Ӟучсэ кылэз дышетытэк, шуггес луэ йыг-йыг вамышъяны. Нош аслэсьтыд кылдэ яратытэк, мукет кылэз уд дышы гажаны!  (Д. Яшин)

Гаранькина Н. А.

Е.Пугачёв удмурт шаерын

(М.Коноваловлэн «Гаян» романэзъя)

Нимысьтыз висъям ужпумъёс полы пыртӥсько: мургес валан сётоно, литература улонэн, историен герӟамын шуыса; суредъя ужанэз литератураысь примеръёсын герӟаны дышетоно; ӟуч литератураез ӵошатыса уже кутыны дышетоно.

Уже кутэм материал: М. Коноваловлэн «Гаян» романэз; С. Есенинлэн «Пугачев» поэмаез; А. С. Пушкинлэн «Капитанская дочка» повестез; В. Шишковлэн «Пугачев» романэз но А. Абрамовлэн «Пугачев» суредэз.

Урокез кутскыны луоз чылкыт, шара лыдӟон бордысен. Басьтоно Пугачевез удмурт шаерын пумитан сярысь люкетсэ.

Юан: ма сярысь верало та чуръёс? Кызьы Пугачевез калык пумита, оске-а солы?

Кыл сётӥське ИЗО-ен дышетӥсьлы. Со возьматэ суредъёсты но вера, кызьы художник возьматэм удмурт калыклэсь Пугачевез пумитамзэ. Романын сямен ик, татын но калык гажаса лыктэм сое пумитаны. Суредын валтӥсь инты — Пугачев вал вылын пуке, со туж йӧно адске, шумпотыса учке калык шоры. Соку ик син шоры йӧтэ удмурт нылкышно, со чебер дӥсяськемын (описать карозы нылпиос но). Туж сӥлы карыса, дуно куноез вӧен-нянен пумитало. Нош рабочийёс пушкаос вайиллям, Пугачев тау каре но оске адямпослы. (Ужало на буёлъёсыз бордын).

Али учке асьме гуртын вордскем А. Абрамов художникен лэсьтэм портрет шоры. Кельше-а, пиналъёс, та тусбуй романын возьматэм портретлы? (Текстысь лыдӟо.) Зэмзэ но, вань огкадез. Нош суред вылын Пугачевлэн дӥсьтӥсь, кышкасьтэм луэмез яркытгес возьматэмын кадь. Сое валаны луэ синъёсызъя, учкемезъя.

Историен дышетӥсь. Шонер вераськоды Пугачевлэн тусбуез, характерез сярысь. Озьы ик гожъяло историкъёс но. Али тодады ваём со аръёсты (картая возьматэ ожен ортчем сюресъёсты).

1773 арын 29 мае Пугачев караульной солдатэн Казаньысь пегӟиз. 1773 арын сӥзьыл со вуиз Волга сьӧрысь степьёсы. Татын пумиськиз казакъёсын, соослы Петр III луисько шуыса ивортӥз. Визьмо но кышкасьтэм Пу­гачев крестьян восстанилэн кивалтӥсез луиз. 1773 арлэн шораз солэн отрядаз 80 мурт ке вал, борысь со туж ӝог йылӥз 400 муртозь. 1773 арын декабре Пугачевлэн армияз 30 сюрс мурт но 80 орудие лыдъяськиз ни. 1774 арын Кудашевлэн отрядэз Ижевске пыриз, пыӵалъёсты люкылӥз, тюрьмаосысь калыкез мозмытӥз. Но кема ӧз возиське, 25 мартэ эксэй армиысь солдатъёс Иж заводэз ас киязы басьтӥзы. 27 июне Ижевске выльысь вуизы Пугачевлэн казакъёсыз, калык сое Александр Невскийлэн соборез дорын туж сӥлы пумитаз. Пугачев люкылӥз калыклы коньдон, нош 42 чиновникъёс соку казнить каремын вал.

Котькуд гуртын Пугачевез калык шумпотыса пумита вал, та сярысь трос мадёсъёс кылемын. Нош ассэ Пугачевез курадӟытыса виизы 1775 арын 10 толшоре.

Дышетскись. Пугачев Алнаш музъемтӥ но ортчем, пе. Казакгуртын солэн казакъёсыз уй колӥллям, валъёсын ортчиллям, соин ик гуртсэс но озьы нималлям.

Байтеряк гурт возтӥ ортче бадӟым сюрес. Отӥ ик бызе Пугачка шур (удмуртъёс сое Кубечи шуо, пуачи кыл бордысь). Пугачев та шур дорын лагерьын улэм.

Варӟи шурлэн сьӧраз Каргурезь вань. Татын но Пугачев солдатъёсын улэм, лек ожъёс вылӥллям, али но бервылъёсыз кылемын. Со гурезе зарнизэ но, пе, ватыса кельтэм. Кыӵе ке лушкем кылъёс верам, нокин уг шедьты. Нош огпол уйин адямиос гурезь йылтӥ ӵуж пиштыса ворттылӥсь чуньыез адӟиллям. Матаз мыно ке, со пегӟе, нокин адӟыса уг вутты ни.

Одӥг сэзь воргорон тыр толэзё уе чуньыез кутыны малпам, тубем гурезь йылэ но адӟем ӵуж пиштӥсь чуньыез, туж паймыса, йырсазьзэ ик ыштыса, чуньы сьӧры уйиськем. Бордаз йӧтскем но, чуньы пиштӥсь буслы пӧрмем, син азьысь ышем. Озьы Пугачевлэн ватэм зарниез «ворттылэм» но ышем шуо. Али со адямиослы уг ни возьматъяськы. Гурезь йылэ гудӟылэм интыос, ож бервылъёс гинэ кылемын на.

Дышетӥсь. Россилэн историяз со паймымон аръёс вунонтэм пытьы кельтӥзы кызьы ке улонын, озьы ик искусствоын.

Удмурт литератураез басьтоно ке, кыӵе тунсыко «Гаян» роман гожтӥз М. Коновалов, соя спектакль но пуктэмын. Пиналъёс, нош кыӵе ӟуч произведение тодады лыктэ?

Дышетскись вакчияк вера А. С. Пушкинлэн «Капитанская дочка» повестез сярысь, мукетыз — С. Есенинлэн поэмаезъя. Собере пиналъёс текстъёсысь цитатаосты бырйыса лыдӟо.

Доре уж: В. Шишковлэсь «Е. Пугачев» романзэ лыдӟоно.

Дышетӥсь урокъя йылпумъянъёс лэсьтэ: куноослы тау каре, вераськись дышетскисьёслэн валэктонъёссылы дунъет сётэ.