Ӟучсэ кылэз дышетытэк, шуггес луэ йыг-йыг вамышъяны. Нош аслэсьтыд кылдэ яратытэк, мукет кылэз уд дышы гажаны!  (Д. Яшин)

Конюхова В. В.

Сюрес усьтüське мынüсьлы. 6 класс.
(Дорогу осилит идущий)

     Уроклэн ужпумъёсыз:

1. «Сюрес» валатонэз котыр ласянь сэрттон- пертчон.
2. Нылпиослэсь творческой быгатонлыкъёссэс азинтон.
3. А.Леонтьевлэсь «Сюрес усьтüське мынüсьлы»  повестьсэ валаны юрттэт сётон.             

     Тüрлык: Ноутбук, слайдъёс возьматон бадӟыматüсь пул,  художникъёслэн суредъёссы, текстъёсын карточкаос.

(Нылпиос ужалозы группаосын)

     Уроклэн мынэмез:

-Умоесь, пиналъёс. Вераськонмес кутскеме потэ таӵе чуръёс бордысь.

 1 слайд:

    «… Со котьку чырткем: я кечпи музэн тэтча, я кый сямен позыръяське. Ортче со вӧлмыт нёжалэтü, тыро шепъёсынызы мыкыръяськись юос вискытü, пыре гуртэ – садо ульчаетü потэ, шур дуре вуыса,  выж вискытü дыбыртэ, гурезе кечырске, отысь васькыса, нюлэскы зыме, ӟарвуэз юэ но тӧлатскыны нош ик бусые ширтэ…

     … ноку уг жадьы, ялан чортэ, öте… Лоптыръяське, лэйка, позыръяське шыгырес дурсэто пурысь пукран. Ӧвöл солэн кутсконэз но, пумыз но.»

- Ма со? ( Со сюрес. Нылпиос öз ке тодэ, ачим верало) Со сюрес.

- Нош туннэ школае лыктон сюресты кыӵе- о вал? (вералозы)

     -  Пöртэм вылэм сюресъёсты. Но огез огкадь: ваньдэс со вайиз школае.

      - Озьыен, туннэ асьмеос вераськом сюрес сярысь.   Сюрес кылэз вераку, кинлэн ма син азяз пуксе?

 Котькудüз группаысь ужась ачиз маке но гожтэ.

 Гожтэмъёссэс ог – огзылы лыдӟо.

 Котькуд группаысь одüг адями вераське.

Верало соос, сюрес луэ чылкыт, кырсь, чебер, паськыт –сюбег, дэри, лымы, шулдыр, кöшкемыт, вольыт, дангырес но мукет.

Дышетüсь: Сюресэз  туж чем возьматъязы но возьматъяло но асьсэ суредъёсазы художникъёс но туспуктüсьёс. Али асьмеос кöнязэ ке соос пöлысь адӟом.

(Учкиськомы слайдъёсты, слайдъёсын пöртэм художникъёслэн но туспуктüсьёслэн сюрес мотивен герӟаськем суредъёссы но туспуктэмъёссы.)

Дышетüсь: Кыӵе мылкыд кельтüзы суредъёс но туспуктэмъёс?

 Котькудüз нимаз малпанзэ гожтэ.

 Нылпиос гожтэмзэс группаязы лыдӟо.

 Класс азьын группаысь одüгез лыдӟе. (нылпиослэн кылдо пöртэм малпанъёссы. Куд –огез со суредъёс  чебер, тунсыко, шулдыр шуо, нош кудüз вера, кылдытэ,пе, кышкытлык, сюлэмшугъяськон.)

Дышетüсь: Сюрес образ ӵем гинэ пумиське кырӟанъёсын но.

Учкоме слайдъёс, быгатэммыя кырӟаса но лэзёме.

( Со чуръёс ӟуч нылпи кырӟанъёсысь, О.Газмановлэн «Дороги» кырӟанысьтыз, «Д, Артаньян и три мушкетёра» кинофильмысь кырӟанысь, нылпи кырӟанъёсысь чуръёс)

     Ма вераны быгатоды на, нылпиос, учкемдыя?

 Котькудüз группаысь ужа нимысьтыз.

 Группаосазы лыдӟо ог-огзылы.

Малпанъёссэс шара верало.

Верало:

-Сюрес вылын оломаиз но луэ.

-Сюрес поттэ но кытчы ке вуттэ.

-Сюрес вылын шумпотон но, куректон но луыны быгатэ.

-Сюрес вылын капчи, куке эшъёс вöзын.

