Ӟучсэ кылэз дышетытэк, шуггес луэ йыг-йыг вамышъяны. Нош аслэсьтыд кылдэ яратытэк, мукет кылэз уд дышы гажаны!  (Д. Яшин)

Конюхова В. В.

Николай Байтеряков «Маин дуно» 5 класс.

  Пуктэм ужпумъёс: вакчияк тодматоно писательлэн улон но творческой сюресэныз;  дышетоно кылбур бордын ужаны, кык кылбуръёсты ӵошатыны ; вордӥськем шаердэ  яратыны, гажаны но дунъяны мылкыд пыӵатоно.
   Урокын кулэ луись арбериос:  Н.Байтеряковлэн туспуктэмез, магнитофон, компьютер, интерактивной доска, «Удмурт литература»  учебник, Н.Байтеряковлэн кылбуръёсысьтыз  чуръёс. (Соос нимысьтыз  группаен ужаны вылысь нимаз бичамын)

    Уроклэн мынэмез:

       Уроклэн кутсконаз чузъяське «Нёжало шаере» кырӟан. ( Крезьгурез Николай Постниковлэн, кылъёсыз Николай Байтеряковлэн. Учке ватсаса сётэм материалысь ).

      Кырӟан кылзӥськем бере нылпиослы юанъёс сётоно:
- Кельшиз-а кырӟан?
-Ма сярысь со? (Нылпиос верасько)
Нылпиос пуко группаосын. (группаын 4 адями)
Парта вылазы дасямын материал. (  Николай Байтеряковлэн вордӥськем шаерлы сӥзем кылбуръёсысьтыз  чуръёс. Учке ватсаса сётэм материалысь)
- Чебересь кылбур чуръёс. Тӥ монэн соглаш луоды, дыр, нылпиос. Нош ма сярысь соос?
Нылпиос верало, инкуазь, вордӥськем шаер сярысь шуыса.
-Кыӵе меда адями со чуръёсты гожтэм? 
Эшшо тодамы вайиськом урок кутсконын кылзэм кырӟанмес. Верасько, кырӟанлэн но кылбур чуръёслэн авторзы одӥг  адями  шуыса. Кин меда со? Кыӵе адями меда со?
Нылпиос верало, со адями туж  мур  яратэ но гажа аслэсьтыз вордӥськем шаерзэ шуыса. Доска вылысь туспуктэм шоры учко, Николай Байтеряков шуо.
  -Зэм но, туннэ асьмеос тодматскомы Николай Байтеряковен но пыр-почгес эскеромы солэсь эшшо одӥг кылбурзэ. («Маин дуно»)

      Н.Байтеряковен тодматскиськом солы сӥзем  презентацияя :

1 СЛАЙД: Николай Байтеряковлэн туспуктэмез.
ВАРЗИ дурысь кырӟась учы.

2 СЛАЙД:
Мае утчай, мае сюлэм куре,
Ваньзэ шедьтӥ, ваньзэ адӟи кадь мон:
Выжыкыллэсь но паймымон сюрес,
Выжыкыллэсь но чебергес улон.

3 СЛАЙД:
«… учкисько мусо вож туген пӧртмам сыръясь возь вылэз, ведь отын мынам кырӟанэ улэ». Отын, Удмурт шаерелэн пичи шур дураз, мон нырысьсэ кылбурай. Куректыса кылбурай- улонысь кошкиз анае. Мыным соку дас арес гинэ вал.

4 СЛАЙД:
Валай мон соку: улон чебер вылэм. Ӝож кылбуръёсме гуре куштӥ.

5 СЛАЙД:
Быдӟым ожез возьматӥсь суред.
Гудыртӥз быдӟым ож. Мон кошки фронтэ. Отын ик будӥ, юнмай. Тыл пыртӥ ортчи сюрс иськемъёсыз.

6 СЛАЙД:
Быдӟым Вормонэз возьматӥсь суред.
Улон понна сётӥз мынам эше
Ас улонзэ –тужгес секыт дунъет.
Соин дуно мыным та вож музъем,
Соин туннэ мон каргасько ожез.

