

Журналист. Эшшо кыӵе ваньбур потто на Ижевскын? (Пиналъёс верало: легковой машинаос, мотоциклъёс, радиоприёмникъёс, магнитофонъёс но трос мукет.)

Журналист. Ку Ижевск Удмуртилэн шоркарез луиз?

Историк. 1921 арысен Ижевск Удмурт Автономной областьлэн центрез луэ, собере арысь аре юнма, будэ, чеберске.

Журналист. Кыӵе институтъёс вань Ижевскын?

Историк. Ижевскын трос дышетскон интыос: Удмурт кун универси­тет, Эмакадемия, Сельхозакадемия, Техникая вылӥ университет, трос на колледжъёс, училищеос. Мылкыд карисьёс быгатозы Ижевскын пӧртэм ӧнерлы дышетскыны.

Литературовед. Эн вунэтэ: Ижевск — туж чебер город, солы сӥземын трос кылбуръёс. (Дышетӥсь ас мылкыд каремезъя произведенисоты уже кутэ.)

Журналист. Кыӵе театръёс вань Ижевскын?

Искусствовед. Ижевскын ужа Удмурт Йӧскалык театр, Драмая В. Г. Ко­роленко нимо ӟуч театр, Операя но балетъя театр.

Дыр кылиз ке, вераськыны луоз артистъёс сярысь но. Озьы ик куд-ог дышетскисьёслэн юанъёссы но луозы, дыр.

Собере дышетӥсь валэктэ, кыӵе жанрен, кызьыгес сочинение гожтоно. Нылпиос кыкетӥ уроказ сочинение гожто. Уроклы кулэ луись мате­риал ваньмыз сётэмын ӧвӧл, дышетӥсь ас мылкыдызъя быгатэ маке кулэзэ ватсаны.