Ӟучсэ кылэз дышетытэк, шуггес луэ йыг-йыг вамышъяны. Нош аслэсьтыд кылдэ яратытэк, мукет кылэз уд дышы гажаны!  (Д. Яшин)

 Гаранькина Н. А. 

"Льӧмпу вай" но "Узвесь пыры"

ватсаса лыдӟон урокъёс

Писательлэсь творчествозэ эскерыку, дышетӥсь нимысьтыз саклык висъя солэн гожъяськон манерезлы, геройёссэ суредан амалъёсызлы, про изведенизэ радъямезлы но солэн кыӵе инты басьтэмезлы, ку кыӵе дыре гожтэмзэ чакласа. Школаын дышетыны дэмлам пӧртэм произведениос пӧлысь нылпиос тужгес но яратыса лыдӟо Г. Красильниковлэсь но Р. Валишинлэсь произведениоссэс. Роман Валишинлэсь веросъёссэ пыртыны луоз 8—11 классъёсын ватсаса лыдӟон урокъёсы. Соосты эскерыку, ныл­пиос муромытозы адямилэсь пуш шӧдонзэ, соосты возьматон но геройёсты суредан ласянь тодон-валанзэс.

Р. Валишин — проза удысысь усточи. Веросъёсаз кылсуредъёсыз (образъёсыз) туж яркытэсь, лэчытэсь пӧрмо. Писательлэсь творчествозэ дышетыны кутскыку, нырысь кӧня ке веросъёссэ эскерыны луоз. Кылсярысь, "Льӧмпу вайзэ". Отын автор чеберлык пыр героезлы дунъет сётэ, солэсь сямзэ, мылкыдзэ суреда.

"Льӧмпу вай" веросэз кузо уроклэн нырысетӥ люкетаз классын лыдӟыны но пуштросэз бордын ужаны луоз.

Марья Корепанова — веросын валтӥсь герой. Солэн тодэ ваёнъёсыз пыр писатель возьматэ нылкышнолэсь улон сюрессэ. Автор кутэ геройлэсь асэныз ассэ вераськемзэ, солы дунъет сётэмзэ. Марья быдэс улонзэ фермаын ужаз. Кузпалыз фронтэ быре, нылзэ огназ будэтоно луэ. Тани Марья выпускной ӝытын президиумын пуке, туж кепыра, киоссэ кытчы карыны уг тоды. Бен, солэн сюрмем киосыз дӥсь мисько, вурисько, фер­маын дыртыса скал кыско — жӧк вылын тазьы кылльыны дышемын ӧвӧл.

Киос. Та деталь пыр автор данъя огшоры ужась адямиез, анаез. Нылыз, Ольгаез, туннэ аттестат басьтоз, солэн кияз сяська — льӧмпу вай. Со но символ интыын луэ. Льӧмпуэз дас тямыс ар талэсь азьло мерттыса кельтӥз вал ожын бырем Николаез.

Льӧмпу вай. Нылпиослэсь юано, малы со символ луэ, малы верос тазьы нимаське?

Кыкетӥ часаз ортчытыны луоз урок-беседа. Дышетӥсь маке ватсалоз, валэктоз. Шуом, кӧня ке дыр висъялоз символъёссэ эскеронлы. Веросын туж кужмо но чебер символ луэ льӧмпу вай. Льӧмпу вай муромытэ верослэсь пуштроссэ, возьматэ сяськаяськись егит дырез, яратонэз, адямиослэсь, выжыоссылэсь кужымзэс. Марья льӧмпуэн сопал дуннее кошкем Николаеныз кадь вераське, со дыре ик сяськаяськись льӧмпу вай — егит Ольгалы атаезлэсь ивор но.

Пусйыны кулэ, Р. Валишинлэн льӧмпуэз символ карыса кутэмез уд­мурт литератураын выль амал ӧвӧл ни. Тросэз иисательёс асьсэлэн произведениосазы писпуосты кылсуредъёс (образъёс) карыса пырто. Соос (писпуос) уго удмурт адямилэн валаназ дуннеосты герӟась но луо.

