Ӟучсэ кылэз дышетытэк, шуггес луэ йыг-йыг вамышъяны. Нош аслэсьтыд кылдэ яратытэк, мукет кылэз уд дышы гажаны!  (Д. Яшин)

 Гаранькина Н. А.

 Удмурт кылъя но литературая урокъёсты интеграция амалэн ортчытъян 

 Удмурт кылъя но литературая дышетӥсь азьын котьку шугесь но бадӟымесь ужпумъёс сылӥзы: нылпиослы анай кылзэс яратон мылкыд пыӵатон, чеберлыко удмурт произведениосын тодматон, вашкалазэ, калык кылосэз гажан сям сётон, удмурт кылэз дышетонлэсь кулэлыксэ валэктон но мукет.

Нош литератураез гинэ басьтоно ке, дышетӥсь пыӵатыны но возьматыны кулэ дунне вылысь котькуд калыкез гажан мылкыд. Озьы ик удмурт литература огъя будон сюрес выламы номырин воштонтэм луэ. Со юрттэ удмурт калыклэсь малпанъёссэ, выльмись тусбуйзэ, выльдӥськон ужын тыршемзэ мургес валаны. Соин но, дыр, куронъёс эшшо йыло на: пиналъёс мед быгатозы улон бергамез валаны, пӧртэм учыръёслы дунъет сётыны, ӟеч сямъёслы, ужез гажаны, инкуазез яратыны мед дышозы; асьсэ коже лыдӟиськон мылкыдзы мед пуромоз; малпанзэс чебер, вольыт вераны но гожтыны мел сюлмаськозы.

Зэм, бадӟымесь куронъёс пуктэмын. Та вакытэ пиналъёс котьма сярысь трос ивортон басьто телевидение, интернет, радио пыр; озьы ик пӧртэм газет-журналъёсысь но.

Удмурт кылэз но литератураез дышетонын, мукет предметьёсын ӵошатыса, унолы секытгес. Угось татын уд куты компьютеръёсты, яркыт кинофильмъёсты, пӧртэм пумо справочникъёсты, иллюстрациосты. Кыӵе мылкыдын лыктоз дышетӥсь удмурт кылъя но литературам уроке пиналлэн котьмае тодон-валан мылкыдыз медам быры шуыса? Нырысь ик дышетӥсьлы нуналмысь кулэ пӧртэм выль амалъёс утчаны, тунсыко ужрадъёс ортчытъяны.

Тани берло дыре методлитератураын но предметной журналъёслэн бамъёсазы трос верасько стандартной луисьтэм занятиос ортчытъян пумысен. Мыным сыӵе урокъёс ортчытъяны туж кельше — ӧвӧл со модалы йыбыртъян но, огшоры уроклэсь куштӥськон но. Выль ӧp утчан, шуысал мон. Котькыӵе классын тупась темая четвертьлы 1-2 пол выль амалъёсъя урокъёс ортчытыны луоно. Таӵе урокъёс котькуд ласянь трос дасяськемез кулэ каро, визьнод, тодон-валан сёто, огъя ужамлэсь кужымзэ но будэто.

Нош кыӵеесь луо пӧртэм амалъёсын занятиос? Интегрированной урок, рольёсъя шудон урок, урок-экскурсия, урок-исследование, радио-, телепередачаосысь материалъёсты уже кутон но трос мукет.

Кызьы ортчытоно интегрированной урок? Интегрированилэн элементъёсыз трос дышетӥсьёслэн урокъёсазы кутӥсько, дыр, малы ке шуоно, соку, пиналъёслэн предмет шоры учконзы паськыта, асьсэлэсь тодон- валанзэс мыло-кыдогес уж вылын быдэсъяло. Дышетӥсь но выль синмын учке предметэз шоры, темаез мургес сётыны тырше, мукет предметьёсын герӟа. Татын уго тодон-валанлыкез будэтон но пӧртэм предметъёсъя сое муромытон сяна, пиналлы ас кожаз но ужаны луонлык кылдэ.

