Ӟучсэ кылэз дышетытэк, шуггес луэ йыг-йыг вамышъяны. Нош аслэсьтыд кылдэ яратытэк, мукет кылэз уд дышы гажаны! (Д. Яшин)
Алнаш ёросысь удмурт кылъя но литературая дышетӥсьёслэн сайтсы
Кыл тодонъя выжыкылъёс
Удмурт кылъя урокъёслы яратон мылкыд пыӵатон понна, пӧртэм амалъёс утчано луэ. 10—12 аресъсм пиналъёсты бордазы кыско выжыкылъёс, пӧртэм шудонъёс, малпаськытӥсь ужъёс, озьы ик огъясь урокъёс. Я сяла куреглы пузъёсысьтыз чипыосызлы ӵогиськыны юрттӥськомы, я Алёнушкаен ӵош лудӟазегъёслэсь Иванушкаез утиськомы, я удмурт выжыкылысь Египечалэн кенэзлы, Аннӥлы, кышкытлыклэсь мозмыны юрттӥськомы. 5-тӥ классын, вань темаосты йылпумъям бере, арлы быдэ "Удмурт кыллэн дуннеяз" путешествие потаськомы. Солэн шоркареныз, Алфавит городэн тодматскиськом.
Пумитаськомы Е но Э, И но Ӥ возьмаськисьёсты, Куараослэн площадязы вуылӥськомы, Янгыш нюк дурын паймымон Беризен, (Кузебай Гердлэн "Гондыръёс" выжыкылысьтыз героеныз) пумиськылӥськомы.
Путешествимы ортче Удмурт кунлэн одӥгаз ёросаз — Морфологиын. Выжыкыллэсь аспӧртэмлыксэ 5-тӥ классысен ик тодо ни бере, тросгес ужаны тыршиськомы кыл тодонъя (лингвистической) выжыкылъёс бордын. Котькуд вераськон люкетэз кызьы ке но герӟаськомы выжыкылэн. Озьы темаез но нылпиос капчиенгес валало, дуннеез валанзы но паськыта, кылрадзы но воля.
Куд-ог темаез дышетӥсь быдэсак выжыкыл вылын валэктэ, собере кыл волятон ужъёс вылэ выже.
"Глагол" темая урокез дышетӥсь тазьы но кутскыны быгатэ:
Дышетӥсь. Вераськон люкетъёслэн ӧрзы бадӟым. Ваньзы ик соос асьмелы кулэ, озьы ке но, та ӧрен ошмес син музэн кивалтэ Глагол. Малы солэн кулэлыкез сокем бадӟым?
Сое валан понна, ойдолэ глаголъёстэм интые вуоме. Тани асьмеос отын ни, шуом. Татын глаголъёс ӧвӧл. Кыӵе бен со дунне?
Ой! Мар луиз тазьы монэн? Интыысьтым вырӟеме ик уг луы ни, ветлыны глагол ышиз. Юбо кадь долкамын: кеськеме но, бӧрдэме но уг луы – сыӵе глаголъёс татын ӧвӧл. Та шаерын улӥсьёсты сылыса эскероно луомы ни.
Огзылэн но матысь, оскымон эшсы ӧвӧл: эшъяськыны соос уг быгато. Татын улӥсьёс ноку но адӟыны уз быгатэ мамык лымылэсь усемзэ но, ӵуж италмасъёслэсь сяськаяськемзэс но, уз кылэ сӥзьыл куаръёслэсь пыд улын ӵаштыртэмзэс но. Куанер, туж куанер калык улэ татын. Уг быгато соос яратыны но, шумпотыны но, ужаны но. Глаголъёс ванен гинэ шулдыр но чебер вылэм асьмелэн улонмы.
Та выллем выжыкылэн кутскыны луэ мукет темая урокъёсты но. Темалэсь одӥг люкетсэ дышетыса, яке быдэсак разделэз ортчем бере луэ быдэс классэн усто выжыкыл малпаны.
Бадӟым классъёсын но куд-ог темаосъя та выллсм ужьёс гожъяны-быдэстыны луоно. Дэмласько тодматскыны пӧртэм аръёсы люкам кылтодонэн (лингвистикаен) герӟаськем выжыкылъёсын. Соосты дышетскисьёс асьсэос гожъязы.
