Алнаш ёросысь удмурт кылъя но литературая дышетӥсьёслэн сайтсы

Шарыпова Л. В.

«Аспӧртэмлыко этнограф»

Флор Васильевлэн творчествоезъя 11 классын урок

Мугъёсыз:

- Флор Васильевлэн  огъя творчествоез сырысь тодонзэс муромытоно;

- Писательлэсь кылбуръёссэ эскероно;

- Группаын ӵош ужаны быгатонзэс азинтоно,

- Калык сямъёс но йылолъёс сярысь тодон-валанзэс паськытатоно;

- Удмуртлыкез гажан мылкыд пыӵатоно

Кулэ луоз: Ф.Васильевлы сӥзем адӟытон, «Калык сямъёсты чакласа», «Ингур» книгаос, калык сямъёслы но йылолъёслы сӥзем «Кенеш» журнал, «Этнография удмуртов» , гитара.

 Уроклэн мынэмез:

1.     Ӟечбуресь! Туннэ  асьмеос Флор Васильевлэн творчествоеныз тодматсконмес азьланьтом. Кылем урокын «Инкуазь но адями» темая вераським. Ойдолэ кӧня ке муртлэсь кылзоме инкуазьлы сӥзем чуръёстэс - гожтоно вал синквейн. Кыӵеен возьматэмын инкуазь кылбурчилэн поэзияз.

Инкуазь.                                                 Инкуазь                

Чебер, ӵыдонтэм                                   Чылкыт, бӧрдӥсь

Сюлмаське, бӧрдэ, вите                        Кынтэ, гылтэ, уг вунэты

«Инкуазьлэсь уд луы зӧк»                  Инкуазьтэк уз быгаты адями улыны

Анай                                                         Улон

2.      Туж умой пиналъёс.  Озьыен Флор Васильевез туж сюлэмшугъяськытӥз "Инкуазь но адями" тема, сюлмыз вӧсь луыса гожъяз инкуазьмылэн кырсемёмез сярысь, инкуазьлэсь палэнскеммы сярысь. Инкуазь сяна, кыӵе ужпум сярысь гожъяз на кылбурчи? Мар эшшо сюлмаськытӥз на сое?

3.     Зэмзэ но, кыкетӥез ужпум –со удмуртлык.  Ф. В. оло шӧдэ ни вылэм калыкмылэсь аспӧртэмлыксэ ыштэмзэ, нылпиосмылэсь ӟучомыса будэмзэс, йылолъёслэсь ышыны-бырыны кутскемзэс. Поэт ас сяменыз пумитъяськыны выриз солы пумит. Соин ик, лэся, одӥгез тодмо тодосчимы –литературовед В.Л.Шибанов, Ф. В.-ез «Аспӧртэмлыко этнограф» шуиз.

4.     Озьыен, туннэ урокмылэн темаез: «Аспӧртэмлыко этнограф» луоз.

Нош кин со сыӵе этнограф?

Мар со сыӵе этнография?

Кыӵе тодмо удмурт этнографъёсты тодӥськоды?

Зэм но,  Л. Христолюбова  В. Владыкин трос  эскеризы но  гожъязы ни удмурт калыклэн улэм-вылэмез, кытысь потэмез, сям-йылолъёсыз сярысь.  Нош малы меда Флор Васильевез но этнографъёс пӧлы пыртӥзы. Та юанлы валэктон понна, туннэ асьмеос группаослы люкиськыса нош ик поэтлэн поэзияз зымомы.

 Пиналъёс пуксе асьсэ группаосазы.

Котькуд группалы сетӥське кылбуръёсын листокъёс. 

5.     Тодматске кылбуръёсын но  огзэ кельшымонзэ бырйыса,  юанъёслы валэктонъёс утчалэ. Быръе группаяды одӥг вераськись.