Интеграцилэн пӧртэм сиосыз (уровеньёсыз) вань уго. Предметъя выль валан, ивортон сяна, пӧртэм учыръёсты ӟечгес тодон-эскерон но сётӥське. Озьы луэ темаез выльысь эскерыку яке урокын ватсам (дополнитель­ной) материал сётыку.

Мукетыз учыр. Дышетӥсь яке дышетӥсьёс материалэз ӵошатыса ога зеям (сравнительно-обобщающей) планэн сёто. Нылпиос пӧртэм произведениосъя тодон-валанзэс улонысь учыръёсын, фактъёсын ӵошатыны, ваче пумит пуктыны мед быгатозы. Собере ини интегрированилэн эшшо но мур уровенез кутске. Соку ини нылпиос асьсэ коже ӵошатыло, ваче пумит пуктыло суждениосты, пӧртэм явлениослэсь, событиослэсь, учыръёслэсь кусыпсэс, шедьтыны быгато гердзэс, валаны кутско соослэсь огъя луэмзэс. (Огез мукетыз бордысь потэ: историез тодэм юрттэ литератураез дышетыны, математикаез ӟеч валась умой тодэ физикаез, химиез но мукет).

Интегрированной урокъёсыз пӧртэм сямен ортчытыны луэ: урокез нуэ 1 яке 2 дышетӥсь. Со ортче лекция, семинар, беседа, диспут выллем.

Стандартной луисьтэм амалэн урокъёс но ортчытыны луоно на. Кылсярысь:

1)                    альманах, газет поттон урок;

2)                    контрольной урокъёс (проектэз возьматон, творческой ужен тодматон);

3)                    урок-зачет, конкурс, аукцион, рефератъёсты лыдӟон, произведенилы дунъет сётон, план гожтон.

Интегрированной уроклэн туж кулэ луись тодметэз — пиналъёсты асьсэ коже ужаны дышетон, та амалэз вылӥе ӝутон. Угось интеграция дышетоно материаллэсь тематиказэ паськытатэ, ортчись явлениосты, ужпумъёсты мургес эскеремез кулэ каре, нош сыӵе тодонлык кылдэ мукет предметъёсты но ӟеч тодэм, быгатыса уже кутэм бордысь гинэ.

Али тодматскыны ӵектӥсько 9 классын интегрирование амалэн удмурт литературая таӵе урок ортчытыны.

Е. Пугачёв удмурт шаерын (М. Коноваловлэн «Гаян» романэзъя)

Туж аспӧртэмлыко пӧрмо рольёсъя шудон урокъёс. Соос тупало котькыӵе арлыдо нылпиослы. Таӵе типъем урокъёс педагогикаен пуктэм куронъёсты муромыто, чебер но малпаськытӥсь каро. Сыӵе занятиын пинал котькуд ужпумез нимысьтыз эскере, кылдэм ужъюгдурез валаны тырше, аслэсьтыз вераськемзэ, выросъёссэ палэнысен учкыса, мукетъёсыныз ӵошатэ, дунъет сётэ.

Рольёсъя шудон амалэн урок ортчытыку таӵе ужрадъёсты быдэстыны кулэ:

-   быръёно тема, дасяно инты (классэ сцена лэсьтоно);

-   шудӥсь муртъёсты рольёсъя люкылон;

-   шудон оскымон мед луоз шуыса, кылдытоно луонлыкъёс;

-   рольёсъя уроклэн валтӥсь ужпумез — валтӥсь ужъюгдурез шедьтон но сое сэрттон-пертчон;

-   урокын ужамлэсь ӟечлыксэ эскерон.

Шудон амалэн дышетонэз уже кутылӥзы но эскеризы тодмо педагогъёс: С. Т. Шацкий, А. С. Макаренко, М. Рыбникова, С. Н. Лысенкова. Д. Эльконин шуиз: «Шудонын нылпилэн быдэсак воштӥське котырысь улонэз, собере кылдэ аслаз малнанэз но дунне шоры учконэз (точка зрения). Озьыен, шудон амалэн ортчытэм занятиослэн туж бадӟым воспитательной луонлыкьёссы, кужымзы».

