Ӟучсэ кылэз дышетытэк, шуггес луэ йыг-йыг вамышъяны. Нош аслэсьтыд кылдэ яратытэк, мукет кылэз уд дышы гажаны!  (Д. Яшин)

Гаранькина Н. А.

«Вордӥськем палъёсын ортчем вамышъёс»

И.Гавриловлэн «Вордӥськем палъёсын» трилогиезъя огьясь урок-исследование (2 час)

Уроклэн мугез: тодазы ваё ӝутэм ужпумъёсты; эскеро образъёслэсь системазэс; дышетско йылпумъянъёс лэсьтыны, критической литератураен, текстэн ужаны, пӧртэм предметъёсъя тодон-валанзэс огазеяны.

Уже кутэм материал: портрет, книгаосын адӟытон, темая дасям доска.

Дышетӥсь. Произведениез эскерон, йылпумъянъёс лэсьтон понна, ужаломы группаосын. Литературоведъёслы, историкъёслы, критикъёслы, текстологъёслы ужъёс сётэмын луозы. (Кылъёслы валэктон доска вылын сётэмын.)

1. Ку но кызьы ужаз И. Гаврилов романэз бордын?

Литературоведъёс 1927-43 аръёс сярысь верало.

Кыӵе ужпумъёс ӝутэмын вал произведениын? (Удмурт театрлэн кылдэмез, писательской организация, солэн будон сюресэз сярысь, гурт улон, коллективизация, семья кусыпъёс, яратон но мукет.)

2. Шонер-а вераськизы литературоведъёс? Зэм ик-а улонын та аръёсы сыӵе учыръёс ортчизы, ма тодӥськоды история урокъёсъя? (Историкъёс вакчияк верало ортчем учыръёс сярысь.) Гуртамы 1929 аръёсы кылдэ «Горд кар» колхоз, председателез Азимов Егор Кузьмич вылэм...

Критикъёслы юан. Кызьы пусъё критикъёс та романлэн кылдэмез, отын сылӥсь ужпумъёс сярысь? А. Ермолаевлэн «Туннэ но ӵуказе» бичетысьтыз лыдӟемзэс верало (72 б.)

Текстологъёслы. Таӵе бадӟымесь ужпумъёсты возьматон понна, И. Гаврилов образъёслэсь аспӧртэмлыко радлыксэс кылдытэ. Кылсярысь, театрлэн будон сюресэз возьматэмын Катя Сергеевалэн образэз пыр. Кы ӵеен син азяды пуксиз та образ? Текстысь кулэ интыоссэ лыдӟо. Малы солы ваче пумит пуктэмын Варвара Антоновналэн образэз? (Нюръяськонтэк номыр но уг ортчы, озьы ик искусствоын но.)

Ма тодӥськоды та вакытэ ужась Удмурт театр сярысь? (Юан искусствоведлы.) Трилогиез лыдӟыса валаны луэ, татын прототипъёс вань, Катялэн образэз тупа Клавдия Кузьминична Гавриловалы, нош Сергей Климовлэн — И. Гавриловлы.

Писательёслэн будон сюрессы секытэн сётскиз — куспазы лэчыт нюръяськон, репрессиос — ваньмыз возьматӥське трилогиын. Тужгес но со шодӥське Сергей Климовлэн образэз пыр. (Вераськон мынэ театр, артистъёс сярысь; возьматоно К. Ложкинлэсь «Мастера удмуртского театра», «Удмуртский театр» но Б. Саушкинлэсь «Удмурт театр» книгаоссэс.) Трос тунсыкоез вань «Тодам вайисько» книгаын.

Ужало текстэз эскерисьёс. Кулэ интыоссэ лыдӟо, ӵошато Василий Камашевлэн образэныз. Историкъёс верало, кин зэмос улонын та аръёсы гожъяз, репрессие шедиз.

Дышетӥсь. Шонер, романын но улонын со бугырес аръёс вал, калыклэн азьлане секытэн лёгем вамышъёсыз, бадӟым шудлы оскон, вормонтэм кужымез возьматэмын.

Текстологъёсын ӵош ваньзы ужало на коллективизациен кылдэм ужпумъёс бордын. Эскеро Камаш Прохорлэсь, Бакинлэсь, Богатырёвлэсь, Педча кенаклэсь образъёссэс.

Дышетӥсь. Кыӵе произведение тодады лыктэ та бамъёсты лыдӟыку? (Верало Г. Медведевлэн «Лӧзя бесмен» трилогиез сярысь.)

И. Гавриловлэн трилогиысьтыз кыӵе гинэ ужпумъёсты ум чаклаське, ваньмыз соос улонысь басьтэмын, туж оскымон но аспӧртэмлыко образъёс кылдытэмын.

Нимаз урок ортчытыны луысал Быдӟым ожез возьматэмез сярысь но. Таиз но зэмос улонысь басьтэмын, со сярысь тӥ умой тодӥськоды гуртысь мӧйы адямиослэн тодэ ваёнъёсысьтызы. Романын со возьматэмын Климовлэн но Камашевлэн, Сергеевалэн ожмаськемзы пыр.

Литературовед. Лыдӟись книгаез умой пумитаз. С. Никитин сое «Кор­ни твои» нимын ӟуч кылэ берыктӥз. З. А. Богомолова, дунъет сётыса, ро­ман сярысь тазьы гожтӥз: «...хорошо зная быт старой удмуртской дерев­ни, писатель талантливо выписал портреты представителей старшего по­коления. В романе создана достоверная литературная атмосфера 30-х и начала 40-х годов. Это единственное произведение удмуртской прозы, вос­производящее обстановку культурной жизни в одной из национальных республик».

Дышетӥсь уроклы йылпумъянъёс лэсьтэ.