6.     Нош таиз уж таӵе луоз. Флор Васильев тужгес но яратэ кылбуръёсаз фольклорлэсь пичи жанръёсты кутыны: визькылъёсты, лэчыт веранъёсты, чакланъёсты , индылонъёсты.  Угось соос калык пӧлын туж ӵем кутӥсько, пайдалыко луо, улыны но ужаны юртто. Соосты ог 50 пала кылбуръёсысьтыз шедьтыны луоз. Нош али эскером тӥлесьтыд  тодэм-валамдэс. Карточкаосын кылбурчилэн пӧртэм кылбуръёсыз- индылонъёсыз сётэмын. Но куд-ог чуръёсыз, кылъёсыз  усемын. Со чуръёсты шедьтоно но кылбур пӧрмытоно. Быгатоды-а поэт сямен?

Пиналъёс группаосын ужало, кылдытэм кылбуръёссэс шара лыдӟо

 7.     Табере листокъёстэс берыктэ но котькудды асьтэлы тужгес но кельшем индылонэз, визьнодэз, кин мае  запомнить кариз- шара вералэ.

8.     Нош али ӧжытак шутэтском. Ӟеч ужамды понна тӥледлы кузьым –кырӟан . Вераны кулэ, кырӟан поэтлэн творчествояз озьы ик бадӟым инты басьтэ. Кылсярысь, тросаз кылбуръёсаз удмурт калык кырӟан чуръёсты кутэ ( Из но му но пилиське но) пусъе: удмурт калык туж кырӟась калык шуыса

Валъёсты люктало шуласа,

Куноез сектало кырӟаса.

(Огез пинал гитараен быдэстэ «Мертты тон льӧмпу» кырӟанэз)

Пиналъёс, кызьы нимасалды та кылбурез? Кыӵе сям сярысь татын вераське?

9.     Ойдолэ табере урокмылы йылпумъян лэсьтомы. Соглаш-а тӥ «Флор Васильев –аспӧртэмлыко этнограф» шуонэн?

Нош али  йылпумъялэ кутскем предложениосты:

1.     Туннэ урокын мон тодӥ…

2.     Мон пайми…

3.     Мон валай…

4.     Мон малпасько…

5.     Мон оскисько… 

Дорысь уж: Урокын ӧз вуэ ке, кутскем ужзэс йылпумъялозы доразы. Со сяна, урокын шугъяськизы ке кыӵе ке сям-йылол сярысь вераны, сётыны луоз ивортон дасяны.  Луоз на «Флор Васильев - аспӧртэмлыко этнограф» эссе сётыны, но мон писательлэсь огъя творчествозэ эскерем бере гинэ пӧртэм темаос  ӵектӥсько.

_____________________

Нунал вошъяськемъя

_________________________

Толло лэсьтэм уждэ

________________________

Тырттэм капка азе

_________________________

Ӧд адӟы ке ачид,

_________________________

Кылыд медло вакчи,

_________________________

_________________________

Мед юнмалоз вож уд.

_________________________

Тон выжызэ ик сут!

Тон улы калыкъя,

__________________________

Кырӟанъёсыд – огъя,

__________________________

Пыртоно чуръёс:

 Эн вошъя кырӟандэ.

Эн сэзъя мыжыктэ.

Эн курла ӵуказе

Эн лега киземез,

Эн потты тон эштэ

Тон тыршы калыкен.

Эн вераськы токма.

Яратонэд – кема.

Тон ишкы йӧныез,

Вань ужъёсыд ӵошен.

Вожъяськондэ эн нуныя гадяд

Аслыд эн утча тон токма висён,

Кас уж ________________________________

Лушкам шудэн но ______________________

Кушман мерттӥд ке тон,__________________

Дунне вылын ваньмыз герӟаськемын,

Аслад ужед _____________________________

ачид усёд, шудбур уз вайы улонад, аслыд ик берытскоз, кыдеке уд мын, кушман потоз

Кас муртлы ___________________________

Уродзэ-шушсэ улон пушкысь

______________________________________

Котькудӥз малпа –______________________

Со аслыз ачиз лёге сюрес.

Нош улон – куддыр_____________________

Куддыръя веша со тыбырез.

Тон но, тон но кылзы верамез,

_______________________________________

Нош аслад _____________________________

Ас визьмыд ____________________________

Пыртоно кылъёс: уд сёты выль  сюлэм, уд кары ни вайыж, воштыны чаляк уг лу вылэм, ачиз шонер , со лек пушнер, йырыд уз лу мултэс, уродлы уз дышеты калык, уз люкет улонлы.