Тодмо ини, дышетӥсьлы огьясь урок ортчытыны секыт. Соос огвыллемесь ортчо, пиналъёслы темая ваньмыз тодмо кадь ини. Тӥни соку занятиез мукет формаен ортчытыны луоно. Кылсярысь, рольёсъя шудон- урок, урок-путешествие (инсьӧры вуылон).

Сямкыл (наречие), уроклэн конспектэз

8-тӥ классын дышетскисьёсын «Приложение», «Однородной членъёс» темаосты дышетыку, рольёсъя шудон-уроклы (сочиненилы) дасяськон ортчытыны луоз.

Ижевск – Удмуртилэн шоркарез, уроклэн конспектэз

Пиналъёслы тунсыко потэ, литературая занятиосты урок-исследование амалэн ортчытӥськод ке. Ужрадлы дасяськыку, дышетскисьёсты тодматоно таӵе куронъёсын: ӟеч тодоно произведениослэсь пуштроссэс (текстэз); бӧрсьысь борсе ортчись учыръёслэсь мынэмзэс (хронологизэс) радъяно; текстэз пӧртэм пумо эскерон амалъёсты тодэ ваёно, кызьы капчи луоз валаны произведенилэсь валтӥсь малпанзэ (текстуально-оценочной, тематической, образъёсъя, сравнительной, композиционной, идейной).

Валэктон сётыкуд, произведениез эскерыкуд дышетскы ответтэ текстысь но улонысь примеръёсын юнматыны, цитатаосты лыдӟыны; эн вунэты йылпумъянъёс лэсьтыны; верамедлы одно аслэсьтыд мылкыддэ возьматы (геройёслы, пейзажлы, учыръёслы но мукет); валтӥсь малпанзэ шедьтыны но пусйыны тыршы; аслэсьтыд малпандэ вера чебер, янгышъёстэк, чакла кылыдлэсь радзэ; эн вунэты дыр сярысь (мултэс кулэтэмзэ эн вера); валэктондэ азьвыл ик дася: аслыд вакчияк план гожты.

«Вордӥськем палъёсын ортчем вамышъёс», И. Гавриловлэн «Вордӥськем палъёсын» трилогиезъя огъясь урок-исследование (2 час)

Дышетскисьёслэсь тодон-валан басьтыны тыршонзэс будэтонын, ас кожазы быгатонлыксэс азинтонын бадӟым инты басьтэ урокъёсын радио, телепередачаослэсь материалъёссэс уже кутон. Дышетӥсьлы умой тодыны кулэ, малы, кыӵе муген но кызьы сётэмын луоз со урокын. Ужаны кутскыку лыдэ басьтоно тани мае: сётэм материал пиналлы валамон но тунсыко мед луоз, быръёно кулэзэ гинэ, мултэс трос медам луы. (Кылсярысь, классической музыкаез урокын 7 минутлэсь кема кылзоно ӧвӧл.) Саклык висъяно на чебер вераськон бордын ужанлы. Урокъёсты нуыны кутскемлэсь азьло адсконо интые ошоно: «Та арняе учкоды», «Кылзэлэ!..» выллем плакатъёс.

Берло дыре каньылгес луиз ни урокъёсын драматической произведениосъя радио-, телепостановкаосты кутыны. Школаосын вань видеомагнитофонъёс, видеокамераос, дышетӥсьлэн ужезлы соос юрттэт сёто. Туэ каникулъёс азьын пиналъёслы телевизор пыр В. Г. Садовниковлэсь «Сюан» комедизэ, И. Гавриловлэсь «Жингрес сӥзьыл» пьесазэ учкыны косэмын вал. Таӵе юанъёс бордын ужазы:

1. Кыӵе режиссёр пуктӥз спектаклез? Тупа-а со Садовниковлэн комедиеныз? Воштӥськонъёс вань-а?
2. Кызьы азинске сюжетэз но конфликтъёсыз?
3. Кинэн но кызьы лэсьтэмын сцена, тупа-а со комедилэн пуштросэзлы?
4. Кинлэн крезыурез чузъяськиз? Кельшиз-а?
5. Кыӵе артистъёс шудӥзы рольёсты? Кызьы шудӥзы?
6. Кельшиз-а тыныд спектакль, валамон-а солэн темаез, валтӥсь малпанэз?

