Ӟучсэ кылэз дышетытэк, шуггес луэ йыг-йыг вамышъяны. Нош аслэсьтыд кылдэ яратытэк, мукет кылэз уд дышы гажаны!  (Д. Яшин)

 Шулакова З. П.

Владимир Котковлэн творчествояз дор тема. 

Удмурт литературая внеклассной лыдӟон, 9-тӥ класс.

Ужпумъёс: поэтлэн улон но ужан сюресэныз тодматоно, кылбур бордын ужаны, ас малпандэ вераны быгатоно, вордӥськем шаердэ яратыны, гажаны но данъяськон мылкыд пыӵатоно.

Кулэ луись арбериос: В. Котковлэн туспуктэмез, кылбур сборник, творчествоезлы сӥзем альбом.

           Уроклэн мынэмез.

Дышетӥсь: Туннэ асьмеос эскером дано удмурт поэтлэсь В. Котковлэсь улон но ужан сюрессэ. Ужано луоз асьтэ понна. В. Котковлэсь нимтулзэ кылыса, кыӵе малпанъёс, кылъёс кылдӥзы. (ӵош лэсьтӥськом кластер доска вылэ)

                                                           Самодеятельной  композитор

                удмурт бард                                   яратон                                           пичи дыр    

                       кылбурчи                                     В.Котков                вордскем гурт

Таган гурезь          Кукар ошмес

-Пӧртэм литература, газет-журнал вылэ пыкиськыса, пиналъёс, тодматскоды авторлэн творчествоеныз. (класс люкемын группаослы)

-Котькуд группа тодматэ поэтлэн улэм но ужам сюресэныз.

1-ти группа Приложение №1

2-ти группа Приложение №2

3-ти группа Приложение №3

-Берытскоме урок азьын лэсьтэм кластермы борды. Ма выльзэ будэтыны быгатомы на кластере? (Будэто)

Д:  В.Котковлэн творчествояз бадӟым инты басьтэ дор тема, али ужаломы сое эскерон бордын. (ужало группаен, котькуд группалы сётэмын вордӥськем шаерлы сӥзем кылбур чуръёс)

Группаос шара лыдӟо класс азьын кылбуръёссэс.

1-тӥ группа.

Гуртэ, гуртэ, мынам Актэмыре.

Кызьы меда сюлмам тон тэремед?

Мыным дуно тон котькыӵе дыре.

Зоре ке, ӵок, лымы усе ке, мед-

Ноку тынад уз безды дэремед.

Шунды сиос вылад пужнӥськыку,

Дӥсед тынад эшшо луэ чебер.

Шумпотэмзэ уг ваты вож кызьпу

Куаръёсыныз шильтыр гинэ чабе.

Нош котыраз вальсын берга чабей.

Шунды выллем пиштэ Актэмыре.

Пазьгем тылсиосыз - со сюресъёс.

Одӥгетӥз кошки кыре-буре.

Вамышъямъя йыло сюрес сиос-

Дунне вылын кӧня Актэмыръёс!

2-ти группа

             Пичи дыр.

Шур дурысь уйпуос,

Льӧмпуос урам тыр.

Ӟеч-а бур-а улос-

Вордӥськем Актэмыр.

Та пичи c’htuscm (гуртэ)

Вамыштӥ улонэ

Сюлэмам тэрытӥ.

Актэмыр, мон тонэ

Сандыке кадь татчы

Пичи дыр ватэмын.

Усьтэтсэ нош кытчы

Киргатӥд. Актэмыр?

Бадьпулэсь ньӧръёссэ

Шудон вал карыса,

Тэтчаллям дыръёсме

Выльысен утчасал.

         3-тӥ группа.

Актэмыре бертам ини далай.

Уг тодӥськы кызьы улэ доре

Ас ужелэсь ог люкетсэ талай-

Мон отпускам тани бертӥ доре.

Кыӵе ни,

Выльдӥське-а Актэмыр?

Урамъёсы пыриз-а ни ӝоглык?

Урод сямъёс ваньмыз-а ватэмын?

Воштӥськемын-а Актэмыр калык?

Номыр выльзэ ӧй адӟы мон татысь.

Ваньмыз сыӵе ик, ваньмыз ог сямен.

Азьло сямен кизё татын ю тысь.

Озьы ик утялто, вылды, дэмен.

Выльдӥськонэз эшъёс дорысь утчай.

Соос дорын куноялляй вазен.