_____________________________

Тон вазьы котьку но ӟечкын,

_____________________________

Ӟечкын вазид ке кинлы ке,

_____________________________

Ӟечын ик берытскоз куке.

Тод верамме!

Пыртоно чуръёс:

Уд луы мурт.

Шуэ удмурт.

Ӟеч верамед

_______________________

Шыпыт куара но кылӥське,

_________________________.

Соин ик  малпа веракуд,

Кызьы тонэ сюлмыд косоз.

___________________________

Потод вуысь но котмытэк.

___________________________

Жаден калэз шӧдылытэк.

Соин ик чакла верамдэ,

____________________________

Эн жаля тон ӟеч кылъёстэ,

_____________________________

Пыртоно чуръёс:

Пеле вуэ жингыртыса

Кылдэ тон вера малпаса.

Уд куты ни, лобӟиз ке со.

Кылын изэз но пасялод,

Музъем шарез но берыктод

 Капчиято ке улонэз.

Эн кары вӧсь кылзӥсь муртэ

Кожа –__________, визьмыз –______________.

Песьтэр ныпъям, нош со –__________________.

Шонер вера – __________________лэсьтэ.

Сьӧд ужъёсыз –__________________________.

Солы аслыз шушсэ силё.

Муртлы гудэ ке но со _____________________,

Ӵемысь ачиз усе отчы.

Коӵо уг тоды   ____________________________,

Нош со уг шӧды кыӵезэ.

Сьӧраз ортчем ини ортчыт,

Пушказ –____________, вылаз –______________.

Пыртоно кылъёс: сяська, кескич,  силё,  ӧжыт , тырттэм, кырыж, пазьгем кӧжы,  гу, ыж ку, куӵозэ , кион

Песяйлы песяез вераллям:

Вашкала дыръёсы, пе, вал сям –

Кулэм мурт ватыку кырӟаллям,

Крезьгурзэ валтӥллям нош паллян.

Бускельзэс пыраклы келяку,

Кутчаллям кутъёссэс но паллян.

Шай дорысь тылскемез пелляку

Кылӥськоз вал кема ӝож кырӟан.

Мугорыз ке кошкиз – мар карод?!

Нош лулыз, пе, татчы мед кылёз.

Паллян гур кылӥськиз ке пеляз,

Со кузя вамышсэ мед лёгоз.

Со кожоз шайгуэ сюресысь,

Ас гуртаз пыраклы, дыр, кылёз.

Калыкен огъя гур кырӟамысь

Аслэсьтыз куаразэ но кылоз.

Со лулэз ик, вылды, возьыса,

Тылскем тыл шай дорын пуроме.

Осконтэм малпанлы оскыса,

Калыкъёс кырӟало на дэмен.

«Со озьы вал, - шуэ песяе, -

Малы ке малпанам та вие

Весь ӵемгес лыктылэ вуж вакыт».

Пинал пыртон.

Кезьыт тол шор вузэ ке но педлон,

Котькуд ымныръёсын ӟеч пальпотон.

Бускель коркан туннэ пинал пыртон.

Одӥг юртын ке но вордскиз нуны –

Быдэс гуртлы шудбур но шумпотон!

Выльзэ адямиез пумитаны

Вань пересьёс но гур сьӧрысь пото.

Дэрем яке шудон-а кузьмаса,

Солы вазиськыло шуныт кылын.

Шудбур но, шумпотон но сӥзьыса,

Выльзэ гурез мыто ни ӝӧк сьӧрын.

Ӝӧк сьӧр кырӟан корка тырос жондэ,

Вож нуныез киысь кие сёто,

Шудбур комок борды кадь йӧтӥсько.

«Мумид кадь буд мусо но кибашлы.

Бубид кадь лу визьмо, кужмо, лякыт.

Гурт калыкед кадь тыршы ужаны.

Вордскем палдэ но яраты ортчыт!»

Вож нуныез данъясь сайкыт кырӟан

Капчи лоба ни быдэс гурт вадьсын.

Калыкъёсты но со юнгес герӟа,

Ӟеч осконэн пыӵа сюлэмъёсы…

Кырӟась дӥсьёс

Оло сюан азе дасяськиллям

Огзылэсь огзы чебер нылъёс.

