Ӟучсэ кылэз дышетытэк, шуггес луэ йыг-йыг вамышъяны. Нош аслэсьтыд кылдэ яратытэк, мукет кылэз уд дышы гажаны!  (Д. Яшин)

 Кадрова Е. Л.

В. Сергеевлэн (Ар-Сергилэн) «Душеспи» веросэз

Уроклэн  мугъёсыз: В. Сергеев писателен но солэн «Душеспи» веросэныз тодматоно, текстэн ужаку, пиналъёслэсь малпаськон радзэс азинтоно, ас понназы ужаны быгатэмзэс юнматоно, арлыдзылы тупась амалъёсын веросын ӝутэм нравственно-философской ужпумъёсты сэрттыны-пертчыны тыршоно.

Урокын кутыны чаклам тӥрлык: писательлэн портретэз, книгаосыз, кырдыдыкез но душесэз возьматӥсь суредъёс яке туспуктэмъёс.

Кылбугор: четлык (клетка), куш (поляна), узвесь (свинец), пияз (гадь бордаз), еж (пинал), е пулсысьтыз (е вискысьтыз) – та кылъёс умой адӟиськымон печатласа, доска вылэ юнматэмын.

Уроклэн мынэмез:

Пиналъёслы доразы уж сётэмын вал: лыдӟоно писатель сярысь статьяез.

Дышетӥсь: Ӟечбуресь, пиналъёс! Туннэ асьмеос ужалом В. Сергеев писательлэн «Душеспи»веросэз бордын. Дорады быдэстэм уждэс эскером.

«шонер»  «шонер ӧвӧл» шудонэз уже  кутыса, текстлэсь пуштроссэ тодэмдэс эскером:

1. В.Сергеев вордскиз Завьял ёросысь Изгуртын (шонер ӧвӧл)

2. Колхозын ӟеч ужамез понна басьтэм коньдонэныз моторен велик басьтӥз (шонер)

3. Школаын дышетскыкуз ик «Дась лу!» газетын нырысетӥ веросэз потӥз (шонер ӧвӧл)

4. Дышетскиз Удмурт кун университетын, филологи факультетын (шонер)

5. Йылпумъяз Москваысь Литературной институтлэсь Вылӥ курсъёссэ (шонер)

Пумиськылэм янгышъёсмес тупатъяськом.

Писательлэн кыӵе сямъёсыз висъясько та статьяын? (пиналъёс пусъё: любопытной (котьмае тодыны тыршись), ужась, лыдӟиськыны, выль адямиосын тодматскыны яратӥсь).

Дышетӥсь: бадӟымгес классъёсын Ар-Сергилэн произведениосыныз тодматскоды на, писатель сярысь но тросгес тододы. Табере выжом «Душеспи» борды.

Веросэзлэсь кылдон мугъёссэ писатель ачиз валэктэ, шедьтом со люкетсэ но лыдӟом (48 бам). Пумиськиз тӥледлы валантэмгес кыл но. Мар меда со идеал? (котьма ласянь чеберлыко луон; мукет валэктонъёс но шедьтыны луоз, дыр). Кенешомы на сьӧлык кыл сярысь но (пиналъёс асьсэлэсь малпанъёссэс верало). Озьыен, валаны луэ, верослэн пуштросэз та кылъёслэн пуштроссы котыртӥгес бергалоз. Тодэмды потэ ни луоз, ма сярысь вераське татын. Ойдолэ лыдӟиськон борды выжом. Пумиськылозы валантэм кылъёс, соосты доска вылысь шедьтоды.

Саклыкмес висъяськомы на доска вылэ ошем туспуктэмъёс, суредъёс вылэ. Пичияк кенешиськом та тылобурдоос сярысь.

Веросэз лыдӟе дышетӥсь, «куспатыса (дугдылыса) лыдӟон» амалэз кутыса.

1. Лыдӟисько «…Нош со мар?» кылъёс дорозь. (49 бам)

-Кыӵе валэктон сётысалды та юанлы? (малпанъёссэс верало)

2. Лыдӟисько «...Ваня пыӵалзэ ал вылаз понӥз но мур малпаськыса пуке» дорозь (50 бам)

- Кыӵе малпанъёс сюлэмшугъяськыто меда пияшез? Кызьы тӥ сое буйгатысалды?

3. Лыдӟисько «…Кытысь ке валантэм куара кылӥськиз» кылъёс дорозь. (51 бам)

- Кинлэн яке малэн куараез меда со? Малы сокем куалектӥз пияш? (малпанъёссэс верало)

4. «…Таиз но, будӥз ке, дыдыкъёсты кесялоз, дыр…» кылъёс дорозь лыдӟисько. (51 бам)

-Ма кароз меда Ваня душеспиен? (малпанъёссэс верало). Шонер меда малпаськомы, ойдолэ лыдӟом. Веросэз пумозяз лыдӟисько.

Дышетӥсь: веросмы лыдӟемын, но сюлэмшугъяськытӥсь юанъёс кылизы на. Кызьы малпаськоды, пиналъёс, шонер-а лэсьтӥз Ваня,  душеспиез кулонлэсь утьыса? (мапанъёссэс верало, споръясько). Ти мар карысалды со интыын?

Быгатоз-а Ваня инкуазьлэсь катъёссэ воштыны? (кенешиськом, споръяськиськом)

Кыӵе оскон кылдытэ верослэн пумыз?

Веросысь Ванялэсь таӵе кылъёссэ лыдӟиськом на: «Нылпиос-а анай-атайзы понна кыл кутыны кулэ?» Кыӵе валэктон сётысалды та юанлы? (пиналъёс понна та секыт юан, куд-огез малпало: кулэ. Шуак верослэн пуштросэныз герӟаны шугъясько. Дышетӥсен ӵош кенешо: нылпиос сюлмаськыны кулэ анай-атайзы понна, но соослэн умойтэм ужъёссы понна соос кыл кутыны кулэ ӧвӧл. Душеспи янгыш ӧвӧл, солэн анаез Васёкез вииз шуыса. Татын эшшо берытскыны луоз на «идеал» но «сьӧлык» кылъёс борды. «Душеспи но, дыдыкпи но – сьӧлыктэмесь» - шуэ автор. – Со чылкытлык ик улонын идеал чотын возиське».

Йылпумъянъёс лэсьтон. Урокын ужамзы понна тау карон но дунъет сётон.

Доре уж:

-5 уж. 52 бам

- Кызьы азьланьтысалды та веросэз?

- Мылкыд карисьёслы уж: веросысь кельшем интыезъя суред дасяно; «Душеспи» книгаысь веросъёссэ лыдӟоно.