7 СЛАЙД:
Зэмлык понна вордски дунне вылэ,
Зэмлык пыртӥ валай мон улонме.
Сюлэмысьтым ваньзэ кырӟанъёсме
Мон герӟалляй быдӟым зэмлык кылын.

8 СЛАЙД:
Ма быгатӥ – лэсьтӥ.

Н.Байтеряков котьку но котькыӵе дыре ноку ӧз вунэты, со Удмурт шаерысь шуыса. Писатель мур гажаз но сюлмысьтыз яратӥз вордӥськем палъёссэ. Озьыен, туннэ асьмеос  тодматском на солэн эшшо одӥг кылбуреныз.

Кылбур бордын ужан.

Кылбурез лыдӟисько ачим. (дышетӥсь) Собере лыдӟо нылпиос.

Кылбур  лирической. Соин ик тодамы вайиськом «лирической герой» валатонэз.  ( (Кутӥсько «мыным», «мон» 1-ти лицоысь местоимениос )

   Юан сётӥсько:
- Ма син азяды пуксиз, нылпиос?
(Возь, сяськаос, шуръёс, гужем, нюлэсъёс, тулыс, льӧмпу сяська, бусы, гырон вакыт,  шодӥськиз сяська зын, кылӥськиз уӵы куара)

    Та кылбурез гожтӥз воргорон. Шӧдӥське – а со?
( Нылпиос соглаш луо. Соос пӧртэм тунсыко валэктонъёс сёто. Тани куд-огез соос пӧлысь:

1. Пичи дыръя пиос олокытӥ но вуо.  Ошмес шеде ке син азязы, отысь ву юо. Соин ик таӵе чуръёс вань :
   «Угось татысь пичи дыръям
   Мон нырысьсэ дун ву веръяй».
2. Герыен ужа воргорон. Нылкышнолэн ужез ӧвӧл со. Тани таӵе чуръёсты вераны луоз:
   «Татын нырысь бороздаез
   Ортчи куке но герыен».
   Поти, кузё кадь, бусые,
   Зарни тысен кизи сое.

-Малы меда кылбур нимаське «Маин дуно»?
( Нылпиослэн верамъёссы:
- Лирической герой валэктэ, маин дуно солы вордӥськем палъёсыз;
- Солы дуно аслаз вордӥськем палъёсыз;
- Дуно инкуазез но, калыкез но;
- Солы дуно татын ваньмыз: шурез но, льӧмпуэз но, ас палъёсысьтыз уӵы гурез но, бусыез но;
-Мыло –кыдо  бусыын гыремез но, киземез но)

-Татын пумиське «кузё» кыл. Кыӵе малпанъёсты кылдо, та кылэз кылыкуды?
(Нылпиослэн верамзы:
-Кузё луыны умой;
-Кузёлы капчи, со нокинлы уг пыриськы;
-Со аслыз ачиз кузё, нокин соин уг кивалты;
- Кузёлэн вань эрикез.)
      Ашальчи Окилэсь кылбурзэ тодамы вайиськом.    Тема но идея ласянь кылбуръёсты ог-огзылы тупало, шуиськомы.

     Доска вылын гожтэмын: «Пичиезтэк уг луы бадӟымез» .Валэктыны курисько пуштроссэ. Кызьы валало, озьы валэкто.
Ачим вераськисько:
- Лирической герой яратэ быдэс Удмурт шаерез. Нош бадӟым шаерез яратон вордӥське пичи  вордӥськем гурттэ яратон бордысь, малы ке шуоно отын адями вордӥське, нырысь вамышъёс лэсьтэ, нырысь инкуазез адӟе, вала «ӟечез но чеберез», татын со «кузё». Нош пичиысен вордӥське бадӟымез.  Атай юрттэ, вордӥськем гурттэ яратон бордысь вордӥське азьланяз быдэс Удмурт шаерез яратон мылкыд.