Нош кыӵе луэ конфликтэз та веросын? Верос психологической бере, конфликтэз син шоры соку ик уг йӧты, пыдло ватэмын. Автор Марьяез возьматэ Раяен ӵошатыса. Соослэн егит дырзы ӵош ортчиз. Рая дышетскиз, нош Марья ӧз. Соин ик Рая котьку вылтӥяське вал. Нылпиоссы одӥг школаын, одӥг классын дышетскыны кемдӥзы. Ольга школаез зарни медален йылпумъяз, нош Раялэн пиез — йыртэмась.

Озьы, котькуд ласянь чакласа, Марьялэн образэз трослы вылӥынгес, кужмогес но чебергес адске.

Р. Валишинлэсь быгатонлыксэ, геройёсты но улонэз суредамзэ эске­рыны луоз "Узвесь пыры" веросъя но. Сое азьвыл ик лыдӟыны косоно, собере пуштросэз бордын ужано.

Та произведениын валтӥсь героез — Катьырна. Со быдэс улонзэ гуртын ортчытэ, шуг-секытъёсты чида, сюлэм чеберзэ но шунытсэ уг ышты.

Геройзэ возьматон понна, автор кутэ пӧртэм психологической детальёс, символъёс. Одӥгез сыӵе тодмет — яркыт вуюись. Со Катялэн шудбурез, кудзэ кышномурт трос пол адӟе, кудӥз солэсь ялан палэнске. Пичи ӵуж кобы— пичи дырыз — семьяеныз герӟась символ (атаез фронтэ быре, анаез война вакытэ кулэ). Узвесь пыры — кайгузэ, сюлэмшугзэ возьматӥсь. Та сярысь верослэн пумаз ачиз герой тазьы вера: "Мынам сюлмам но со война дырысен узвесь пыры кылиз кадь... Тӥни со узвесь пыры мыным маза уг сёты. Бордӥсь муртэ адӟисько ке, синкылиосме кутэме уг луы. Муртлэсь висемзэ ке тодӥсько, ачим но черласько..."

Верослэсь радъяськемзэ учконо ке, Р. Валишин нош ик кутэ ретроспектива амалэз — югдуръёсты берыктыса возьматонэз. Катьырна тодаз вае ортчем улонзэ. Солэн малпанъёсыз — верослэн пуштросэз.

Нырысетӥ пичи люкетэз — экспозиция. Сӥзьыл куазь возьматӥське одӥг предложениен гинэ. Геройлэн но арлыдыз, малпанъёсыз та куазьлы тупало. Кыкетӥ люкетаз Катьырналэн пичи дырыз сётэмын. Кызьы соос толалтэ, анаеныз сьӧр гуртэ мыныкузы, Орина доры пыризы. Соку анаез кулэ, нылзэ сирота кельтэ. Орина — Катьырналы ваче пумит пуктэм об­раз, сое Валишин быгатыса возьматэ: син азе пуксе туж жалясьтэм, сук, мыскылляськись мурт (нылпиос веросысь сыӵе интыоссэ шедьто но лыдӟо). Озьы Катьырналэн чылкытлыкез уката но висъяське.

Дунне колёса та кык кышномуртъёсты кык пол ваче вуттэ. Ориналэн Митреез синмаське Катялы, кышно басьтэ. Улонзы уг тупа, анайзы сура. Митрей кошке мукет нылкышно доры. Анаез сое сыӵе вамыш лэсьтэмезлэсь уг алы. Пиезлэсь выль квартира басьтэмзэ возьма. Со доры улыны мыныны дасяськыса улэ. Выль квартираязы котыр басьтыны уксёзэ лэзья. Со уг тоды, пиез юон вылэ чӧлскемын шуыса. Выль кышноеныз умой улэ кожа. Катьырна дорысь кошкыны дасяське. Катьырна сое валэн келя. Нош Митрей магазин котырын юыса ветлэ — ӵапак со зарни ӵуж кобыен, кудӥз Катялы семьяезлэсь синпель кылемын вал. Выль интыын Оринаез нокин но уг витьы. Кыкетӥ кенэзлы но со кулэ ӧвӧл. Мӧйы кышномуртэ ас дорысьтыз улля со. Озьы та кайгу вайись кышномуртэ, Оринаез, Катьырна берен дораз нуэ.