-Умой, куке сюрес выльысь вае доре.

     Дышетüсь: Вань на таӵе веранъёс:

- Сюлэме сюрес.

- Сюрес нокытчы. (Дорога в никуда)

-Вордüськон сюрес.

- Мукет(сопал) дуннее сюрес.

 (Нылпиос туж мыло –кыдо ужало , тунсыко веранъёс дасяло.  Валэкто, сюлэме сюрес шуэмез. Анайлы матын луон, яратüсь адямиос огазе луо ке, сое «сюлэме сюрес» шедьтэмын шуо, пе.  Нош кытüяз адями шуг –секытъёслы сётске. Отысь потон уг шедьты ини. Сыче учыре  ӟучъёс шуо «дорога в никуда».  «Вордüськон сюрес» валатонэз туж тунсыко валэкто. Нылпи, пе, вордüськыкуз, секыт сюресэз ортче но ворме сое, югыт дуннее потэ. Озьыен, кылдэ дунне вылын выль адями.  Адями улэ, улэ но та улонысь кошке мукет дуннее. Солэсь кышкано öвöл, улон озьы кылдытэмын: куке но  адями  люкиськоно та югыт дуннеен.  Тае шуо «мукет дуннее сюрес»)

 - Умой, нылпиос. Тü ваньзэ валэктыны быгатüды.

- Кыӵе но пöртэм пуштросэз вылэм «сюрес» кыллэн. Асьмеос туннэ

эшшо одüг валатонэз сэрттыны – пертчыны кулэ луомы:

                                «Сюрес усьтüське мынüсьлы»

                                            («Дорогу осилит идущий»)

Та веранлэсь пуштроссэ усьтыны тüледлы юрттоз текст бордын ужан. ) Котькуд группа ужа нимысьтыз текст бордын, бöрысь верасько)

Текстъёс.

1 текст.

    Натü пичиысеныз ик эмъясь луо, шуылüз. Куинь –ньыль арес дыръякуз мунёоссэ йöнатылüз. Жоген нылаш школае мынüз. Вань кужымзэ поныса, тыршиз дышетскыны. Солэн йыраз одüг бадзым малпан бергаз- пырыны Медицинской академие. Мылкыд каремезъя, 10-11 классын дышетскыкуз, биолого –химической классын дышетскиз. Секыт вал, нылаш öз  чигтüськы… Тани сётэмын экзаменъёс. Вуиз шудо нунал: Натü тодüз, со Медицинской академиысь студентка луэм шуыса.

2 текст.

    Онтон кемалась улüз ини одüг малпанэн: пуктоно корка. Материал но ваньмыз вань ини, син кышка кутскыны.

    Одüг нуналэ басьтüз Онтон лопатка… Со дырысен трос дыр ортчиз ини. Туннэ воргорон сылэ йыг – йыг пуктэм выль корка азьын, синмызлы ик уг оскы кадь: зэм ик- а со пуктэм тае. Огшоры уг вера вылэм калык: «Син кышка, нош ки лэсьтэ»

3 текст.

   Ондü – спортсмен. Кылем гужем со шудтэм учыре сюриз: авария, машинаос ваче юн шуккиськизы. Воргорон мырдэн улэп кылиз. Врачъёс шуизы: «Улод… но инвалидной коляскаен ветлод» (Ондилэн сюрлыез вöсь луэм) Туж секыт мылкыдын пияш бертüз дораз, но ноку но улонысь кошкон, ассэ ачиз быдтон сярысь малпанъёсыз öй вал. Жоген пияш каллен –каллен ачиз бордын ужаны кутскиз. 5-6 часэн нуналаз ужаз… Туннэ со пыд йылаз. Бызьылыны уз бызьылы ни со, но пыд йылаз ветлоз. Со вормон öвöл – а?

4 текст.

    Орина кенак, 44 аресъем нылкышно, вань улонзэ секретарь луыса ужа ини. Жöк вылаз сылüсь ручной машинкаез сюлэмызлы туж матын луиз ини. Но улон воштüське, одüг интыяз сое возьыны шуг.  «Жöк вылад табере компьютер пуктом»,- шуиз одüг нуналэ начальникез. Ужед дуно ке, дышетскод. Капчиен öз сётскы арлыдо нылкышнолы выль машина. ..

    Туннэ Орина кенаклэн чиньыоссыз туж жог гинэ бызьыло клавиатура вылтü.  Улон гинэ уг воштüськы, со сьöраз кыске калыкез но. Тыршид ке, котьма ужед пöрмоз. Возьыт ук улонлэсь бере кыльыны.