Тулыс возь выл выллем дӥсяськиллям,

Огезлэсь  огез чебер дӥсьёс.

Шортдэремъёс вылын кабачиос

Вуюись кадь пиштӥсько яркыт.

Эмезь кадь ӵыжытэсь кускерттонъёс

Нылъёсты ӟыгыртӥллям лякыт.

Пыдъёс но куаразэс сёто пумен,

Ширъяны ӧте корка шоры.

Чыртывесьёс вазе азвесь гурен,

Кожалод - пичи шыркун гырлы.

Нылъёс гинэ уг кырӟало татын,

Дӥськутъёс но кырӟало туннэ.

Вань буёлъёс яркыт дӥсьёс вылын

Тырмемын луоз шумпотонэн.

Со чеберъя пужъятыса.

Быгатэмзэ, дыр, возьматэ нылмурт,

Удмурт пужы бырттылыса.

Тодэ со, ушъялоз калык,

Адӟиз ке вылысьтыз дӥсьсэ,

Сюрес усьтоз бадӟым шумпотонлы,

Нокин уз ваты пальпотонзэ.

Сюан ортчоз. Сюан кырӟан кысоз.

Корка пушкы шудбур кылез.

Сюан дӥськут сандык пушкы ватскоз.

Сотэк но шумпотон улоз.

Витез, вылды, со аслэсьтыз дырзэ,

Кулэ луоз на со дӥськут.

Со возьматоз на аслэсьтыз туссэ,

Калык куректыку.

Ас кузезэ берпум сюрес вылэ

Сюан дӥськут ик келялоз.

Ӧжыт ке но, калык куректонэз

Озьы буйгатэмэз потоз.

 Сялтым

Гербер бере возь выл чиганъяське

Тӧл пельтэмъя пӧзё кадь буёлъёс.

Соку шур ву но шыпытгес кошке,

Возьлы, дыр, синмасько ву тулкымъёс.

Возь выл тырме шулдыр куараосын –

Татчы лыктэ гуртысь ваньмыз калык.

Чибориё дӥсен дӥсяськемын,

Возь выл но вожъяське буёлзылы.

Кырӟан но буёлъёс но сурасько,

Ярдурысен нюлэс дурозь ветло.

Вань ымныръёс шунды кадь пиштӥсько,

Нош выль кенъёс ӧжыт кепырало.

Весь матэгес султо картъёссылы.

Тыршо соос ӧжыт ӵыжектыса,

Калык дасяськемын ке сялтымлы?!

Выль кенъёсты нуо ини шуре,

Дӥсен кутэн кушто шуныт вуэ.

Ярдурысен нош котькудӥз горе:

Сялтым кулэ! Сялтым кулэ!

Кенъёс пото вуысь возьдаськыса,

Али ик кырӟаны соос дасесь.

Сялтым кырӟан,чебер вордӥськыса,

Котькудӥзлы, вылды, лякыт вазе.

Мертты льӧмпу

 Нылыд–пиед вордскиз ке семьяяд,

 Укно улад ик мертты тон льӧмпу.

 Нылдэ-пидэ музэн, тон нуныя,

 Сюлмаськыса тон будэты льӧмпу.

Дырыз вуиз ке сяськазэ усьтоз,

 Шырчик гурен тонэ со шулдыртоз.

 Шимес тӧлэз, уйин вузылыкуз,

 Корка уз лэзьы пырыны льӧмпу.

Быдэсмизы ке нош нылпиосыд,

 Оло, мукет азе лобӟылозы.

 Соку, анай сюлэм музэн гуртэ

 Льӧмпу ялан ӧтёз нылдэ–пидэ.

Эн куректы, анай, льӧмпу юрттоз,

 Пурысь йырдэ мусо маялтылоз,

 Нылыд–пиед музэн, кужым сётоз,

 Со улондэ но выльысь шулдыртоз.

Нылыд–пиед вордскиз ке семьяяд,

 Пинал льӧмпу тон мертты – дэмласько.

 Будэм нылпиослэн шудзы музэн,

 Гуртын льӧмпу сад мед  шукыяськоз.