Та юанъёсъя пиналъёс малпанзэс верало яке гожто отзыв, рецензия. Таӵе кенешон дышетскисьёслы тунсыко потэ, котькинлы кельше, котькуд пиналлэн маке вераны мылкыдыз бурдъяське.

Трос тодон-валан басьтӥзы нылпиос К. Гердлы сӥзем передачаосты учкыса, со юрттӥз бордгазетъёс поттыны, сочинениос гожтыны. Одно ик уроке кутоно А. Окилы сӥзем радио-, телепередачаосты, пиналъёсты азьло ик кылзыны косоно, нош умоесь передачаосты магнитофон лентае гожтыса кельтоно. Пиналъёс ярато учкыны «Эзь», «Тӥледлы милям крезьгуръёсмы», «Лулысь-сюлмысь» передачаосты. Соосты учкемзы бере пичи сочинениос гожтӥськом. Радио пыр кылзо «Зарни крезь», «Кылбурет удысын», «Ладилэн азбараз», «Арня ӵукна», «Чагыр, чагыр дыдыке», «Тулкым», «Кузьыли кар» передачаосты, собере малпанзэс верало таӵе юанъёсъя:

1. Кыӵе удмурт передачаос тыныд кельшо? Малы?
   1. Кудӥз яратоно передачаед? Кӧня пол толэзьскын, арня вискын со луылэ?
   2. Кин нуэ передачаез?
   3. Кыӵе мылкыд кельтэ передача?
   4. Map дэмласалды удмурт радиоын ужасьёслы?

Котькуд аре нуиськом литературно-творческой кружок. Гожъяськыны мылкыд карись нылпиосмы но вань. «Вуюись», «Инвожо», «Чингыли гуръёс» нимын бордгазет поттӥськомы. Умой ужъёсты альбоме гожтыса кельтӥськомы на. Юнкоръёсмы печатласько «Ӟечбур», «Алнаш колхоз­ник» газетъёсын, «Инвожо» журналын. Котькуд ар пырисько А. Окилы сӥзем литературной конкурсэ. Вань та ужрадъёсъя валано кадь, пиналъёс анай кылзэс ярато шуыса.

Тодэ лыктэ бадӟым педагоглэн К. Д. Ушинскийлэн верамез: «Вордскем кыл — йырвизьмез узырмытонлэн кутсконэз, вань тодон-валанлэн омыръяса быдтонтэм ошмесэз, со бордысен кутске визьмаськон, ӟечлы дышетскон».

Ноку но вужмисьтэм кылъёс, туннэ нуналлы верамын кадь, соин дышетӥсьлэн тыршыса но тунсыко формаен ортчытэм ужрадъёсыз юрттозы пиналлэсь огъя дунне валанэз будэтыны, вераськон но гожъяськон кылзэ волятыны, чеберез валаны, искусствоез дунъяны, быдэ вуисьёслы ӟеч сямъёс пыӵатыны, гожъяськон борды кыстӥськыны, анай кылэз но литератураез яратыны, аслаз калыкез понна пайда вайыса ужаны но улыны.

Уже кутэм литература

1. Народное образование. 1990. № 3-7; 1991. № 2-7.
2. Вордскем кыл. 1991. № 2; 1992-. № 1; 1994. № 2; 1999. № 1; 2001. № 2002. № 4, 5.
3. Русский язык в школе. 1988. № 4; 1991. №1-5.
4. Изобразительное искусство в Удмуртии. Ижевск, 1986.
5. Ермолаев А. Туннэ но ӵуказе. Ижевск, 1984.
6. Инвожо. 1991. № 9.
7. Литература в школе. 1996. №3-6.
8. Удмурт литература. Учебник. Ижевск, 1984.
9. Удмурт литература 10 класс. Хрестоматия. Ижевск, 1994.
10. Народное образование. 2002. № 11. Крысин А. Беседы о языке.