- Озьыен, кыӵе нимысьтыз йылпумъян лэсьтыны луоз та верамъя?

Нылпиос огъя вывод лэсьто.

- Котькыӵе сюрес ,зэм но, усьтüське мынüсьлы гинэ. Одüг интыяд сылüд ке, нокыӵе азинсконъёс уз луэ. Котькыӵе мед луоз сюрес,  вормыны малпам мурт вормоз сое.

 -  Вань на таӵе веран: «Улон сюрес» .Кыӵеен тü син азяды пуктüськоды асьтэлэсь улон сюрестэс?

(Гожъяло) – Мылкыд каро верасько ваньмыз)

Дышетüсь:

-Умой, нылпиос. Тü  син азяды пуктüськоды ини асьтэлэсь азьлань улон сюрестэс. Тü валаськоды озьы ик, улонын ваньмыз умой гинэ уг луы шуыса, пумиськыло шуг –секытъёс но. Мар вераме потэ? Мон шумпотüсько тü понна, тü оптимистъёс: улонлэн могӟетъёсызлэсь уд кышкаське, ӟечезлы оскиськоды, улонысь чеберзэ адӟыны но валаны быгатüськоды.

Дышетüсь: Нош вань на таӵе веранъёс:

-Сюрес возьматыны,

-Сюрес вожын сылыны,

-Сюрес вылэ потыны,

-Сюрес лёгыны,

-Сюрес вылысь кожыны,

- Сюресэз ыштыны.

Та кыл сочетаниосты валэктон бордын ужан –со быдэс улонэз валэктüсь философия. ( Та валатонъёсты усьтыны –секыт уж, но нылпиос вань сюлмысьтызы тыршо, валэкто:

-Сюрес возьматыны – кыӵе ке ужез валэктыны,
-Сюрес вожын сылыны –быръён азьын луыны,
-Сюрес вылэ потыны – нимысьтыз выль уж борды кутскыны,
- Сюрес лёгыны – выль ужез вормыны, сое умой –умой валаны,
- Сюресэз ыштыны – астэ ыштыны, шуг –секытэ сюрыны)

           Алнаш школаын дышетскем нылаш, Севастьянова Елена, тазьы гожтüз вал:

 « Улон сюрес ялан бызе азьлань,
Кинлы  вае со шуд, кинлы – кайгу.
Умоезлы  гинэ оскем потэ ялан-
Уродэзтэк ӟечез валан уг лу»

Нош урокмес йылпумъяме потэ тодмо удмурт поэтлэн, Флор Васильевлэн чуръёсыныз:

« Мед котькин но ас сюрессэ вормоз,
Кудüз туж кыдёкысь инвис  доры вуттэ.»

- Мынам тüледлы вераме потэ на:  Тодмо удмурт писательлэн «Тонэн кылисько» повестяз главной геройлы, Алексей Курбатовлы школаын нуналысь нуналэ вераллязы: « Тüледлы улонын вань сюресъёс усьтэмын, тü –улонлэн егит кузёосыз. Тü дунне вылын самой шудоесь нылпиос. Котькуд малпанды быдэсмоз…»  Улонын котьку озьы гинэ уг луы, могӟетъёс, шуг –секытъёс но пумисько. Адями ас улонзэ ачиз лэсьтэ.

Улон сюресты вольыт мед луоз. Оскисько, пумиськизы ке сюрес вылады  пичияк нюкъёс –гопъёс, ти  капчиен соосыз палэнтыса вамыштоды.

Сюрес вылады мед луозы матысь адямиосты, оскымон эшъёсты, капчи мылкыдды но сюлмысь тыршонды.

 Азьланяз тüледыз возьма туж тунсыко дышетскон сюрес.Тыршиды ке, сюлмады кельшымон уж быръёды. Нош ужды сюлмады кельшиз ке, котькуд нуналды шумпотон тüледлы кузьмалоз.          

     Мон оскисько, озьы ик луоз шуыса. Ӟеч сюресэ, нылпиос!

- Вераськонмы туннэ огшоры öз луы, дыр, шуыса малпасько.

Дорысь уж: Лыдӟоно А.Леонтьевлэсь «Сюрес усьтüське мынüсьлы» повестьсэ.

 Урокез дасяны юрттüсь литература:

1. Широбоков В.Г. Жингыртüсь шапыкъёс: Веросъёс/ Послесловиез А.Шкляевлэн .- Ижевск: Удмуртия. 2005