Та веросаз Роман Валишин туж быгатыса суреда геройёсызлэсь тусбуйзэс. Тани ӝӧк сьӧрын чай юонэз возьматон. Пуко Орина но тушо кык мӧйы воргоронъёс. Одӥгез — Ондыръян. Пичи Катьырнаез детдоме келяны дасяло. Кузё кышно, Орина кенак, чай юэ. "...Бам вылаз быльыр-быльыр потэм нюламзэ айшетэныз мыддорин палыныз олокӧня пол ӵушылэ ни. Озьы ке но, бушам чашазэ нош ик самовар кран улэ пуктэ... Нош Катьырна ӟус вылын пуке. Жальмыт тусъем со, карысьтыз усем тылобурдопи выллем, йырзэ отчы-татчы бергатэ. Тани-тани коӵышлэн гижыосыз улэ сюроз мискинь тютю..."

"Озьы ӝӧк сьӧрын пукыкузы, Катьырналэсь анайзэ ватэм бере, Он­дыръян чай юыса пӧсям ымнырзэ ӝӧк вылэ понэм ӵушконэн кӧсатӥз, синъёссэ ӵушылӥз — тӧл шорын синкыли кисьто. Пересь воргорон Ка­тьырна доры лыктӥз но солэн йыр вылаз кизэ понӥз. Чиньыосыз солэн куасьмем улваё писпу кадь — сӥлез, оло, чик но ӧвӧл, вирсэръёсын вотсам лы но ку гинэ. Озьы ке но, ки туж небыт вешаны быгатэ вылэм. Катьырна буйгатскиз". Уже кутэмын ваче пумит пуктон амал: Орина —Ондыръян, Орина — Катя. Юнме шорысь ӧвӧл, малы ке шуоно, пересь Ондыръян сирота Катяез вордыны басьтэ, соин солэн киосыз но небытэсь. Та интызэ нылпиос ӟеч мед тодозы. Соя юанъёс сётъяны но луоз. Татысь ик эшшо лыдӟоно на вуюисен герӟаськем интызэ — суред чебер образэз усьтыны юрттэ.

Урокын нылпиослы, группаослы люкылыса, уж но сётыны луоз. Нырысетӥ группа сюжет но композиция бордын ужа. (Верослэсь аспӧртэмлыксэ верало. Малы Катьырна пичи дырзэ тодаз вайиз? Кызьы азьланьтӥське но йылпумъяське верос?)

Кыкетӥез — образъёсты эскерон бордын. (Малы Катьырна лыдӟисьлэн котьку син шораз? Потэ-а тӥляд солы юрттэмды? Малы ваче пумит пуктэмын Орина но Ондыръян? Кыӵеесь соос? Малы Митрей гуртысь кошке? Кин янгыш? Верамзэс веросысь люкетъёсын юнматоно).

Куинетӥез тырше символъёсты но психологической детальёсты шедьтон бордын. (Кыӵе символъёс но психологической детальёс уже кутэмын? Малы? Лыдӟоно соосты). Та группа ик ужа произведенилэн кыл чеберлыкез удысын. Сое эскерыку, нырысь ик мед пусъёзы ӵошатонэн гожтэм предложениосты: вуюисьлэн зарни кобыез; турын ӝыжы пыдзэ согы кадь ӵабъяз; малпанъёс бус пыртӥ кадь улӟо; чиньыосыз куасьмем улвай кадь но мукет. Мед шедьтозы фразеологизмъёссэ: сурым поттӥз; чурыт кыл; кӧйыз ӵыжа; кӧтыз тырыны уг окмы но мукет. Мед валэктозы, ку но малы соос кутэмын.

Нош бӧрысез группа веросъя йылпумъянъёс лэсьтэ. (Ма сярысь та верос? Малы со "Узвесь пыры" нимамын? Оске-а Катьырна азьлань шудэзлы? Ма кулэ адямилы шудо луон нонна? Маин кельшиз Р. Валишинлэн веросэз?).

Бен, Роман Валишин веросаз огшоры адямиосты огшоры гинэ суреда кадь. Но геройёсыз син азе пуксё, сюлэмшугьяськыто. Нылпиос но сое шӧдыны-валаны быгатӥзы ке, озьыен та веросэз эскерон урок юнме оз ортчы.