Кырмыштыса ик куроно шат чай?

Зэмзэ ик самовар пукто азям

Нош чай одно ӝутэ сюрес вылэ.

Ӝутэ бере вамыштытэк-сьӧлык

Турын дасясьёслэсь учком выльзэ

Ужан сямзэ воштэ ни-а калык?

-Зоред ӧвӧл ,-ӝожмыт вазе Гарась

-Дас пол золгес ужам ке дасялом,,,

-Эх, луысал ке уногес  ужась!

Шефъёс гудыритэк уг сайкало.

Мынам но сылэме ӧз лу ни ТЭК

Оло кеськи: «Ужъёс урод»

Палаш апай нош чик серекъятэк

Вазе мыным:»Я, лёг али зурод!»

 Д: Вордӥськем гурт, пичи дыр сярысь вань кылъёс вераса быдтэмын ни кадь.(Ужаськом юанъёсъя)

-Кызьы тӥ малпаськоды, маин аспӧртэмлыко луо та темалы сӥзем кылбуръёсыз В.Котковлэн? (валэктон сёто)

-В. Котковлэн небыт синмын улон шоры учконэз - со туннэ нуналлэн куронэз-а? (валэктон сёто  пиналъёс)

- Ма бордын кужымез авторлэн кылбуръёсаз?  Кызьы со, пиналъёс, тӥледлы луэ-а валамон? (валэктон сёто)

Д: Пиналъёс, тӥ али асьтэлэсь мылкыддэс дор темая возьматоды пӧртэм амалъя(творческой ужъёсъя): 1-тӥ группа - кылбур, 2-тӥ группа - эссе, 3-тӥ группа - суред)

   Аня Виноградовалэн кылбурез.

                Актэмыр.

Актэмыр, Актэмыр,

Сюлэмлы тон матын,

Актэмыр, Актэмыр,

Вордӥськи мон татын.

Мон Таган гурезе

Тубыса шудӥсько,

Мон Кукар ошмеслэсь

Чылк вузэ юисько.

Актэмыр.

Пыраклы тон кылёд сюлэмам.

Актэмыр.

Одӥгнад тон мынам улонам.

        2- группалэн ужез. Аня Муканова, эссе.

Вордскем гурт… Мар вань меда тынэсьтыд мусоез, дуноез? Мар вань тынэсьтыд чеберез? Татын тон вордӥськид, татын тон нырысьсэ анай шуыса вазид, татын тон нырысь вамышъёстэ лэсьтӥд. Татын ик тон дышид яратонэз валаны. Гурттэ, калыктэ, анай-атайдэ яратыны. Со ик кыске тонэ татчы, вордскем палъёсад. Котькудӥз, палэнэ кошкемъёсыз но, тон сярысь умойзэ гинэ вералозы, шуныт кылъёсын данъялозы. Со понна ик со ВОРДСКЕМ ГУРТ!

Д: Шӧдӥмы Байтэрек школаямы дышетскем В.Котковлэн нимыныз тӥ тунсыкъяськиськоды шуыса.

                          Викторина.

1.Ку но кытын вордӥськиз В.Котков?

2 Кин пыӵатиз Володялы гожъяськон мылкыд?

3. Кытын печатласькизы кылбуръёсыз?

4.Кыӵе наградаосын пусъемын?

5.Кыӵе темаослы сӥзиз кылбуръёссэ?

6. Кылбуръёс сяна маос гожъяз на Володя?

7 Кытын улэ но ужа та дыре?

8.Кыӵе кырӟанъёссэ тодӥськоды? (кырӟано.)

    Урокез йылпумъян.

Вордӥськем палъёс улыны кужым сёто, вордскем шаерен данъяськон мылкыд пыӵато. Тӥни малы В. Котков нош но нош бертылэ гуртаз, пачылмем мылкыдзэ кылбур чуръёсаз возьматэ.

        Гуртэ уж.

В.Котковлы гожтоно гожтэт

Приложение №1. 