  Юан сётисько на:
  -Кыӵе мылкыд кельтӥз кылбур?
Кластер лэсьто.
                     Урок йылпумъяське. Дорысь уж сётыку, чузъяське крезьгур.

Николай Байтеряковлэн лирической героезлы туж дуно вордӥськем шаерез. Солы дуно Удмурт шаер. Нош тӥ, нылпиос, кыӵе мылкыдын улӥськоды?  Маин дуно тӥледлы вордӥськем палъёсты?   Та юанлы вералоды дорысь ужады. Кык уж пӧлысь одӥгзэ быръе:

1. «Маин дуно мыным вордӥськем палъёсы?»   сочинение-миниатюра.               
2. «Вордӥськем шаерелы»  темая лирической кылбур гожтоно.

Приложение ( ватсам материал):

Урок кутсконын чузъяськем кырӟанлэн кылъёсыз. «Нёжало шаере» (Крезьгурез Николай Постниковлэн, кылъёсыз Николай Байтеряковлэн)

 Нёжало шаере, бусыё шаере,
Юг лента кадь пичи шуръёсын,
Чагыр-лыз сяськаен пужъятэм шобырен
Пыраськод тон чебер вӧтъёсы.

Сюрелась шепъёсын, тюрагай куараен
Со мынам сюлэмам чузъяське.
Песятай-а шедьтэм та шулдыр интыез,
Песянай-а меда синмаськем?

Я чабей- а кисьма, я пелля-а лымы,
Сильтӧлъёс - а уйбыт шулало,
Мон котьма вакытэ буйгасьтэм сюлмыным
Вордӥськем музъемме данъяло.

Кырӟан кылзӥськем бере нылпиос тодматско Н.Байтеряковлэн кылбуръёсысьтыз чуръёсын:

1 группа.
Дуннеын пӧртэмесь
Шаеръёс туж  уно.
Нош шудбур – одӥгаз со уда.
Кин вордскем шаерзэ
Улонлэсь но дуно
Сюлэмаз ке возе – солы дан!

Кыске  монэ мурт пал музъем
Огпол адӟон понна гинэ.
Мон яратско ас Союзме,
Ас шаере шунтэ монэ.

2 группа.
Кам но Вятка куспын
Вордӥськем шаерме
Мон туннэ
Выль синмын адӟисько.
Мон солэн нимыныз
Усьтӥсько нуналме,
Улонме но соин герӟасько.

Атай но анай шаерез
Маин быгатод воштыны?
Тынад вань ӟечед но буред
Вордскем удысад будэмын.

3 группа.
Шаере! Ой, удмурт шаере,
Мусоесь вордӥськем интыос!
Котырак учкиськод ке кыре,
Кырӟанэ курисько выль кылъёс.

Пичи гинэ мынам,
Пичи гинэ шуре.
Нош со – шудэ-буре мынам
Азвесь кылэ-буре.

4 группа.
Мон яратӥ вордэм калыкъёсме,
Ӟеген сыръясь лудме мон яратӥ.
Калык сюлмысь шедьтӥ кырӟанъёсме,
Ӟечлы оскон но калыкысь шедьтӥ.

Юг мылкыдын, ӟеч осконэн
Мон шокасько но улӥсько.
Тау, шаер! Тыныд гинэ
Музъем дорозь йыбырттӥсько.

Уже кутэм литература:

1. Байтеряков Н. С. Кикыен вераськон. Кылбуръёс. Ижевск. «Удмуртия», 1978.
2. Байтеряков Н. С. Солдатлэн данэз: Кылбуръёс но поэмаос.- Устинов: Удмуртия, 1978.- 112 с.
3. Байтеряков Н. С. Крезь бурд вылын. Кылбуръёс но поэма.- Ижевск: Удмуртия, 1981.-116 с.
4. Удмурт литература: 5-тӥ класслы учебник- хрестоматия / Дасязы В. Н. Ившин, Л. П. Фёдорова.- Ижевск: Удмуртия, 2008.- 176.:ил.