В.В. Котков вордӥськиз 1958-тӥ арын 2-тӥ толшоре Алнаш ёросысь Актэмыр гуртын, удмурт крестьян семьяын. Начальной школае ветлӥз асьсэ гуртэ ик, пичиысен ик яратӥз кырӟаны, анаез кырӟаны яратэ вал, атаез тодмо селькор вал, кылбуран удысын но кужымзэ эскериз, эшшо атаез арганэн шӧртчи шудылӥз. Самой сыӵе сямзы ик палаз Володя пизылы но. Витетӥ классэ мынӥз Байтэрек гуртэ. Та школаын литературно-творческой кружок ужаз, кивалтӥз соин удмурт кылъя но литературая дышетӥсь Елизавета Григорьевна Багратионова, уно аръёс ӵоже туж мыло-кыдо тыршиз, пиналъёслэсь гожъяськон мылкыдзэс пуромытиз. Володялэн апаез но отчы ветлылӥз, кылбуръёссэ ушъяло вал, бӧрсяз ик кыстӥськиз выныз но. Нырысетӥ веросъёсыз но кылбуръёсыз печатласькизы  «Алнаш колхозник» (али «Алнаш куара») но «Дась лу» газетъёсын. Тямысэтӥ классын дышетскыкуз со вал ни юнкор, ветлӥз семинаре. Со вакытэ ёрос газетын  Семён Тарасович Шихарев ужа вал. Володя понна со зэмос дышетӥсь луиз.

  1975-ти арын Алнаш шор ёзо школаез йылпумъяса, Удмурт кун университетэ удмурт филология факультетэ дышетскыны пыриз. Володя татын но мылысь-кыдысь пыриськиз литературно-творческой кружоке но «Советской Удмуртия» газетлэн литобъединенияз.

        Приложение №2.

1977-тӥ арын Володяез басьто армие, кык ар ортчыса, 1979-тӥ арын вылысь азинтиз университетын тодон-валан люканзэ. Егит пи выль кужымен кыстӥськиз кылбуран-кырӟан дуннеяз, кырӟаз «Чипчирган» ансамбльын, газет-журналъёсын кылбуръёссэ печатлаз. Студент аръёсаз ик потӥз «Чипчирган» кылбур бичетэз.1982-тӥ арысен куинь арзэ Владимир Котков Якшур-Бодьялан ужаз, огдыре ик ёрос газетын корреспондент но. Радиоорганизатор но, фотокорреспондент но.

1986-тӥ арын берытске Ижевске, ужа писательёслэн Союзазы Удмуртиысь гожъясьёслэн огазеяськоназы чеберлыко гожъямез эскерись луыса, Семён Александрович Самсонов вӧзын. 1993-тӥ арын «Инвожо» журналын поэзия ёзэтын тыршиз. 1993-тӥ арын Володя Котков семьяеныз Шаркан ёросысь Петуньки гуртэ выжизы.  Та дыре Петуньки школаын но Шарканын Нылпи творчествоя юртын ёросысь пиналъёсты крезьгурлы но чеберлыко гожъяськонлы дышетэ.

     Приложение №3.

1977-тӥ арын «Пыд улын-музъем» кылбур бичет потӥз. Отчы Володялэн 10 кылбурез пыртэмын вал. «Чипчирган» (1982),  «Альжан» (1988),  «Зарни карнан» (1991),  «Кызьпуо шаерам» (1994) кылбур бичетъёсын книгаосыз пото,  «Пинал мылкыд - юмал йӧлпыд»  комедия. Университетын дышетскыкуз, кылдытӥз нырысетӥ удмурт кырӟанзэ «Инвисэ бызе чугун сюресъёс», ачиз ик гитараен шудыны крезьгур пӧрмытӥз. Кырӟанъёсыз «Мусояське кырын юг май»,  «Актэмыр», «Паймисько». Кылем даурлэн 80-тӥ аръёсаз быдэс шаерамы чузъяськылӥз солэн кырӟанэз. В. Котков кылбуръёсаз возьматэ лирической геройлэсь вордӥськем музъемзэ гажамзэ, мӧзмемзэ, тодаз возе шаермы понна ожын быремъёсты. 1990-тӥ арын кылбурчилэн нылпиослы «Зарни карнан» бичетэз потӥз. В. Котковлэн веросъёсыз, очеркъёсыз, эссеосыз пуштроссыя туж пӧртэмесь, быгатыса суреда геройёсызлэсь пушдуннезэс. 1988-тӥ арын В. Котковлэн пьесаезъя дасямын вал «Удмурт но вумурт» спектакль. «Маскара Параска» но «Пинал мылкыд - юмал йӧлпыд» пьесаосыз сцена вылын возьматэмын. Владимир Васильевичлэн ужан творчествоез пусъемын наградаосын но премиосын.

Кузебай Герд нимо премилэн лауреатэз.

Герман Ходырев нимо премилэн лауреатэз.